Fã 2
Shikpɔŋ Ko Ni Eye Ehe Kɛjɛ Amanehulu Mli
1, 2. Mɛɛ susumɔ sɔrɔto ko mɛi pii hiɛ?
SHI, gbɔmɛi akpekpei abɔ yɛ je lɛŋ fɛɛ ni amɛhiɛ susumɔ sɔrɔto ko kwraa. Amɛmiikpa wɔsɛɛ be ko ni yɔɔ nyam kɛha adesai gbɛ. Amɛkɛɔ akɛ etsɛŋ ni jeŋ ko ni eye ehe kwraa kɛjɛ efɔŋfeemɔ kɛ amanehulu mli baaba shikpɔŋ nɛɛ diɛŋtsɛ nɔ. Amɛyɛ hiɛnɔkamɔ akɛ etsɛŋ ni abaajie nibii fɔji fɛɛ kɛya ni abaato jeŋ hee kwraa ko shishi. Amɛkɛɔ po akɛ aato nɛkɛ jeŋ hee nɛɛ shishitoo he gbɛjianɔ amrɔ nɛɛ po!
2 Nɛkɛ gbɔmɛi nɛɛ heɔ yeɔ akɛ jeŋ hee lɛ baaye ehe kwraa kɛjɛ ta, yiwalɛ, awuiyeli, jalɛsane ni ayeee, kɛ ohia he. Ebaafee jeŋ ko ni helai, ŋkɔmɔyeli, yaafonui, kɛ gbele tete po bɛ mli. Gbɔmɛi baadara kɛshɛ emuuyeli mli ni amɛbaahi shi kɛya naanɔ yɛ miishɛɛ mli yɛ paradeiso shikpɔŋ nɔ yɛ nakai beaŋ. Ni abaatee mɛi ni egboi po lɛ ashi kɛba wala mli ni amɛbaana hegbɛ amɛhi shi kɛya naanɔ!
3, 4. Mɛni hewɔ nɛkɛ gbɔmɛi nɛɛ yɔɔ hekɛnɔfɔɔ waa yɛ nɔ ni amɛsusuɔ nɛɛ he lɛ?
3 Ani bɔ ni amɛsusuɔ wɔsɛɛ be he nɛɛ ji lamɔ, kɛ yiŋsusumɔ folo ko kɛkɛ? Dabi, ejeee nakai kwraa. Edamɔ hemɔkɛyeli ni ma shi shiŋŋ nɔ, akɛ nɛkɛ Paradeiso ni baa nɛɛ baaba mli lɛlɛŋ. (Hebribii 11:1) Mɛni hewɔ amɛyɔɔ nɔmimaa nakai? Ejaakɛ jeŋ muu fɛɛ Bɔlɔ ofe lɛ diɛŋtsɛ ewo shi yɛ he.
4 Biblia lɛ wieɔ yɛ Nyɔŋmɔ shiwoi ahe akɛ: “Nibii kpakpai fɛɛ ni Yehowa, nyɛ-Nyɔŋmɔ lɛ wie yɛ nyɛhewɔ lɛ, emli ekome folo ekaaa shi; fɛɛ eba mli eha nyɛ, emli ekome folo ekaaa shi.” “Jeee gbɔmɔ ji Mawu ni eeemale . . . Aso eeekɛɛ nɔ ko ni efeŋ? Aloo eeewo shi ni eyeŋ nɔ?” “Yehowa Zebaot eka kita akɛ: ‘Lɛlɛŋ, bɔ ni misusu lɛ, nakai ebaaba mli, ni bɔ ni mito miyiŋ lɛ, nakai ebaama shi.’ ”—Yoshua 23:14; 4 Mose 23:19; Yesaia 14:24.
5. Mɛɛ sanebimɔi ehe hiaa ni aha hetoo?
5 Shi, kɛ Nyɔŋmɔ yiŋtoo ji ni eto paradeiso shikpɔŋ ko ni eye ehe kɛjɛ amanehulu mli shishi lɛ, mɛni hewɔ ni eŋmɛ gbɛ ni afee nibii fɔji lɛ mɔ? Ni mɛni hewɔ ni emɛ aahu afii akpei ekpaa sɔŋŋ kɛbashi bianɛ dani ejaje nɔ ni etɔ̃tɔ̃ lɛ? Ani afii ohai abɔ ni akɛna amanehulu nɛɛ aaanyɛ atsɔɔ akɛ Nyɔŋmɔ susuuu wɔhe lɛlɛŋ, aloo akɛ ebɛ shihilɛ mli po?