Mɛni Ji Sane Kpakpa Ni Kɔɔ Jamɔ He?

1. Ani jamɔi fɛɛ hi?

Mɛi ni hiɛ tsui kpakpa yɛ jamɔi fɛɛ amli. Eji sane kpakpa akɛ Nyɔŋmɔ naa mɛi nɛɛ, ni esusuɔ amɛhe. Shi dɔlɛ sane ji akɛ, mɛi pii ni tsɛɔ amɛhe Nyɔŋmɔjalɔi lɛ feɔ nibii fɔji. (2 Korintobii 4:3, 4; 11:13-15) Amaniɛbɔɔ tsɔɔ akɛ, jamɔi komɛi po kɛ amɛhe woɔ awuiyeli kɛ weku shishibulemɔ mli, amɛwuɔ ta, ni amɛfeɔ gbekɛbii niseniianii. Enɛ haoɔ mɛi ni heɔ Nyɔŋmɔ nɔ amɛyeɔ diɛŋtsɛ lɛ waa!​—Kanemɔ Mateo 24:3-5, 11, 12.

Anɔkwa jamɔ woɔ Nyɔŋmɔ hiɛ nyam, shi amale jamɔi feɔ nibii ni esaaa ehiɛ. Amɛtsɔɔ tsɔɔmɔi ni bɛ Biblia lɛ mli, ni ekomɛi ji amale tsɔɔmɔi ni kɔɔ Nyɔŋmɔ kɛ gbohii lɛ ahe. Shi Yehowa miisumɔ ni mɛi ale anɔkwale ni kɔɔ ehe lɛ.​—Kanemɔ Ezekiel 18:4; 1 Timoteo 2:3-5.

2. Mɛni ji sane kpakpa ni kɔɔ jamɔ he lɛ?

Miishɛɛ sane ji akɛ, Nyɔŋmɔ naa jamɔi ni kɛɔ akɛ amɛsumɔɔ lɛ shi yɛ anɔkwale mli lɛ amɛsumɔɔ Satan je lɛ moŋ lɛ. (Yakobo 4:4) Nyɔŋmɔ Wiemɔ lɛ tsɛɔ amale jamɔi fɛɛ akɛ “Babilon Kpeteŋkpele.” Babilon ji blema maŋ ni amale jamɔ je shishi yɛ mli, yɛ Noa Nu Afua lɛ sɛɛ. Etsɛŋ, Nyɔŋmɔ baakpãtã jamɔi ni lakaa mɛi, ni amɛwaa mɛi ayi lɛ ahiɛ trukaa.​—Kanemɔ Kpojiemɔ 17:1, 2, 5, 16, 17; 18:8.

Saji kpakpai babaoo yɛ lolo. Yehowa hiɛ kpako mɛi ni hiɛ tsui kpakpa ni yɔɔ amale jamɔi srɔtoi fɛɛ amli yɛ jeŋ fɛɛ lɛ anɔ. Eetsɔɔ mɛi nɛɛ anɔkwale lɛ koni amɛfee ekome.​—Kanemɔ Mika 4:2, 5.

3. Mɛni esa akɛ mɛi ni hiɛ tsui kpakpa lɛ afee?

Yehowa jwɛŋɔ mɛi ni miisumɔ ni amɛle anɔkwale lɛ ni amɛfee nɔ ni ja lɛ ahe. Ekɛɔ amɛ akɛ amɛshi amale jamɔ mli. Mɛi ni sumɔɔ Nyɔŋmɔ lɛ miisumɔ ni amɛfee tsakemɔi koni amɛsa ehiɛ.​—Kanemɔ Kpojiemɔ 18:4.

Be ni mɛi ni hiɛ tsui kpakpa lɛ nu sane kpakpa lɛ yɛ bɔfoi lɛ anaa yɛ klɛŋklɛŋ afii 100 lɛ mli lɛ, amɛkpɛlɛ nɔ kɛ miishɛɛ. Amɛhã Yehowa tsɔɔ amɛ shihilɛ gbɛ hee, ni ji shihilɛ gbɛ ni hãa mɔ náa miishɛɛ kɛ hiɛnɔkamɔ lɛ. Amɛkpɛlɛ sane kpakpa lɛ nɔ kɛtsɔ Yehowa ni amɛkɛye klɛŋklɛŋ gbɛhe yɛ amɛshihilɛ mli lɛ nɔ, ni amɛkɛfee nɔkwɛmɔnɔ kpakpa amɛhã wɔ ŋmɛnɛ.​—Kanemɔ 1 Tesalonikabii 1:8, 9; 2:13.

Yehowa hereɔ mɛi ni shiɔ amale jamɔ mli lɛ kɛbaa ejálɔi lɛ ateŋ. Kɛ́ ohere mlihilɛ mli ni Yehowa jɛɔ efɔ̃ɔ bo nine lɛ nɔ lɛ, obaatsɔ enaanyo, obaafata Yehowa jálɔi krokomɛi ni sumɔɔ amɛhe lɛ ahe, ni obaaná naanɔ wala.​—Kanemɔ Marko 10:29, 30; 2 Korintobii 6:17, 18.

4. Mɛɛ gbɛ nɔ Nyɔŋmɔ baatsɔ ehã miishɛɛ akpele jeŋ fɛɛ?

Amale jamɔ hiɛ ni abaakpãtã lɛ ji sane kpakpa. Ebaahã yiwalɛ sɛɛ afo yɛ jeŋ fɛɛ. Amale jamɔ ko ehiŋ shi dɔŋŋ ni baalaka mɛi, ní ekɛ mligbalamɔ aba adesai ateŋ. Mɛi fɛɛ ni baahi wala mli lɛ baafee ekome kɛjá anɔkwa Nyɔŋmɔ kome lɛ pɛ.​—Kanemɔ Kpojiemɔ 18:20, 21; 21:3, 4.