NIKASEMƆ 2

Hã Efee Sanegbaa

2 Korintobii 2:17

NƆ NI ESA AKƐ OFEE: Wiemɔ tamɔ bɔ ni owieɔ kɛ́ oogba sane, ní owie yɛ gbɛ ni baahã otoibolɔi lɛ ana akɛ oheɔ nɔ ni owieɔ lɛ oyeɔ, ni osusuɔ amɛhe lɛ nɔ.

BƆ NI OBAAFEE LƐ OHÃ:

Saamɔ ohe jogbaŋŋ, ni osɔle hu. Sɔlemɔ koni onyɛ okɛ ojwɛŋmɔ ama osane lɛ nɔ, moŋ fe ekolɛ otsui ni baafã lɛ nɔ. Hã ojwɛŋmɔ ahi otii ni obaawie he lɛ anɔ. Kaakpe wiemɔi lɛ owo oyitsoŋ; wiemɔ lɛ bɔ ni bo diɛŋtsɛ obaawie lɛ ohã.

Kɛ́ okpɛ mli akɛ obaakane nɔ ko yɛ Biblia lɛ loo wolo kroko mli lɛ, saamɔ ohe jogbaŋŋ koni onaa akatɛrɛ shi. Kɛ́ ookane mɔ ko naa sane lɛ, kanemɔ ni henumɔi lɛ aje kpo, shi kaawo he.
Jɛɛ otsuiŋ owie. Susumɔ nɔ hewɔ ni sane lɛ he hiaa otoibolɔi lɛ he. Hã ojwɛŋmɔ ahi amɛnɔ. Kɛkɛ lɛ oshidaamɔ, oninefɔɔ, kɛ bɔ ni ofeɔ ohiɛ ohãa lɛ baahã amɛna akɛ nɔ ni owieɔ lɛ jɛ otsuiŋ, ni oyɛ amɛhe miishɛɛ.

Wiemɔ tamɔ bɔ ni owieɔ kɛ́ oogba sane lɛ, shi okɛ nibii akafee shwɛmɔ. Kɛ́ owie wiemɔi ni mli kã shi faŋŋ, ni okɛ nyɛwiemɔ lɛ he mlai hu tsu nii lɛ, ebaahã bulɛ ahi nɔ ni owieɔ lɛ he.
Kwɛmɔ otoibolɔi lɛ ahiɛ. Hã ohiŋmɛi ama otoibolɔi lɛ anɔ, kɛ́ nakai feemɔ jeee naagba yɛ he ni oyɔɔ lɛ. Kɛ́ oohã wiemɔ lɛ, kwɛmɔ aŋkroaŋkroi ahiɛ, moŋ fe nɔ ni obaakwɛ kuu muu lɛ fɛɛ hiɛ, loo ni obaahã ohiŋmɛii afolɔ shi kɛkɛ yɛ tsũ lɛ mli.