Saji Ni Atsɛ Yisɛɛ Yɛ Wɔshiɛmɔ Kɛ Wɔshihilɛ Kpee Nifeemɔ Wolo Lɛ Mli
JANUARY 10-16
NYƆŊMƆ WIEMƆ LƐ MLI JWETRII | KOJOLƆI 17-19
“Kɛ́ Wɔgbo Nyɔŋmɔ Mla Lɛ Nɔ Toi Lɛ, Wɔkɛ Naagbai Baakpe”
it-2 390-391
Mika
1. Eji Efraimnyo. Mika ju emami jwiɛtɛi kapɛji 1,100, ni tsɔɔ akɛ, eku Kitãi Nyɔŋma lɛ mli nɔ ni ji kpaanyɔ nɔ lɛ mli. (2Mo 20:15) Be ni ewie anɔkwale ni ekɛ shika lɛ ku sɛɛ ehã emami lɛ, emami wie akɛ: “Majɔɔ jwiɛtɛi ni yɔɔ midɛŋ lɛ nɔ mahã Yehowa kɛ̃, koni mibinuu lɛ kɛfee amaga ni agbɔ kɛ dade amaga. Agbɛnɛ, mikɛmiihã bo ekoŋŋ.” Yoo nɛɛ kɛ jwiɛtɛi kapɛji 200 yahã jwiɛtɛi sɔ̃lɔ, ni ekɛfee “amaga ni agbɔ kɛ dade amaga,” ni akɛtee Mika shĩa lɛ. No mli lɛ, Mika “yɛ shĩa ko ni ji nyɔŋmɔi ashĩa,” ni efee efɔd kɛ terafim amagai, ni ewó ebihii lɛ ateŋ mɔ kome osɔfo koni esɔmɔ ehã lɛ. Eyɛ mli akɛ amɛkɛɛ amɛmiifee enɛ kɛwo Yehowa hiɛ nyam moŋ, shi esaaa kwraa, ejaakɛ ekuɔ kitã akɛ akajá amaga lɛ mli (2Mo 20:4-6) kɛ famɔ ni Yehowa kɛhã akɛ atsɔ osɔfoi ni ehala lɛ anɔ ajá lɛ yɛ he ni sɔlemɔ buu lɛ yɔɔ lɛ hu. (Koj 17:1-6; 5Mo 12:1-14) Sɛɛ mli lɛ, Mika yaŋɔ oblanyo ko ni eji Levinyo ni atsɛɔ lɛ Yonatan lɛ kɛba eshĩa, ni ebɔ lɛ apaa koni ebasɔmɔ akɛ osɔfo ehã lɛ. Yonatan ji Mose binuu Gershom seshinyo. (Koj 18:4, 30) Mika yasusu akɛ efee nɔ ko ni sa, hewɔ lɛ ekɛɛ akɛ: “Agbɛnɛ, mile akɛ Yehowa kɛ mi baaye jogbaŋŋ.” (Koj 17:7-13) Shi Yonatan jeee Aaron seshinyo, ni no hewɔ lɛ, esaaa mɔ ni sɔmɔɔ akɛ osɔfo, ni enɛ fite Mika sane lɛ kwraa.—4Mo 3:10.
it-2 391 kk. 2
Mika
Enɛ sɛɛ etsɛɛɛ lɛ, Mika kɛ hii komɛi tiu Danbii lɛ. Be ni amɛyanina Danbii lɛ, ni abi Mika nɔ hewɔ ni amɛnyiɛ amɛsɛɛ lɛ, ewie akɛ: “Nyɛbaloo minyɔŋmɔi ni mifee lɛ, ni nyɛbamɔ osɔfo lɛ hu kɛtee. Mɛni shwɛɔ mi?” Kɛkɛ ni Danbii lɛ kɛɛ Mika kɛ ewebii lɛ akɛ, kɛ́ amɛleee be ni amɛtee nɔ amɛnyiɛ amɛsɛɛ ni amɛwó amɛgbee nɔ lɛ, amɛbaatutua amɛ. Be ni Mika na akɛ Danbii lɛ ahe wa fe lɛ kɛ mɛi ni fata ehe lɛ, eku esɛɛ etee shĩa.—Koj 18:22-26.
JANUARY 31–FEBRUARY 6
NYƆŊMƆ WIEMƆ LƐ MLI JWETRII | RUT 3-4
“Feemɔ Gbɛ́i Kpakpa Ohã Ohe, Ni Kaafite Lɛ”
“Yoo Ni Nɔ Bɛ”
Boaz wie, ni ekã shi faŋŋ akɛ, naajɔlɛ gbee ni ekɛwie lɛ shɛje Rut mii. Ewie akɛ: “Yehowa ajɔɔ bo, mibiyoo. Nibii ni ofee tsutsu lɛ tsɔɔ akɛ oyɛ suɔmɔ, shi nɔ ni ofee amrɔ nɛɛ hãa anaa osuɔmɔ lɛ faŋŋ fe tsutsu lɛ po, ejaakɛ oyanyiɛɛɛ oblahii asɛɛ, ohiafoi jio, niiatsɛmɛi jio.” (Rut 3:10) Nibii ni Rut fee “tsutsu lɛ” kɔɔ suɔmɔ ni tsakeee ni ejie kpo etsɔɔ Naomi akɛni ekɛ lɛ eku esɛɛ kɛba Israel ni eekwɛ lɛ hewɔ lɛ he. Boaz na akɛ, kulɛ ewaaa akɛ Rut baayatao wu yɛ oblahii lɛ ateŋ, ohiafoi jio, niiatsɛmɛi jio. Moŋ lɛ, eesumɔ ni efee Naomi kɛ ewu ni egbo lɛ fɛɛ ekpakpa, koni nuu lɛ gbɛ́i akalaaje yɛ Israel. Ni no ji nɔ ni Boaz wie he akɛ Rut efee “amrɔ nɛɛ.” Ebɛ naakpɛɛ mɔ akɛ bɔ ni oblayoo nɛɛ fóoo lɛ pɛ enɔ mli lɛ ta Boaz tsuiŋ waa.
“Yoo Ni Nɔ Bɛ”
Ekã shi faŋŋ akɛ, wiemɔ ni Boaz wie akɛ mɔ fɛɛ mɔ ni yɔɔ maŋ lɛ mli lɛ le akɛ Rut ji “yoo ni nɔ bɛ” lɛ baahã Rut tsui anyɔ emli waa! Ŋwanejee ko bɛ he akɛ, efai shi ni etswa akɛ ebaale Yehowa ni esɔmɔ lɛ lɛ ji nɔ titri ni hã ená gbɛ́i kpakpa lɛ. Agbɛnɛ hu, ejie mlihilɛ kpele kpo etsɔɔ Naomi kɛ emaŋbii lɛ, ni efeee nɔ ko ni baagba amɛnaa, ejaakɛ ejɛ esuɔmɔ mli ehi shi yɛ amɛkusumii ni ekã shi faŋŋ akɛ, eleee he nɔ ko tsɔ lɛ anaa. Kɛ́ wɔná hemɔkɛyeli ni tamɔ Rut nɔ lɛ, wɔnyaŋeŋ mɛi krokomɛi akusumii, ni wɔkɛ amɛ baahi shi jogbaŋŋ. Kɛ́ wɔfee nakai lɛ, fiofio lɛ, wɔ hu mɛi baana wɔ akɛ wɔnɔ bɛ.
“Yoo Ni Nɔ Bɛ”
Boaz kɛ Rut bote gbãla mli. No sɛɛ lɛ, abɔ amaniɛ akɛ: “Yehowa hã ená musu ni efɔ binuu.” Betlehem yei lɛ jɔɔ Naomi, ni amɛjie Rut yi akɛ ehi hã Naomi fe bihii kpawo po. No sɛɛ lɛ, wɔná wɔle akɛ, Rut binuu lɛ seshinyo ji Maŋtsɛ David ni fee gbɛ́i kpele lɛ. (Rut 4:11-22) Ni David hu seshinyo ji Yesu Kristo.—Mateo 1:1.
FEBRUARY 21-27
NYƆŊMƆ WIEMƆ LƐ MLI JWETRII | 1 SAMUEL 6-8
“Namɔ Ji Omaŋtsɛ?”
it-2 163 kk. 1
Nyɔŋmɔ Maŋtsɛyeli
Amɛbi Ni Awó Maŋtsɛ Ni Ji Adesa Ahã Amɛ. Be ni Israelbii lɛ shi Ejipt lɛ sɛɛ aaafee afii 400 lɛ, amɛbi ni awó maŋtsɛ ni ji adesa ahã amɛ, tamɔ bɔ ni jeŋmaji krokomɛi lɛ yɔɔ maŋtsɛmɛi lɛ nɔŋŋ. Be ni Yehowa kɛ Abraham kpaŋ lɛ sɛɛ nɔ ni fe afii 800 ni amɛfee nakai lɛ. Amɛnibimɔ lɛ tsɔɔ akɛ, amɛkpoo Yehowa akɛ amɛnɔ maŋtsɛ. (1Sa 8:4-8) Taakɛ abɔ amaniɛ yɛ Biblia lɛ mli lɛ, yɛ shi ni Nyɔŋmɔ wo Abraham kɛ Yakob lɛ hewɔ lɛ, eja gbɛ akɛ maŋbii lɛ baakpa gbɛ akɛ Nyɔŋmɔ baato maŋtsɛyeli ko shishi. Yiŋtoi ni nyiɛ sɛɛ nɛɛ hu ahewɔ amɛná nakai gbɛkpamɔ lɛ: (1) Gbalɛ ni Yakob gba yɛ Yuda he be ni eshwɛ fioo ni ebaagbo lɛ (1Mo 49:8-10), (2) nɔ ni Yehowa kɛɛ Israelbii lɛ be ni amɛshi Ejipt lɛ sɛɛ lɛ (2Mo 19:3-6), (3) saji komɛi ni yɔɔ Mla kpaŋmɔ lɛ mli (5Mo 17:14, 15), kɛ (4) sane ko yɔɔ nɔ ni Nyɔŋmɔ hã gbalɔ Bileam wie lɛ mli lɛ hu (4Mo 24:2-7, 17). Yoo anɔkwafo Hana, ni ji Samuel mami lɛ, tsĩ gbɛkpamɔ nɛɛ tã yɛ sɔlemɔ mli. (1Sa 2:7-10) Shi no mli lɛ, Yehowa ejieko ‘eteemɔŋ sane krɔŋkrɔŋ’ ni kɔɔ Maŋtsɛyeli lɛ he lɛ he saji lɛ fɛɛ kpo, ni etsɔko be ni eto akɛ ebaato Maŋtsɛyeli nɛɛ shishi, kɛ bɔ ni ebaato nakai nɔyeli lɛ he gbɛjianɔ ehã—kɛji ebaaye nɔ yɛ shikpɔŋ lɛ nɔ loo ebaajɛ ŋwɛi eye nɔ. No hewɔ lɛ, be ni maŋbii lɛ bi ni awó maŋtsɛ ni ji adesa ahã amɛ lɛ, nɔ ni amɛfee lɛ tsɔɔ akɛ amɛye amɛtsui naa sane.