“Ohiɛ Akã Otsui He!”

Yehowa Odasefoi Akpokpaa Wulu Nɔ Kpee

SOHAA KPEE LƐ SANEYITSO

“Yehowa lɛ Tsui Ekwɛɔ!”—1 SAMUEL 16:7.

HƆƆ KPEE LƐ SANEYITSO

“Nɔ ni Eyi Tsui Obɔ Kɛteke Nɔ lɛ, No Nɔŋŋ Naabu Wieɔ”—MATEO 12:34.

HƆGBAA KPEE LƐ SANEYITSO

‘Okɛ Otsui Muu lɛ Fɛɛ Asɔmɔ Yehowa’—1 KRONIKA 28:9.

Biblia lɛ tsiɔ tsui lɛ tã aaafee shii akpe sɔŋŋ. Bei pii lɛ, kɛ́ Ŋmalɛi lɛ miiwie tsui lɛ he lɛ, ekɔɔ mfonirifeemɔŋ tsui lɛ he, shi jeee tsui lɛ diɛŋtsɛ. Mɛni ji mfonirifeemɔŋ tsui lɛ? Wiemɔ nɛɛ baanyɛ atsɔɔ bɔ ni mɔ ko ji diɛŋtsɛ yɛ mli gbɛ—nibii ni mɔ susuɔ he, ehenumɔi, kɛ eshwelɛi.

Mɛni hewɔ esa akɛ wɔbu wɔfonirifeemɔŋ tsui lɛ he? Nyɔŋmɔ ha Maŋtsɛ Salomo ŋma akɛ: “Ohiɛ akã otsui he fe nii fɛɛ; ejaakɛ no mli wala jɛɔ.” (Abɛi 4:23) Wɔfonirifeemɔŋ tsui lɛ náa bɔ ni wɔhiɔ shi wɔhaa amrɔ nɛɛ kɛ wɔwala námɔ wɔsɛɛ nɔ hewalɛ waa diɛŋtsɛ. Mɛni hewɔ? Ejaakɛ Nyɔŋmɔ naa nɔ ni yɔɔ wɔtsui mli. (1 Samuel 16:7) Bɔ ni wɔji yɛ mli gbɛ, yɛ ‘wɔtsuiiaŋ gbɔmɔ ni aŋɔtee lɛ’ mli lɛ, no tsɔɔ bɔ ni Nyɔŋmɔ naa wɔ ehaa.—1 Petro 3:4.

Te wɔɔfee tɛŋŋ wɔbu wɔtsui lɛ he? Abaasusu sanebimɔ nɛɛ hetoo lɛ he fitsofitso yɛ Yehowa Odasefoi akpokpaa wulu nɔ kpeei ni miiya nɔ yɛ jeŋ fɛɛ lɛ shishi, ni aje afi nɛɛ nɔ̃ lɛ shishi kɛjɛ May. Wɔkɛ miishɛɛ miifɔ̃ bo nine koni oya kpee nɛɛ gbii etɛ lɛ fɛɛ.a Nibii ni obaakase yɛ jɛmɛ lɛ baaye abua bo koni ofee nibii ni baaha Yehowa Nyɔŋmɔ tsui anyɔ emli.—Abɛi 27:11.—w12-E 05/1.

Ani Obaasumɔ ni Abasara Bo?

Biblia mli anɔkwa nilee ni kɔɔ Nyɔŋmɔ, e-Maŋtsɛyeli lɛ, kɛ yiŋtoo kpakpa ni ehiɛ kɛha adesai lɛ ahe lɛ baanyɛ aha omii ashɛ ohe yɛ jeŋ ni naagbai yɔɔ mli nɛɛ po mli. Kɛji obaasumɔ ni ole nibii babaoo aloo ni mɔ ko aba oŋɔɔ ni ekɛ bo abakase Biblia lɛ ní aheee bo nɔ ko lɛ, no lɛ onine baanyɛ ashɛ Yehowa Odasefoi lɛ anɔ yɛ www.watchtower.org.