Saji Ni Atsɛ Yisɛɛ Yɛ Wɔshiɛmɔ Kɛ Wɔshihilɛ Kpee Nifeemɔ Wolo Lɛ Mli
MARCH 1-7
NYƆŊMƆ WIEMƆ LƐ MLI JWETRII | 4 MOSE 7-8
“Nɔ Ni Wɔbaanyɛ Wɔkase Yɛ Israel Nsara Lɛ He”
it-1 497 kk. 3
Asafo
Yɛ Israel lɛ, bei pii lɛ, ahalaa mɛi komɛi koni amɛdamɔ maŋbii lɛ najiaŋ amɛtsu saji komɛi ahe nii. (Ezr 10:14) Hewɔ lɛ, be ni ashĩ sɔlemɔ buu lɛ ama shi lɛ, “Israel wekunukpai lɛ” kɛ nibii bahã. (4Mo 7:1-11) Agbɛnɛ hu, osɔfoi lɛ, Levibii lɛ, kɛ “maŋbii lɛ ahiɛnyiɛlɔi lɛ” kɛ niianaasɔomɔnɔ sɔo “kpaŋmɔ ni mli wa” ni maŋbii lɛ kpaŋ yɛ Nehemia beiaŋ lɛ naa.—Ne 9:38–10:27.
it-2 796 kk. 1
Ruben
Yɛ Israel nsara lɛ mli lɛ, Ruben, Simeon kɛ Gad wekui lɛ, bɔ nsara yɛ sɔlemɔ buu lɛ wuoyigbɛ. Kɛ́ Israel nsara lɛ miifã lɛ, kuu ni wekui etɛ yɔɔ mli nɛɛ ni Ruben weku lɛ nyiɛɔ hiɛ lɛ fãa kɛnyiɛɔ Yuda, Isakar, kɛ Zebulon kuu lɛ sɛɛ. (4Mo 2:10-16; 10:14-20) Hewɔ lɛ, gbi ni agbele sɔlemɔ buu lɛ naa, ni wekui lɛ kɛ amɛnikeenii ni akɛbaashã afɔle lɛ bahã lɛ, Yuda, Isakar, kɛ Zebulon wekui lɛ kɛ amɛnɔ lɛ bahã dani Ruben, Simeon, kɛ Gad wekui lɛ kɛ amɛnɔ lɛ bahã.—4Mo 7:1, 2, 10-47.
Pɛimɔ Ŋmalɛi Lɛ Amli Jogbaŋŋ
it-1 835
Kromɔbi
Yɛ Israel lɛ, akɛni hii ni ji kromɔbii lɛ ji mɛi ni baafee shĩai lɛ awekunukpai hewɔ lɛ, amɛdamɔ shi kɛhã maŋ muu lɛ fɛɛ. Yɛ kpaŋmɔ ni Yehowa kɛ Abraham kpaŋ lɛ hewɔ lɛ, etsɛ Israel maŋ muu lɛ fɛɛ akɛ ‘ekromɔbi.’ (2Mo 4:22) Akɛni Yehowa here Israelbii ni ji kromɔbii lɛ ayiwala hewɔ lɛ, efã akɛ afee ‘kromɔbi fɛɛ kromɔbi ni ji nuu yɛ Israelbii lɛ ateŋ, gbɔmɔ jio, kooloo jio,’ krɔŋkrɔŋ ahã lɛ. (2Mo 13:2) No hewɔ lɛ, ajɔɔ kromɔbii ni ji hii lɛ anɔ ahã Nyɔŋmɔ.
MARCH 8-14
NYƆŊMƆ WIEMƆ LƐ MLI JWETRII | 4 MOSE 9-10
“Bɔ Ni Yehowa Nyiɛɔ Ewebii Lɛ Ahiɛ”
it-1 398 kk. 3
Nsara
Bɔ ni Israel nsara ni da waa lɛ nyɛɔ efãa kɛjɛɔ he kome kɛyaa he kroko lɛ tsɔɔ akɛ, ato he gbɛjianɔ jogbaŋŋ (Mose bɔ amaniɛ yɛ 4 Mose yitso 33 lɛ akɛ, amɛfã aaafee shii 40 sɔŋŋ). Gbii abɔ ni atatu lɛ yɔɔ sɔlemɔ buu lɛ nɔ lɛ, amɛfãaa. Be fɛɛ be ni atatu lɛ baawó ehe nɔ lɛ, nsara lɛ fãa. “Yehowa famɔ naa amɛbɔɔ nsara yɛ, ni Yehowa famɔ naa amɛfãa yɛ.” (4Mo 9:15-23) Atsɔɔ tɛtɛrɛmantɛrɛi enyɔ ni akɛ hamlɛ etswia jwiɛtɛi kɛfee nɔ, akɛ Yehowa fãmɔi lɛ hãa Israel nsara lɛ.—4Mo 10:2, 5, 6.
Pɛimɔ Ŋmalɛi Lɛ Amli Jogbaŋŋ
it-1 199 kk. 3
Kpee
Nɔ Hewɔ Ni Ehe Hiaa Ni Akpe. Mla ni awo yɛ Hehoo gbi jurɔ ni aye daa afi lɛ he lɛ hãa wɔnaa akɛ, esaaa akɛ wɔkɛ gbɛjianɔ ni Yehowa eto koni wɔkpe ni etsɔɔ wɔ gbɛ lɛ shwɛɔ kwraa. Mla lɛ bi ni agbe nuu fɛɛ nuu ni he tse ni eyako he ko shɔŋŋ, shi eyeee Hehoo lɛ. (4Mo 9:9-14) Be ni Maŋtsɛ Hezekia fɔ̃ mɛi ni yɔɔ Yuda kɛ Israel lɛ nine koni amɛba Yerusalem amɛbaye Hehoo lɛ, ekɛɛ amɛ akɛ: ‘Israelbii, nyɛkua nyɛsɛɛ kɛbaa Yehowa ŋɔɔ, nyɛkafea nyɛhe kuɛŋtilɔi tamɔ nyɛtsɛmɛi lɛ. Nyɛboa Yehowa toi, ni nyɛbaa esɔlemɔtsu ni efee lɛ krɔŋkrɔŋ kɛmiiya naanɔ lɛ mli, ni nyɛsɔmɔ Yehowa, nyɛ-Nyɔŋmɔ lɛ, koni emlifu ni naa wa lɛ aje nyɛnɔ. Musuŋtsɔlɔ kɛ mɔbɔnalɔ ji Yehowa, nyɛ-Nyɔŋmɔ lɛ, ni kɛ́ nyɛku nyɛsɛɛ kɛba eŋɔɔ lɛ, etsɔŋ ehiɛ etoŋ afã.’ (2Kr 30:6-9) Kɛ́ mɔ ko je gbɛ eku ehiɛ efɔ̃ kpee nɛɛ nɔ lɛ, belɛ, eje Nyɔŋmɔ sɛɛ. Abiii ni Kristofoi aye Hehoo lɛ kɛ gbii juji krokomɛi ni Israelbii lɛ ye lɛ moŋ, shi esa jogbaŋŋ akɛ Paulo wo Kristofoi hewalɛ ni amɛkpe daa akɛ Nyɔŋmɔ webii, ewie akɛ: “Nyɛhãa wɔteŋ mɔ fɛɛ mɔ asusua enyɛmi he bɔ ni afee ni wɔteŋ mɔ fɛɛ mɔ akanya enyɛmi koni wɔjie suɔmɔ kpo ni wɔtsu nitsumɔi kpakpai, ni wɔkakpa kpe ni wɔkpeɔ kutuu lɛ, tamɔ bɔ ni eji mɛi komɛi asu lɛ, shi moŋ wɔteŋ mɔ fɛɛ mɔ awo enyɛmi hewalɛ, ni titri lɛ, akɛni nyɛmiina akɛ gbi lɛ miibɛŋkɛ nɛɛ.”—Heb 10:24, 25.
MARCH 15-21
NYƆŊMƆ WIEMƆ LƐ MLI JWETRII | 4 MOSE 11-12
“Nɔ Hewɔ Ni Esaaa Akɛ Wɔwieɔ Nii Ahe Nyanyaanya”
it-2 719 kk. 4
Béi
Huhuuhuwiemɔ. Huhuuhuwiemɔ baanyɛ ahã mɛi anijiaŋ aje wui, ni ekumɔ amɛtsui. Be ni Israelbii lɛ shi Ejipt lɛ sɛɛ etsɛɛɛ lɛ, amɛwie huhuuhu amɛshi Mose kɛ Aaron, mɛi ni Yehowa ehala ni amɛnyiɛ amɛhiɛ lɛ, ni no tsɔɔ akɛ, amɛwie amɛshi Yehowa. (2Mo 16:2, 7) Sɛɛ mli lɛ, amɛhuhuuhuwiemɔ lɛ je Mose nijiaŋ wui aahu akɛ, ebi ni Yehowa agbe lɛ. (4Mo 11:13-15) Mɔ ni wieɔ huhuuhu lɛ wala baanyɛ aje edɛŋ. Yehowa na mɛi ni wie huhuuhu amɛshi Mose lɛ akɛ amɛmiitse lɛ, Yehowa, amɛ-Hiɛnyiɛlɔ lɛ, hiɛ atua. (4Mo 14:26-30) Mɛi babaoo gboi yɛ huhuuhuwiemɔ hewɔ.
Pɛimɔ Ŋmalɛi Lɛ Amli Jogbaŋŋ
it-2 309
Mana
Bɔ Ni Eyɔɔ. Mana lɛ “yɛɔ tamɔ korianda wui,” ni “etamɔ” bedola ama; bedola ama su tamɔ adiagba ni anyɛɔ anaa mli, shi enyɛɔ esereɔ tamɔ wo agbaku. Eŋɔɔmɔ “tamɔ keeki tɛtrɛbii ni akɛ wo eshwie nɔ” loo “keeki ni akɛ mu shã.” Awiɛɔ mana lɛ yɛ wiɛtɛ nɔ loo ashiɔ yɛ tso mli, ni no sɛɛ lɛ, ahoɔ loo abɔɔ ni ashãa.—2Mo 16:23, 31; 4Mo 11:7, 8.
MARCH 22-28
NYƆŊMƆ WIEMƆ LƐ MLI JWETRII | 4 MOSE 13-14
Pɛimɔ Ŋmalɛi Lɛ Amli Jogbaŋŋ
it-1 740
Shikpɔŋ Ni Nyɔŋmɔ Kɛhã Israel Lɛ
EJI anɔkwale akɛ, shikpɔŋ ni Nyɔŋmɔ kɛhã Israelbii lɛ ji shikpɔŋ kpakpa. Mose tsu mɛi koni amɛyakpá Shiwoo Shikpɔŋ shi, ni amɛkɛ enɔ yibii lɛ eko aba. Be ni amɛku amɛsɛɛ lɛ, amɛkɛ agbamii, pomegranetii, kɛ wain yibii kusha kome, ni da aahu akɛ, hii lɛ ateŋ mɛi enyɔ kɛ tso wo mli ni amɛkɛwó! Eyɛ mli akɛ hemɔkɛyeli ni amɛbɛ lɛ hewɔ lɛ, amɛshe gbeyei moŋ, shi amɛbabɔ amaniɛ akɛ: “Anɔkwa, mliki kɛ wo miiho” yɛ shikpɔŋ lɛ nɔ.—4Mo 13:23, 27.
APRIL 5-11
NYƆŊMƆ WIEMƆ LƐ MLI JWETRII | 4 MOSE 17-19
Pɛimɔ Ŋmalɛi Lɛ Amli Jogbaŋŋ
g02 6/8 14 kk. 2
Ŋoo—Nɔ Ko Ni He Hiaa Waa
Akɛ ŋoo feɔ nɔ ko ni tsakeee, ni hiɔ shi daa lɛ he mfoniri. No hewɔ lɛ, yɛ Biblia lɛ mli lɛ, kɛ́ mɛi kpaŋ kpaŋmɔ ni baahi shi daa lɛ, atsɛɔ lɛ “ŋoo kpaŋmɔ,” ni bei pii lɛ, mɛi ni kpaŋɔ kpaŋmɔ lɛ feɔ ekome kɛyeɔ nii ni ŋoo yɛ mli kɛsɔoɔ kpaŋmɔ lɛ naa. (4 Mose 18:19) Mose Mla lɛ bi ni akɛ ŋoo afata afɔle ni ashãa yɛ afɔleshaa latɛ lɛ nɔ lɛ he, ni no tsɔɔ faŋŋ akɛ, afɔle lɛ fiteŋ.
APRIL 12-18
NYƆŊMƆ WIEMƆ LƐ MLI JWETRII | 4 MOSE 20-21
“Kɛ́ Aasu Otsui Po Lɛ, Yaa Nɔ Ofee Mɔ Ni He Jɔ”
w09 9/1 19 kk. 5
Kojolɔ Ni Tsɔɔɔ Sane Hiɛ Ebuuu Shi Kɔkɔɔkɔ
Klɛŋklɛŋ lɛ, Nyɔŋmɔ fãko Mose ni ekɛ maŋbii lɛ awie, aahu ni ebaatsɛ amɛ atuatselɔi. Nɔ ni ji enyɔ lɛ, Mose kɛ Aaron wooo Nyɔŋmɔ hiɛ nyam. Nyɔŋmɔ wie akɛ: “Nyɛfeee mi krɔŋkrɔŋ.” (4 Mose 20:12) Wiemɔ ni Mose wie akɛ, ‘wɔbaajie nu wɔhã nyɛ’ lɛ tsɔɔ akɛ, lɛ kɛ Aaron ni baatsɔ naakpɛɛ gbɛ nɔ amɛhã Israelbii lɛ nu, shi jeee Nyɔŋmɔ. Nɔ ni ji etɛ lɛ, toigbalamɔ ni akɛhã amɛ lɛ tamɔ nɔ ni akɛhã Israelbii ni tse Nyɔŋmɔ hiɛ atua lɛ nɔŋŋ. Nyɔŋmɔ hãaa mɛi nɛɛ aya Kanaan shikpɔŋ lɛ nɔ, ni nakai nɔŋŋ efee yɛ Mose kɛ Aaron gbɛfaŋ. (4 Mose 14:22, 23) Nɔ ni ji ejwɛ lɛ, Mose kɛ Aaron ji Israel hiɛnyiɛlɔi. Mɛi ni Nyɔŋmɔ etuu babaoo ewo amɛdɛŋ lɛ, ebaabi babaoo shi yɛ amɛdɛŋ.—Luka 12:48.
APRIL 19-25
NYƆŊMƆ WIEMƆ LƐ MLI JWETRII | 4 MOSE 22-24
“Yehowa Hã Loomɔ Ko Tsɔ Jɔɔmɔ”
it-2 291
Sɛkɛyeli
Shi Ni Ateɔ Awoɔ Yehowa Lɛ Ji Sɛkɛyeli. Gbalɔ Bileam buulu gbe lɛ ni eka akɛ ebaagba eshi Israel koni Moab maŋtsɛ Balak ahã lɛ shika, shi Yehowa eŋmɛɛɛ lɛ gbɛ. Bɔfo Petro ŋma yɛ Bileam he akɛ, “nitsumɔ kooloo ni leee wiemɔ lɛ kɛ gbɔmɔ gbee wie kɛtsĩ sɛkɛyeli gbɛ ni gbalɔ lɛ kɔ lɛ naa.”—2Pe 2:15, 16; 4Mo 22:26-31.
APRIL 26–MAY 2
NYƆŊMƆ WIEMƆ LƐ MLI JWETRII | 4 MOSE 25-26
Pɛimɔ Ŋmalɛi Lɛ Amli Jogbaŋŋ
it-1 359 kk. 1-2
Husu
Etamɔ nɔ ni adamɔ nibii enyɔ nɔ aja shikpɔŋ lɛ ahã wekui lɛ: bɔ ni oshiki ni afɔ̃ lɛ naa yakpa hã, kɛ weku lɛ dalɛ. Oshikifɔ̃ɔ lɛ hã ana he ni weku fɛɛ weku baaná eshikpɔŋ yɛ, kɛ́ yɛ kooyigbɛ loo wuoyigbɛ jio, bokãgbɛ loo anaigbɛ jio, ŋshɔnaagbɛ loo hei ni gɔji yɔɔ jio. Bɔ ni oshiki ni afɔ̃ lɛ naa yakpa hã lɛ jɛ Yehowa ŋɔɔ, ni no hewɔ lɛ, ehãaa awuŋayeli loo béi ate shi yɛ wekui lɛ ateŋ. (Abɛ 16:33) Nyɔŋmɔ tsɔ nɛkɛ gbɛ nɔ ekudɔ saji koni gbalɛ ni ekɛ mumɔ tsirɛ blematsɛ Yakob ni egba yɛ weku fɛɛ weku he be ni eshwɛ fioo ni ebaagbo lɛ aba mli, ni aŋma gbalɛ nɛɛ yɛ 1 Mose 49:1-33.
Be ni oshikifɔ̃ɔ lɛ ehã ana he ni weku fɛɛ weku baaná eshikpɔŋ yɛ lɛ, no sɛɛ lɛ, adamɔɔ weku fɛɛ weku dalɛ nɔ atsɔɔ he ni eshikpɔŋ lɛ naa baayawa. Afã amɛ akɛ: “Nyɛfɔ̃a oshiki kɛjaa shikpɔŋ lɛ nyɛhãa nyɛwekui lɛ akɛ amɛgbɛfaŋnɔ. Kui ni dara lɛ, nyɛhãa amɛgboshinii lɛ afaa, ni kui ni daraaa lɛ, nyɛtsea amɛgboshinii lɛ nɔ. Mɔ fɛɛ mɔ lɛ, he ni eshiki lɛ baagbee lɛ, jɛmɛ baatsɔ egboshinii.” (4Mo 33:54) Atsakeee he ni oshikifɔ̃ɔ lɛ hã ana akɛ weku fɛɛ weku baaná eshikpɔŋ yɛ lɛ, shi atsake he ni wekui lɛ ekomɛi ashikpɔji anaa yawaa. Enɛ hewɔ lɛ, be ni ana akɛ Yuda weku lɛ shikpɔŋ lɛ da tsɔ lɛ, akɛ shikpɔji komɛi ni yɔɔ enɔ lɛ mli lɛ, hã Simeon weku lɛ.—Yos 19:9.