Be ni Adam kɛ Hawa shi Eden abɔɔ lɛ mli lɛ, amɛfɔ bii babaoo. Atsɛɔ amɛ klɛŋklɛŋ binuu lɛ Kain, ni atsɛɔ mɔ ni ji enyɔ lɛ Habel. Kain batsɔ okwaafonyo, ni Habel batsɔ tookwɛlɔ.

Gbi ko lɛ, Kain kɛ Habel shã afɔle amɛhã Yehowa. Afɔle ji nikeenii krɛdɛɛ ko. Yehowa ná Habel afɔle lɛ he miishɛɛ, shi enáaa Kain nɔ lɛ he miishɛɛ. Enɛ hã Kain mli fu waa. Yehowa kɛ hiɛdɔɔ wie etsɔɔ Kain. Ekɛɛ lɛ akɛ emlifu lɛ baanyɛ ahã efee nɔ ko gbonyo. Shi Kain booo toi.

Kain kɛɛ Habel akɛ: ‘Hã wɔya ŋa lɛ mli.’ Be ni amɛtee lɛ, Kain kɛ nɔ ko tswa enyɛmi lɛ ni egbe lɛ. Mɛni Yehowa fee Kain yɛ nɔ ni efee lɛ hewɔ? Yehowa gbala etoi. Eshwie lɛ kɛje eweku lɛ masɛi kɛtee he ko shɔŋŋ, ni ehãaa eku esɛɛ dɔŋŋ.

Mɛni wɔkaseɔ yɛ sane nɛɛ mli? Kɛ́ nibii eyaaa lɛ bɔ ni wɔsumɔɔ lɛ, wɔmli baanyɛ afu. Shi kɛ́ wɔna akɛ wɔmli efu, loo mɔ ko na ni ebɔ wɔ kɔkɔ yɛ he lɛ, esa akɛ wɔjɔɔ wɔtsui he oya koni wɔkafee nɔ ko gbonyo.

Habel fee nɔ ni ja, ejaakɛ esumɔɔ Yehowa. No hewɔ lɛ, Yehowa baakai lɛ daa. Nyɔŋmɔ baatee lɛ shi kɛba wala mli ekoŋŋ yɛ Paradeiso lɛ mli.

Afii komɛi asɛɛ lɛ, mɛi ayi bafa yɛ shikpɔŋ lɛ nɔ. Shi amɛteŋ mɛi pii efeee ekpakpa. Ŋwɛibɔfoi lɛ ekomɛi po bɔi nibii fɔji feemɔ. Amɛshi ŋwɛi ni amɛba shikpɔŋ lɛ nɔ. Ani ole nɔ hewɔ ni amɛfee nakai? Amɛfee nakai koni amɛnyɛ amɛtsɔmɔ amɛhe gbɔmɛi ni amɛkɛ yei abote gbalashihilɛ mli.

Ŋwɛibɔfoi lɛ kɛ yei lɛ fɔ bihii. Gbekɛbii nɛɛ badara ni amɛbatsɔmɔ hii ni he wala waa. Amɛyi mɛi ni amɛpila mɛi. Nibii gbohii ni amɛfee lɛ hewɔ lɛ, Yehowa kpɛ eyiŋ akɛ ekɛ nu afua baakpãtã mɛi fɔji lɛ fɛɛ ahiɛ.

Shi nuu ko yɛ amɛteŋ ni efeee nibii gbohii. Atsɛɔ lɛ Noa, ni esumɔɔ Yehowa. Noa yɛ ŋa kɛ bihii etɛ. Atsɛɔ ebihii lɛ Shem, Ham, kɛ Yafet. Amɛteŋ mɔ fɛɛ mɔ yɛ ŋa kome. Yehowa hã Noa kpɛ adeka agbo ko, koni kɛ́ Nu Afua lɛ ba lɛ, amɛkagboi. Yehowa kɛɛ Noa ni ekɛ kooloi babaoo awo adeka lɛ mli, koni amɛ hu amɛkagboi yɛ Nu Afua lɛ mli.

Noa bɔi adeka lɛ kpɛɛ amrɔ nɔŋŋ. Noa kɛ eweku lɛ kɛ aaafee afii 50 ni kpɛ adeka lɛ. Bɔ ni Yehowa kɛɛ amɛkpɛ adeka lɛ, nakai pɛpɛɛpɛ amɛfee lɛ. Be ni Noa kpɛɔ adeka lɛ, ebɔ mɛi kɔkɔ akɛ Nu Afua ko miiba. Shi mɔ ko mɔ ko booo lɛ toi.

Be bashɛ, ni Noa kɛ eweku lɛ bote adeka lɛ mli. Hã wɔkwɛ nɔ ni ba.