Gbekɛbii Atsɔsemɔ Koni Amɛná Jeŋba Kpakpa—Ani Enyɛɔ Ebaa lɛ Nakai Lolo?
ROBERT GLOSSOP ni tsuɔ nii yɛ Vanier Institute for the Family ni yɔɔ Ottawa, Canada lɛ kɛɛ akɛ: “Shihilɛ ni yɔɔ hwanyaŋŋ diɛŋtsɛ, hiŋmɛigbelemɔ ni efutu waa, he ni jeŋba he mla ni kɛ ehe kpãa gbee bɛ mli wɔyɔɔ bianɛ lɛ.” Mɛni ejɛ mli eba? Amaniɛbɔɔ ko ni je kpo yɛ The Toronto Star adafitswaa wolo lɛ mli lɛ kɛɔ akɛ: “Gbekɛbii ni eye kɛjɛ afii nyɔŋma kɛ etɛ kɛyaa lɛ ahɔ́ŋɔɔ, awui ni gbekɛbii yeɔ, kɛ gbekɛbii ni eye kɛjɛ afii nyɔŋma kɛ etɛ kɛyaa ni gbeɔ amɛhe lɛ fɛɛ miifa kɛmiiya hiɛ.”
Naagba lɛ tekeɔ Amerika Kooyigbɛ. Bill Damon, Center for Human Development ni yɔɔ Brown University yɛ Rhode Island, U.S.A. lɛ nɔkwɛlɔ lɛ ekase nɛkɛ naagbai nɛɛ ahe nii yɛ Britain kɛ Europa maji krokomɛi amli, kɛ agbɛnɛ yɛ Australia, Israel, kɛ Japan. Ekɛ enine tsɔ̃ɔ bɔ ni sɔlemɔi, skul sɔrɔtoi, kɛ gbɛjianɔtoi krokomɛi ni kɛ gbɛtsɔ̃ɔmɔ hãa gbekɛbii lɛ baa shi amɛhaa. Eheɔ eyeɔ akɛ wɔ hiŋmɛigbelemɔ lɛ “leee nɔ ni he hiaa gbekɛbii koni amɛná subaŋ kɛ hesalɛ kɛha nɔ ko tsumɔ.” Yɛ be mli ni ekɛ mɛi ni kɛɔ akɛ amɛhe esa yɛ bɔ ni esa akɛ fɔlɔi atsɔse amɛbii amɛha, ni tsɔ̃ɔ akɛ “tsɔsemɔ ehiii haaa gbekɛbii agbɔmɔtsoŋ hewalɛnamɔ kɛ amɛhilɛ kɛhamɔ” lɛ feɔ nɔkwɛmɔnɔ lɛ, Damon maa nɔ mi akɛ enɛ ji “gbɛjianɔtoo kɛha tsɔsemɔ ni hãa anáa gbekɛbii toigbolɔi ni feɔ amɛsuɔmɔnaa nii.”
Mɛni he hiaa gbekɛbii ni yɔɔ ŋmɛnɛ lɛ? Tsɔsemɔ ni suɔmɔ yɔɔ mli ni jajeɔ jwɛŋmɔ lɛ kɛ tsui lɛ he hiaa amɛ be fɛɛ be. Tsɔsemɔi sɔrɔtoi he hiaa gbekɛbii sɔrɔtoi. Kɛ suɔmɔ kanya enɛ lɛ, bei pii lɛ abaanyɛ atsɔ̃ sane hesusumɔ nɔ akɛ tsɔsemɔ aha. No hewɔ ni akɛɔ wɔ yɛ Abɛi 8:33 akɛ “nyɛboa tsɔsemɔ toi” lɛ. Shi, mɛi komɛi yɛ ni “wiemɔi kɛkɛ ejajeee” amɛ. Kɛha amɛ lɛ, toigbele he toigbalamɔ ni sa ni akɛhãa yɛ be kɛ bei amli, ni akɛhãa kɛyashɛɔ he ni sa lɛ he baahia. (Abɛi 17:10; 23:13, 14; 29:19, NW) Biblia lɛ emaaa mlifu ni akɛyiɔ mɔ, loo yii ni naa wa tsɔ̃, ni baanyɛ apila loo aye gbekɛ lɛ awui lɛ nɔ mi yɛ nɔ ni ejieɔ yi ehãa nɛɛ mli. (Abɛi 16:32) Shi moŋ, esa akɛ gbekɛ lɛ anu nɔ hewɔ ni ajajeɔ lɛ lɛ shishi, ni enu he akɛ ejɛ fɔlɔ ni sumɔɔ esane lɛ hewɔ.—Okɛto Hebribii 12:6, 11 he.
Áwie Biblia mli ŋaawoo kpakpa ni anyɛɔ atsuɔ he nii nɛɛ he yɛ wolo ni ji Nɔ Diɛŋtsɛ ni Kɛ Weku Miishɛɛ Baa lɛ mli.