Fã 4
Nyɔŋmɔ Tswaa Wɔ Eyiŋtoi Ahe Adafi
1, 2. Mɛɛ gbɛ nɔ wɔtsɔɔ wɔleɔ akɛ Nyɔŋmɔ haa mɛi ni kɛ anɔkwayeli biɔ saji lɛ ahetoo?
LƐLƐŊ, Nyɔŋmɔ ni yɔɔ suɔmɔ lɛ jieɔ eyiŋtoi akpo etsɔɔ anɔkwafoi ni taoɔ esɛɛ gbɛ lɛ. Ehaa adesai ni taoɔ saji amli lɛ naa hetooi amɛhaa amɛsanebimɔi tamɔ nɔ hewɔ ni eŋmɛ amanehulu gbɛ lɛ.
2 Biblia lɛ kɛɔ akɛ: “Kɛji otao [Nyɔŋmɔ] lɛ, eeeha ona lɛ.” “Nyɔŋmɔ ko yɛ ŋwɛi ni jieɔ teemɔŋ saji ashi.” “Nuŋtsɔ Yehowa efeŋ nɔ ko, akɛ ja ejie eyiŋtoo lɛ kpo etsɔɔ etsuji, gbalɔi lɛ da.”—1 Kronika 28:9; Daniel 2:28; Amos 3:7.
Nɛgbɛ Hetooi lɛ Yɔɔ?
3. Nɛgbɛ wɔbaanyɛ wɔna nɔ hewɔ ni Nyɔŋmɔ eŋmɛ amanehulu gbɛ lɛ yɛ?
3 Anaa hetooi kɛha sanebimɔi tamɔ nɔ hewɔ ni Nyɔŋmɔ ŋmɛɔ amanehulu gbɛ kɛ nɔ ni ebaafee yɛ he lɛ yɛ nibii ni eha ajɛ mumɔ mli aŋmala ashwie shi kɛha wɔsɛɛnamɔ lɛ amli. Nakai niŋmaa lɛ ji e-Wiemɔ lɛ, Ŋmalɛ Krɔŋkrɔŋ, loo Biblia lɛ. “Ŋmalɛ fɛɛ ŋmalɛ ni jɛ Nyɔŋmɔ mumɔ lɛŋ lɛ, ehi ha nitsɔɔmɔ kɛ hiɛkamɔ kɛ mɔ saamɔ kɛ tsɔsemɔ ni yɔɔ jalɛ mli lɛ, koni Nyɔŋmɔ gbɔmɔ lɛ aye emuu, ni asaa lɛ pɛpɛɛpɛ aha nitsumɔ kpakpa fɛɛ nitsumɔ kpakpa.”—2 Timoteo 3:16, 17.
4, 5. Mɛni haa Biblia lɛ feɔ wolo ko ni esoro lɛ kwraa lɛ?
4 Lɛlɛŋ Biblia lɛ ji wolo ko ni esoro lɛ kwraa. Adesa yinɔsane he niŋmaa ni ja fe fɛɛ lɛ yɛ mli, ni eyaa sɛɛ shɔŋŋ po fe be mli ni akɛbɔ adesai. Eja yɛ be naa pɛpɛɛpɛ hu, ejaakɛ egbalɛi lɛ kɔɔ nibii ni yaa nɔ yɛ wɔbe nɛɛ kɛ wɔsɛɛ be ni ka wɔhiɛ kpaakpa lɛ hu mli lɛ ahe.
5 Wolo kroko ko bɛ ni ajieɔ yi akɛ bɔ ni ewieɔ yinɔsane he lɛ ja tamɔ no. Akɛ nɔkwɛmɔ nɔ lɛ, blema niŋmalɔi awoji ni amɛkɛ amɛniji ŋmala lɛ fioo komɛi pɛ yɔɔ. Shi Biblia mli woji ni akɛ niji ŋmala lɛ ekomɛi fai komɛi, aloo woji muji lɛ fɛɛ po yɛ: Hebri Ŋmalɛi lɛ (“Kpaŋmɔ Momo” lɛ mli woji 39 lɛ) aaafee 6,000 kɛ Kristofoi a-Hela Ŋmalɛi lɛ (“Kpaŋmɔ Hee” lɛ mli woji 27 lɛ) hu aaafee 13,000 yɛ.
6. Mɛni hewɔ wɔbaanyɛ wɔna nɔmimaa akɛ Biblia ni yɔɔ ŋmɛnɛ lɛ tamɔ bɔ ni eji beni Nyɔŋmɔ ha ajɛ mumɔ mli aŋma lɛ nɔŋŋ lɛ?
6 Nyɔŋmɔ Ofe lɛ, mɔ ni Biblia lɛ jɛ emumɔ mli lɛ ekwɛ ni eha abaa emli niŋmaa lɛ yi kɛ anɔkwayeli, yɛ nakai woji ni akɛ niji ŋmala lɛ amli. No hewɔ lɛ Bibliai ni wɔhiɛ ŋmɛnɛ lɛ tamɔ shishijee niŋmaai ni jɛ mumɔŋ lɛ nɔŋŋ. Oti kroko ni yeɔ buaa wɔ ni ehaa wɔhiɛ sɔɔ enɛ ji akɛ, Kristofoi a-Hela Ŋmalɛi ni akɛ niji ŋmala lɛ ekomɛi yaa sɛɛ aahu kɛyashiɔ aaafee afii oha kɛjɛ be mli ni aŋmala shishijee nibii lɛ. Woji ni blema jeŋ niŋmalɔi kɛ amɛniji ŋmala lɛ amli fioo ni yɔɔ lolo lɛ nyɛɛɛ aya shɔŋŋ kɛyashɛ afii ohai fioo ko po kɛjɛ be mli ni shishijee niŋmalɔi lɛ ŋmala lɛ he.
Nyɔŋmɔ Nikeenii
7. Nɛgbɛ aja Biblia lɛ kɛyashɛ?
7 Biblia lɛ ji wolo ni aja babaoo fe fɛɛ yɛ yinɔsane mli. Akala ekomekomei aaashɛ akpekpei akpei etɛ. Wolo kroko ko bɛŋkɛɛɛ nakai yibɔ lɛ kwraa. Ni atsɔɔ Biblia lɛ loo efai komɛi ashishi kɛtee wiemɔi ni fa fe 2,000 mli. Enɛ hewɔ lɛ, abuɔ akɔntaa akɛ gbɔmɛi fɛɛ ni yɔɔ wɔ shibɔlemɔ ŋulami nɛɛ nɔ lɛ fɛɛ mli oha mlijaa 98 anine baanyɛ ashɛ Biblia lɛ nɔ.
8-10. Mɛni ji yiŋtoi ahewɔ ni esa akɛ wɔpɛi Biblia lɛ mli lɛ ekomɛi?
8 Eka shi faŋŋ akɛ, esa akɛ wɔkwɛ wolo ni kɛɔ akɛ ejɛ Nyɔŋmɔ ŋɔɔ, ni yɔɔ kponɔ gbɛ kɛ emli gbɛ odaseyelii fɛɛ akɛ eji anɔkwale lɛ mli jogbaŋŋ.a Etsɔɔ yiŋtoo ni yɔɔ wala sɛɛ, nɔ ni je lɛŋ shihilɛi ashishinumɔ ji, kɛ nɔ ni yɔɔ kɛha wɔsɛɛ be lɛ mli jogbaŋŋ. Wolo kroko ko bɛ ni baanyɛ afee nakai.
9 Hɛɛ, Biblia lɛ ji saji ni Nyɔŋmɔ kɛ adesai aweku lɛ ewie. Etsɔ enitsumɔ hewalɛ, loo mumɔ lɛ nɔ eha aŋma, ni eha adesai aaashɛ 40 tsu eŋmaa he nii. Enɛ hewɔ lɛ, Nyɔŋmɔ kɛ wɔ wieɔ kɛtsɔɔ e-Wiemɔ, Ŋmalɛ Krɔŋkrɔŋ, loo Biblia lɛ nɔ. Bɔfo Paulo ŋma akɛ: “Beni nyɛnine shɛ Nyɔŋmɔ wiemɔ ni nyɛnu yɛ wɔnaa lɛ nɔ lɛ, nyɛmɔ mli akɛ Nyɔŋmɔ wiemɔ, taakɛ bɔ ni eji hu lɛlɛŋ lɛ, shi jeee akɛ gbɔmɛi awiemɔ ko ni.”—1 Tesalonikabii 2:13.
10 Abraham Lincoln, ni ji United States maŋsɔɔlɔ nukpa ni ji 16 lɛ tsɛ Biblia lɛ akɛ “nikeenii ni hi fe fɛɛ ni Nyɔŋmɔ kɛha gbɔmɔ . . . Kɛ jeee no kulɛ, wɔleŋ jalɛ yɛ nɔ ni ejaaa he kɔkɔɔkɔ.” Belɛ, mɛni nɛkɛ nikeenii ni hi fe fɛɛ nɛɛ kɛɔ wɔ yɛ bɔ ni fee ni amanehulu je shishi, nɔ hewɔ ni Nyɔŋmɔ ŋmɛ gbɛ, kɛ nɔ ni ebaafee yɛ he lɛ he mɔ?
[Shishigbɛ niŋmai]
a Kɛji ootao ole nibii babaoo yɛ bɔ ni Biblia lɛ ja jogbaŋŋ ha he lɛ, kwɛmɔ The Bible—God’s Word or Man’s? wolo, ni Watchtower Bible and Tract Society of New York, Inc. fee yɛ 1989 mli lɛ.
[Mfoniri ni yɔɔ baafa 10]
Biblia, ni jɛ Nyɔŋmɔ mumɔ mli lɛ, ji saji ni ekɛ adesai aweku lɛ ewie