Fã 1
Ani Nyɔŋmɔ Susuɔ Wɔhe Lɛlɛŋ?
1, 2. Mɛɛ sane gbɔmɛi biɔ yɛ Nyɔŋmɔ he, ni mɛni hewɔ?
EKOLƐ obi yɛ oshihilɛ mli be ko mli da, akɛ: ‘Kɛji Nyɔŋmɔ ko yɛ ni susuɔ wɔhe lɛlɛŋ lɛ, mɛni hewɔ eŋmɛɔ amanehulu babaoo gbɛ nakai lɛ?’ Wɔteŋ mɔ fɛɛ mɔ ena amanehulu da, aloo wɔle mɔ ko ni ena eko da.
2 Lɛlɛŋ, gbɔmɛi ena piŋmɔ kɛ tsuiŋdɔlɛ ni jɛɔ ta, yiwalɛ, awuiyeli, jalɛsane ni ayeee, ohia, helai, kɛ suɔlɔi agbele mli baa lɛ mli amanehulu yɛ yinɔsane be fɛɛ mli. Tai egbe gbɔmɛi fe akpekpei 100, yɛ wɔ afii ohai 20 nɛɛ pɛ mli. Ni mɛi krokomɛi akpekpei ohai abɔ epila aloo amɛlaaje amɛshiai kɛ nibii krokomɛi yɛ mli. Nibii ni yɔɔ gbeyei ni anako nɔ da eba mli yɛ wɔbe nɛɛ mli, ni nɔ ni ejɛ mli eba ji awerɛho kpele, yaafonui babaoo, kɛ henumɔ ni hiɛnɔkamɔ ko kwraa bɛ mli yɛ gbɔmɛi babaoo ashihilɛ mli.
3, 4. Te mɛi pii nuɔ amanehulu ni Nyɔŋmɔ eŋmɛ gbɛ lɛ he amɛhaa tɛŋŋ?
3 Mɛi komɛi kɛ ehe dɔlɛ woɔ amɛmli ni amɛnuɔ he akɛ kɛji Nyɔŋmɔ ko yɛ lɛ, no lɛ ejeee mɔ ni susuɔ wɔhe lɛlɛŋ. Aloo amɛbaanu he po akɛ Nyɔŋmɔ ko bɛ. Akɛ nɔkwɛmɔ nɔ lɛ, nuu ko ni na amanehulu yɛ hewolo nɔ su mli yiwaa ni ha enanemɛi kɛ ewekumɛi gboi, yɛ Jeŋ Ta I mli lɛ bi akɛ: “Nɛgbɛ Nyɔŋmɔ yɔɔ beni ehe hiaa wɔ lɛ?” Mɔ kroko, ni je mli beni Nazibii lɛ gbe gbɔmɛi akpekpei abɔ yɛ Jeŋ Ta II mli lɛ werɛ ho ehe yɛ amanehulu ni ena lɛ hewɔ aahu akɛ ekɛɛ: “Kɛji obaanyɛ olɛmɔ mitsui mli lɛ, ebɔɔ ni eba mli lɛ baagbe bo.”
4 Enɛ hewɔ lɛ, mɛi pii nyɛɛɛ amɛnu nɔ hewɔ ni Nyɔŋmɔ kpakpa ŋmɛɔ gbɛ ni afeɔ nibii fɔji lɛ shishi. Amɛyiŋ feɔ amɛ kɔshikɔshi yɛ wɔhe ni esusuɔ lɛlɛŋ, aloo kɛji eyɛ shihilɛ mli po lɛ he. Ni amɛteŋ mɛi pii nuɔ he akɛ amanehulu baakã he ahi shi akɛ adesai ashihilɛ lɛ fa yɛ be fɛɛ mli.
[Mfoniri ni yɔɔ baafa 2, 3]
Ani jeŋ hee ko ni amanehulu bɛ mli ebɛŋkɛ?