Sanebimɔi ni Jɛ Kanelɔi Adɛŋ

Ani Yesu wiemɔi ni yɔɔ Mateo 19:10-12 lɛ tsɔɔ akɛ mɛi ni kpɛɔ amɛyiŋ akɛ amɛbaahi shi akɛ oshijafoi lɛ ená oshijayeli akɛ nikee nii yɛ naakpɛɛ gbɛ nɔ?

▪ Susumɔ nɔ ni ba ni ha Yesu wie oshijayeli he lɛ he okwɛ. Beni Farisifoi lɛ ba Yesu ŋɔɔ ni amɛbabi lɛ yooshwiemɔ he sane lɛ, eha amɛle Yehowa susumɔ yɛ gbalashihilɛ he. Eyɛ mli akɛ Mla lɛ ŋmɛɔ gbɛ ni nuu aha eŋa shwiemɔ wolo kɛ́ ena “hiɛgbejianii ko” yɛ eŋa lɛ he moŋ, shi jeee nakai eji kɛjɛ shishijee. (5 Mose 24:1, 2) No sɛɛ lɛ, Yesu kɛɛ akɛ: “Mɔ fɛɛ mɔ ni jeee ajwamaŋbɔɔ hewɔ jɛ ni eeeshwie eŋa ni eyawɛ yoo kroko lɛ, efite gbala.”—Mat. 19:3-9.

Beni ekaselɔi lɛ nu enɛ lɛ, amɛkɛɛ akɛ: “Kɛji nɛkɛ nuu kɛ eŋa sane yɔɔ lɛ, belɛ ehiii akɛ awɛɔ yoo mɔ.” Yesu to he akɛ: “Jeee mɛi fɛɛ aaanyɛ wiemɔ nɛɛ mli amɔ, ja mɛi ni aŋɔha lɛ kɛkɛ. Ejaakɛ osaii komɛi yɛ ni afɔ amɛ nakai kɛjɛ amɛnyɛmɛi amusu mli; ni osaii lɛ ekomɛi yɛ ni gbɔmɛi sa amɛ; ni osaii lɛ ekrokomɛi hu yɛ ni ŋwɛi maŋtsɛyeli lɛ hewɔ amɛ diɛŋtsɛ amɛsa amɛhe. Mɔ ni aaanyɛ mli amɔ lɛ, ha emɔ mli.”—Mat. 19:10-12.

Mɛi ni ji osaii diɛŋtsɛ lɛ ji mɛi ni afɔ amɛ nakai yɛ fɔmɔŋ naagba ko hewɔ, loo amɛná yɛ oshara ko hewɔ, loo gbɔmɛi ni sa amɛ. Shi mɛi komɛi yɛ ni amɛ diɛŋtsɛ amɛfee amɛhe osaii. Eyɛ mli akɛ amɛbaanyɛ amɛbote gbalashihilɛ mli moŋ, shi amɛye amɛhe nɔ, ni amɛhi shi akɛ oshijafoi yɛ “ŋwɛi maŋtsɛyeli lɛ hewɔ.” Taakɛ Yesu fee lɛ, amɛkpɛɔ amɛyiŋ akɛ amɛbaahi shi akɛ oshijafoi bɔni afee ni amɛná be babaoo amɛha Maŋtsɛyeli sɔɔmɔ nitsumɔ lɛ. Amɛnáaa oshijayeli akɛ nikee nii kɛjɛɛɛ fɔmɔ mli, ni jeee mɔ ko hu ni ha amɛná. Amɛ diɛŋtsɛ amɛmɔ mli. Ni tsɔɔ akɛ amɛ diɛŋtsɛ amɛŋɔ nakai nikee nii lɛ amɛha amɛhe.

Beni bɔfo Paulo wieɔ nɔ ni Yesu wie lɛ nɔŋŋ he babaoo lɛ, etsɔɔ mli akɛ Kristofoi fɛɛ—oshijafoi kɛ gbalashihilɛ mli bii—baanyɛ asɔmɔ Nyɔŋmɔ yɛ gbɛ kpakpa nɔ, shi oshijafoi ni ‘ekpɛ mli nɛkɛ yɛ amɛ diɛŋtsɛ amɛtsui mli’ yɛ he lɛ ‘baafee jogbaŋŋ fe nakai.’ Mɛni hewɔ? Esa akɛ gbalashihilɛ mli bii aná be amɛha amɛhe, ni amɛkɛ amɛhewalɛ atsu amɛhiamɔ nii ahe nii. Nɔ ni tamɔɔɔ nakai lɛ, Kristofoi ni ji oshijafoi lɛ baanyɛ amɛtu amɛhe fɛɛ amɛha Nuŋtsɔ lɛ nitsumɔ lɛ ní amɛtsuuu sɔ̃ ko ni tamɔ nakai he nii. Amɛnaa amɛshihilɛ lɛ akɛ ‘duromɔkeenii’ ni jɛ Nyɔŋmɔ ŋɔɔ.—1 Kor. 7:7, 32-38.

No hewɔ lɛ, Ŋmalɛ lɛ haa wɔnaa faŋŋ akɛ, Kristofonyo ko náaa oshijayeli akɛ nikee nii yɛ naakpɛɛ gbɛ nɔ. Yɛ no najiaŋ lɛ, lɛ diɛŋtsɛ ehiɔ shi oshija koni enyɛ etsu Maŋtsɛyeli lɛ nitsumɔ lɛ ni nɔ ko wooo enajiaŋ. Ŋmɛnɛ lɛ, mɛi pii ekpɛ mli akɛ amɛbaahi shi akɛ oshijafoi yɛ yiŋtoo nɛɛ hewɔ, ni ehi akɛ mɛi krokomɛi aaawo amɛ hewalɛ ni amɛfee nakai.