nanemɛi jálɔi aaaná lɛ baanyɛ aha mɔ ni etɔ̃ lɛ aná mumɔŋ shidaamɔ ekoŋŋ. Hɛɛ, kɛtsɔ Kristo kpɔmɔ afɔleshaa lɛ nɔ lɛ, mɔ ni eshwa ehe lɛ baanyɛ ebasa ‘Nyɔŋmɔ duromɔ falɛ lɛ naa.’—Efesobii 1:7.

‘Tsui Krɔŋŋ’ kɛ ‘Mumɔ Hee Ko’

Beni David ejaje ehe esha lɛ sɛɛ, eŋmɛɛɛ ehe ehaaa henumɔ ni tsɔɔ akɛ ehe bɛ sɛɛnamɔ. Wiemɔi ni ekɛtsu nii yɛ lalai ni eŋma yɛ esha jajemɔi ahe lɛ tsɔɔ hejɔlɛ ni ená kɛ efai shi ni etswa akɛ ebaasɔmɔ Nyɔŋmɔ yɛ anɔkwayeli mli. Ákɛ nɔkwɛmɔnɔ lɛ, kwɛmɔ Lala 32 lɛ. Wɔkaneɔ yɛ kuku 1 lɛ mli akɛ: “Ajɔɔ mɔ ni aŋɔ enɔtɔmɔ afa lɛ, ni atsimɔ ehe esha nɔ lɛ!” Ekɔɔɔ he eko bɔ ni esha lɛ ji nɔ ni hiɛdɔɔ yɔɔ mli ha lɛ, miishɛɛ baanyɛ ajɛ mli kɛba kɛji mɔ ko ye anɔkwa yɛ ehe shwamɔ lɛ mli. Gbɛ kome ni abaanyɛ atsɔ nɔ ajie nɛkɛ anɔkwayeli nɛɛ kpo yɛ ji kɛtsɔ kpɛlɛmɔ ni mɔ aaakpɛlɛ sɔ̃ ni jɛɔ enifeemɔi amli kɛbaa lɛ nɔ, taakɛ David fee lɛ. (2 Samuel 12:13) Ebɔɔɔ mɔdɛŋ akɛ ebaabu ehe bem yɛ Yehowa hiɛ loo ni ebaabɔ mɔdɛŋ koni eshwa mɛi krokomɛi. Kuku 5 lɛ kɛɛ akɛ: “Mijaje mihe esha mitsɔɔo, ni minɔsha lɛ mikɛteee. Mikɛɛ akɛ: Majaje minɔtɔmɔ matsɔɔ Yehowa! Ni bo lɛ okɛ mihe esha nɔsha lɛ fa mi.” Esha jajemɔ ni jɛ anɔkwayeli mli lɛ kɛ hejɔlɛ baa, bɔni afee ni mɔ ko henilee akaya nɔ eehao lɛ yɛ tsutsu tɔmɔi komɛi ahewɔ.

Be mli ni David ebi Yehowa dɛŋ eshaifaa sɛɛ lɛ, ekɛɛ akɛ: “Nyɔŋmɔ, bɔɔ tsui ni he tse oha mi, ni ofee mumɔ ni fiɔ shi ehee yɛ mimli!” (Lala 51:12) “Tsui ni he tse” kɛ “mumɔ ni fiɔ shi ehee” ni David bi lɛ tsɔɔ akɛ ele esha henumɔ ni yɔɔ emli lɛ ni akɛ Nyɔŋmɔ yelikɛbuamɔ he miihia lɛ koni ekɛtsuu etsui he ní eje shishi ehee. Yɛ nɔ najiaŋ ni ebaaŋmɛɛ ehe eha mɔ nii ni feɔ ehe mɔbɔ lɛ, etswa efai shi akɛ ebaaya nɔ yɛ esɔɔmɔ ni ekɛhaa Nyɔŋmɔ lɛ mli. Esɔle akɛ: “[Oo Yehowa, NW], gbelemɔ minaabu, ni midaa ajaje oyijiemɔ lɛ atsɔɔ!”—Lala 51:17.

Te Yehowa fee enii yɛ David anɔkwa heshwamɔ kɛ faishitswaa ni mɔdɛŋbɔɔ yɔɔ mli akɛ ebaasɔmɔ lɛ lɛ he eha tɛŋŋ? Ekɛ wiemɔi ni haa mɔ tsui nyaa kɛ miishɛɛ nɛɛ hã David akɛ: “Magbele ojwɛŋmɔ mli ni matsɔɔo gbɛ ni onyiɛ nɔ; mawoo ŋaa, mihiŋmɛi kã ohe.” (Lala 32:8) Yehowa diɛŋtsɛ jwɛŋmɔ ni egbalaa kɛyaa mɔ ni eshwa ehe lɛ henumɔi kɛ hiamɔ nii anɔ lɛ he nɔmimaa nɛ. Yehowa fee nii koni eha David sɛɛyoomɔ babaoo, nyɛmɔ ni ekɛaana nii kɛteke

Sanebimɔi ni Jɛ Kanelɔi Adɛŋ

Yɛ bɔ ni Yehowa sumɔɔ ni ekɛ eshai ake kɛtsɔ kpɔmɔ afɔleshaa lɛ jara lɛ nɔ hewɔ lɛ, mɛni hewɔ ni ehe hiaa akɛ Kristofoi ajaje amɛhe eshai amɛtsɔɔ onukpai ni yɔɔ asafo lɛ mli lɛ?

Taakɛ abaanyɛ ana yɛ David kɛ Batsheba sane lɛ mli lɛ, Yehowa kɛ David he esha lɛ ke lɛ yɛ enɔkwa tsuitsakemɔ lɛ hewɔ, eyɛ mli akɛ eji nɔ ni hiɛdɔɔ yɔɔ mli. Beni gbalɔ Natan bɛŋkɛ lɛ lɛ, David jaje yɛ faŋŋ mli akɛ: “Mifee Yehowa shishi esha.”—2 Samuel 12:13.

Shi kɛlɛ, jeee eshafeelɔ esha jajemɔ ni jɛ anɔkwale mli lɛ pɛ Yehowa kpɛlɛɔ nɔ ní ekɛ eshaifaa haa shi moŋ etoɔ gbɛjianɔ ni suɔmɔ yɔɔ mli hu koni ekɛye ebua mɔ ni etɔ̃ lɛ ni eya hiɛ kɛyashɛ mumɔŋ hewalɛnamɔ mli. Yɛ David sane lɛ mli lɛ, yelikɛbuamɔ lɛ ba kɛtsɔ gbalɔ Natan nɔ. Ŋmɛnɛ, yɛ Kristofoi asafo lɛ mli lɛ, wɔyɛ hii ni edara yɛ mumɔŋ, loo onukpai. Kaselɔ Yakobo tsɔɔ mli akɛ: “Kɛ nyɛteŋ mɔ ko he waaa lɛ [yɛ mumɔŋ] lɛ, etsɛ́ asafo lɛ mli onukpai lɛ kɛba eŋɔɔ, ni amɛ́kpa lɛ mu yɛ [Yehowa, NW] lɛ gbɛi amli ni amɛsɔle amɛha lɛ, ni hemɔkɛyeli sɔlemɔ lɛ aaahere helatsɛ lɛ yiwala, ni [Yehowa, NW] lɛ aaatee lɛ shi, ni kɛji efee eshai lɛ, aaaŋɔfa lɛ.”—Yakobo 5:14, 15.

Onukpai ni amɛná niiashikpamɔ lɛ baanyɛ afee babaoo kɛba tsuiŋdɔlɛ ni eshafeelɔ ni nuɔ fɔyeli he lɛ jieɔ lɛ kpo lɛ shi. Amɛbɔɔ mɔdɛŋ koni amɛkase