“Be Ni Mikwɛɔ Bɔɔ Nii Ni Hiɛ Kamɔ Lɛ”

Ekã shi faŋŋ akɛ, Ezekiel na tsina kɛ jata amagai wuji ni yɔɔ fiji kɛ gbɔmɛi ayitsei mamɔ maŋtsɛmɛi ashĩai kɛ jamɔhei ahiɛ ni akɛmiibu hei nɛɛ ahe. Amagai ni tamɔ nɛkɛ lɛ ebu yɛ blema Asiria kɛ Babilon fɛɛ. Eeenyɛ efee akɛ Ezekiel kwɛ amagai wuji nɛɛ ní ekomɛi akwɔlɔmɔ miihe ashɛ mitai 6 lɛ ni enaa kpɛ ehe, tamɔ bɔ ni eji yɛ mɛi fɛɛ ni naa amagai nɛɛ agbɛfaŋ lɛ. Fɛɛ sɛɛ lɛ, ekɔɔɔ he eko bɔ ni amagai nɛɛ ahe yɔɔ gbeyei hã lɛ, amɛji tɛi ni akpɛ́ ni wala bɛ amɛmli.

Shi bɔɔ nii ejwɛ lɛ ni Ezekiel na yɛ eninaa lɛ mli lɛ ji “bɔɔ nii ni hiɛ kamɔ.” Esoro amɛ kwraa! Ninaa nɛɛ ná Ezekiel nɔ hewalɛ aahu akɛ, etsĩ wiemɔi ni ji “bɔɔ nii ni hiɛ kamɔ” lɛ atã aaafee shii 11 sɔŋŋ yɛ egbalɛ lɛ shishijee wiemɔi lɛ amli. (Eze. 1:5-22) Bɔ ni bɔɔ nii ejwɛ ni hiɛ kamɔ lɛ yaa he kome yɛ be kome too mli yɛ Nyɔŋmɔ maŋtsɛ sɛi lɛ shishi lɛ, hã Ezekiel ná nɔmimaa diɛŋtsɛ akɛ, Yehowa ji mɔ ni kudɔɔ bɔɔ nii lɛ fɛɛ. Ŋmɛnɛ lɛ, nakai ninaa lɛ nɔŋŋ hãa wɔhiɛ sɔɔ Yehowa dalɛ lɛ kɛ ehewalɛ lɛ, kɛ bɔ ni enɔyeli lɛ je agbo ehã lɛ waa.​—1 Kro. 29:11.