Maŋtsɛyeli Anɔkwalei lɛ​—Akɛ Mumɔŋ Niyenii Miihã

BE NI o-Biblia kaselɔ lɛ nuɔ ŋmalɛ ni okɛ lɛ kane lɛ shishi lɛ, ona akɛ enaa kpɛ ehe waa. Eto etsui shi ebi akɛ, “Ani ootao otsɔɔ akɛ, Biblia lɛ kɛɛ wɔbaanyɛ wɔhi shi kɛya naanɔ yɛ Paradeiso—yɛ shikpɔŋ nɛɛ nɔ?” Mɔ ni okɛnyiɛ shiɛmɔ nɔ lɛ ŋmɔ muɛɛ ni ekɛɛ, “Ojogbaŋŋ, mɛni ona yɛ Biblia lɛ mli lɛ?” Bɔ ni nikaselɔ lɛ naa kpɛ ehe sɔŋŋ lɛ hã ehiɛ fee lɛ yaa ni ehoso eyitso ekɛɛ, “Eefee mi naakpɛɛ akɛ atsɔɔɔ mi enɛ!” Kɛkɛ ni okai akɛ otsii fioo ni ho lɛ, be ni ená ele klɛŋklɛŋ kwraa akɛ Nyɔŋmɔ gbɛ́i ji Yehowa lɛ, ewie nɔ ko tamɔ nakai nɔŋŋ.

Ani oná niiashikpamɔ ko tamɔ enɛ pɛŋ? Nyɔŋmɔ webii lɛ ateŋ mɛi babaoo ená eko. Nibii fioo komɛi po baanyɛ ahã wɔkai nikeenii ni nɔ bɛ, ni ji anɔkwale lɛ he nilee ni wɔnine eshɛ nɔ lɛ jogbaŋŋ! Shi bo lɛ ŋɔɔ bei fioo kɛsusu he okwɛ: Te fee tɛŋŋ onine shɛ nakai nikeenii lɛ nɔ? Wɔbaasusu sanebimɔ nɛɛ he yɛ fã nɛɛ mli. Bɔ ni Nyɔŋmɔ webii lɛ etee nɔ amɛnine eshɛ anɔkwalei anɔ fiofio lɛ ji odaseyeli diɛŋtsɛ ni maa nɔ mi akɛ, Nyɔŋmɔ Maŋtsɛyeli lɛ ji nɔ ko ni yɔɔ diɛŋtsɛ. Enɔ Maŋtsɛ ni ji Yesu Kristo lɛ kɛ afii oha sɔŋŋ etee nɔ ekwɛ ni atsɔɔ Nyɔŋmɔ webii lɛ anɔkwale lɛ.