Te Yehowa Baakai Bo Eha Tɛŋŋ?

“MI-NYƆŊMƆ, kaimɔ mi.” Nehemia kpa Nyɔŋmɔ fai shii abɔ kɛ nakai wiemɔi lɛ. (Nehemia 5:19; 13:14, 31) Eji adebɔɔ naa nifeemɔ akɛ kɛ́ gbɔmɛi miina amanehulu waa diɛŋtsɛ lɛ, amɛtsɔɔ amɛhe kɛhaa Nyɔŋmɔ kɛ faikpamɔ wiemɔi ni tamɔ nakai.

Shi kɛlɛ, mɛni yɔɔ gbɔmɛi ajwɛŋmɔ mli kɛ́ amɛbi ni Nyɔŋmɔ akai amɛ lɛ? Eyɛ faŋŋ akɛ, amɛhiɛnɔkamɔ ji akɛ Nyɔŋmɔ baafee babaoo fe amɛgbɛi kɛkɛ ni eeekai. Ŋwanejee ko kwraa bɛ he akɛ, amɛhiɛnɔkamɔ lɛ tamɔ bɔ pɛ ni ojotswalɔi ni agbe amɛ yɛ Yesu masɛi lɛ ateŋ mɔ kome lɛ fee lɛ pɛpɛɛpɛ. Ákɛ mɔ ni tamɔɔɔ mɔ kroko lɛ, mɔnɛ kpa Yesu fai akɛ: “Kaimɔ mi, beni oooba yɛ omaŋtsɛyeli lɛ mli lɛ!” Jeee akɛ eesumɔ ni Yesu akai mɔ ni eji kɛkɛ, shi agbɛnɛ hu, koni efee nɔ ko eha lɛ—koni etee lɛ shi.—Luka 23:42.

Nakai nɔŋŋ Biblia lɛ tsɔɔ akɛ ní Nyɔŋmɔ ‘aaakai’ lɛ tsɔɔ akɛ ni efee nɔ ko pɔtɛɛ. Ákɛ nɔkwɛmɔnɔ lɛ, beni nu afua hà shikpɔŋ nɔ fɛɛ gbii 150 lɛ, “Nyɔŋmɔ kai Noa . . . , ni Nyɔŋmɔ ha kɔɔyɔɔ ko batswa yɛ shikpɔŋ lɛ nɔ, ni nui lɛ bɔi [shibaa, NW].” (1 Mose 8:1) Afii ohai abɔ sɛɛ lɛ, Samson ni Filistibii lɛ shwila lɛ ni amɛwo lɛ kɔsɔŋkɔsɔ lɛ sɔle akɛ: “Yehowa! miikpao fai, kaimɔ mi agbɛnɛ, ni owo mi hewalɛ shikome nɛɛ pɛ kɛkɛ.” Yehowa kai Samson kɛtsɔ hewalɛ ni fe adesai anɔ̃ ni ekɛha lɛ koni enyɛ etɔ owele yɛ Nyɔŋmɔ henyɛlɔi lɛ anɔ. (Kojolɔi 16:28-30) Yɛ Nehemia gbɛfaŋ lɛ, Yehowa jɔɔ emɔdɛŋbɔi lɛ anɔ, ni ato anɔkwa jamɔ shishi yɛ Yerusalem ekoŋŋ.

Bɔfo Paulo ŋma akɛ: “Nibii abɔ ni aŋma ato momo lɛ, wɔ diɛŋtsɛ wɔhe nitsɔɔmɔ hewɔ aŋma ato lɛ, koni wɔkɛ tsuishiŋmɛɛ kɛ ŋmalɛi lɛ amli miishɛjemɔ lɛ aná hiɛnɔkamɔ.” (Romabii 15:4) Kɛ wɔkai Yehowa kɛtsɔ ni wɔɔsumɔ ni wɔfee esuɔmɔnaa nii taakɛ enɔkwa tsuji lɛ fee yɛ blema lɛ nɔ lɛ, wɔbaanyɛ wɔná nɔmimaa akɛ Yehowa baakai wɔ kɛtsɔ yelikɛbuamɔ ni ekɛaaha wɔ koni wɔná wɔhiamɔ nii daa, kɛtsɔ sɛɛfimɔ ni ekɛaaha wɔ beni kaai baa wɔnɔ lɛ nɔ, ní agbɛnɛ, kɛtsɔ ni eeejie wɔ kɛ́ ekɛ kojomɔ ba mɛi ni jáaa Nyɔŋmɔ lɛ anɔ lɛ nɔ.—Mateo 6:33; 2 Petro 2:9.

Ani Obaasumɔ ni Abasara Bo?

Obaanyɛ ona miishɛɛ yɛ jeŋ ni haomɔi yɔɔ mli nɛɛ po mli kɛjɛ Biblia mli anɔkwa nilee ni kɔɔ Nyɔŋmɔ, kɛ e-Maŋtsɛyeli lɛ, kɛ enaakpɛɛ yiŋtoo kɛha adesai ahe lɛ mli. Kɛji obaasumɔ ni ole nibii babaoo aloo ni mɔ ko aba oŋɔɔ ni ekɛ bo afee shia Biblia mli nikasemɔ ni aheee nɔ ko lɛ, ofainɛ ŋmaa kɛya Watch Tower, P. O. Box GP 760, Accra, Ghana, aloo kɛya adrɛs ni atsɔɔ yɛ baafa 30 lɛ mli nɔ ni sa.