Sanebimɔ he

◼ Mɛni ji sɛɛnamɔi ni yɔɔ kpeei ni wɔbaaya yɛ asafo ni atuu shikpɔŋkuku ni wɔyɔɔ mli lɛ awo amɛdɛŋ lɛ mli lɛ he?

Kɛtsɔ asafoŋ gbɛjianɔtoo lɛ nɔ lɛ, wɔnine shɛɔ hewalɛwoo ‘ní kanyaa wɔ kɛha suɔmɔ kɛ nitsumɔi kpakpai’ lɛ anɔ. (Heb. 10:24, 25) Kɛtsɔ asafo lɛ nɔ lɛ, wɔkaseɔ anɔkwale lɛ, ni asáa wɔ koni wɔtsu nitsumɔ ni akɛwo wɔdɛŋ akɛ wɔfee kaselɔi lɛ he nii. (Mat. 28:19, 20) Awoɔ wɔ hewalɛ hu koni wɔŋmɛ wɔtsui shi yɛ kaai amli yɛ anɔkwayeli mli, ni ahaa wɔ nɔkwɛlɔi ni yɔɔ suɔmɔ koni amɛye amɛbua wɔ ni wɔdamɔ nɔnyɛɛi kɛ yeyeeyefeemɔi ni fáa babaoo lɛ anaa yɛ omanyeyeli mli. Eka shi faŋŋ akɛ, asafo lɛ he miihia kɛha wɔmumɔŋ yibaamɔ. Shi kɛlɛ, ani sɛɛnamɔi yɛ kpeei ni wɔbaaya yɛ asafo ni atuu shikpɔŋkuku ni wɔyɔɔ mli lɛ awo amɛdɛŋ lɛ mli lɛ he?

Aŋkroaŋkroi ashihilɛi yɛ srɔtoisrɔtoi, ni nibii tamɔ heloonaa nitsumɔ, hefatalɔ ni heee yeee, kɛ tsɔne ni afoɔ kɛyaa baanyɛ aná mɔ ko yiŋkpɛɛ ni ebaafee yɛ naagbee lɛ nɔ hewalɛ yɛ sane ni tamɔ nɛkɛ mli. Ni kɛlɛ, kɛ́ mɔ ko kɛ ehe bɔ asafo ni kwɛɔ shikpɔŋkuku ni eyɔɔ nɔ lɛ he lɛ, enáa sɛɛnamɔi kpakpai yɛ mumɔŋ kɛ agbɛnɛ yɛ gbɛ̀i krokomɛi anɔ hu. Yɛ hiamɔ shihilɛi amli lɛ, onukpai lɛ anine baanyɛ ashɛ shiɛlɔi lɛ fɛɛ anɔ mra.—Kwɛmɔ Wɔ Maŋtsɛyeli Sɔɔmɔ ni je kpo yɛ October 2001, baafa 1.

Bei pii lɛ, eyɛ mlɛo akɛ abaaya kpeei yɛ he ni bɛŋkɛ, ni ehaa wɔyashɛɔ jɛmɛ mra bɔ ni sa, koni wɔkɛ mɛi krokomɛi agba sane, ní wɔtsu saji ni he hiaa lɛ ahe nii, koni wɔná lala kɛ sɔlemɔ ni akɛjeɔ shishi lɛ mli gbɛfaŋnɔ. Kɛ mɛi heei ni yɔɔ wiemɔ lɛ he miishɛɛ lɛ yɛ wɔ akutso lɛ mli lɛ, bei pii lɛ ebafeɔ mlɛo kɛhaa wɔ akɛ wɔnine aaashɛ amɛnɔ, ní wɔkɛ amɛ afee Biblia mli nikasemɔi, koni wɔtsɔɔ amɛ gbɛ kɛya asafo ni baahi fe fɛɛ kɛha amɛ lɛ mli.

Wɔyɛ hekɛnɔfɔɔ akɛ weku yitsei kɛ sɔlemɔ baasusu sane nɛɛ he, ní amɛsusu nibii fɛɛ ni kɔɔ he lɛ he jogbaŋŋ, koni amɛkɛle nɔ ni hi fe fɛɛ kɛha amɛweku lɛ hilɛ-kɛhamɔ yɛ mumɔŋ kɛ helooŋ gbɛfaŋ.—1 Tim. 5: 8.