Yehowa Odasefoi enyiɛ ole? Ekolɛ wɔteŋ mɛi komɛi kɛ bo yɔɔ akutso mli, wɔkɛ bo tsuɔ nii, loo wɔkɛ bo yaa skul. Aloo ekolɛ wɔkɛ bo egba Biblia mli sane pɛŋ. Namɛi tuuntu ji wɔ? Ni mɛni hewɔ wɔkɛ mɛi gbaa wɔhemɔkɛyeli lɛ he sane?

Jeee gbɔmɛi srɔto ko ji wɔ. Wɔjɛ hei srɔtoi kɛ shihilɛi srɔtoi amli. Tsutsu ko lɛ, wɔteŋ mɛi komɛi yɛ jamɔi krokomɛi amli, ni wɔteŋ mɛi komɛi hu heee Nyɔŋmɔ nɔ wɔyeee. Shi dani wɔbatsɔmɔ Odasefoi lɛ, wɔ fɛɛ wɔhe be kɛpɛi Biblia mli tsɔɔmɔi lɛ amli jogbaŋŋ. (Bɔfoi 17:11) Wɔkpɛlɛ nɔ ni wɔkase lɛ nɔ, ni wɔkpɛ wɔyiŋ akɛ wɔbaajá Yehowa Nyɔŋmɔ.

Biblia lɛ ni wɔkaseɔ lɛ yeɔ ebuaa wɔ. Tamɔ bɔ ni eji yɛ mɔ fɛɛ mɔ gbɛfaŋ lɛ, wɔ hu wɔyɛ naagbai kɛ gbɔjɔmɔi. Shi Biblia mli shishitoo mlai ni wɔbɔɔ mɔdɛŋ wɔkɛtsuɔ nii yɛ wɔshihilɛ mli daa lɛ hewɔ lɛ, wɔshihilɛ ehi fe tsutsu lɛ. (Lala 128:1, 2) Enɛ ji yiŋtoo kome hewɔ ni wɔkɛ mɛi gbaa nibii kpakpai ni wɔkase yɛ Biblia lɛ mli lɛ ahe sane lɛ.

Wɔhiɔ shi yɛ Nyɔŋmɔ shishitoo mlai lɛ anaa. Shishitoo mlai nɛɛ ni yɔɔ Biblia lɛ mli lɛ hãa wɔnáa shihilɛ kpakpa, ni amɛhãa wɔjieɔ bulɛ kpo wɔtsɔɔ mɛi, ni wɔjieɔ sui tamɔ anɔkwayeli kɛ mlihilɛ hu kpo. Amɛhãa wɔfeɔ akutsoŋbii kpakpai, ni ekomefeemɔ hiɔ wɔwekui lɛ amli. Agbɛnɛ hu, amɛhãa wɔbaa wɔjeŋ jogbaŋŋ. Akɛni wɔle akɛ “Nyɔŋmɔ kwɛɛɛ mɛi ahiɛiaŋ” hewɔ lɛ, wɔkɛ wɔnyɛmimɛi Kristofoi ni yɔɔ je lɛŋ fɛɛ ni wɔkɛ amɛ hiɛ hemɔkɛyeli kome lɛ hiɔ shi yɛ ekomefeemɔ mli, ni wɔhãaa hewolonɔ su loo maŋkwramɔŋ saji agbála wɔmli. Eyɛ mli akɛ gbɔmɛi ji wɔ tamɔ mɛi krokomɛi nɔŋŋ moŋ, shi akɛ kuu lɛ, esoro wɔ kwraa.​—Bɔfoi 4:13; 10:34, 35.

• Mɛɛ gbɛi anɔ Yehowa Odasefoi tamɔ mɛi krokomɛi nɔŋŋ?

• Mɛɛ sui kpakpai Biblia lɛ kasemɔ ehã Odasefoi lɛ ená?

Mɛi babaoo susuɔ akɛ Yehowa Odasefoi ji jamɔ hee ko gbɛ́i. Kɛ̃lɛ, nɔ ni fe afii 2,700 ni eho nɛ lɛ, atsɛ anɔkwa Nyɔŋmɔ lɛ tsuji lɛ akɛ ‘edasefoi.’ (Yesaia 43:10-12) Dani afi 1931 lɛ baashɛ lɛ, no mli lɛ atsɛɔ wɔ Biblia Kaselɔi. Mɛni hewɔ wɔtsake wɔgbɛ́i lɛ ni wɔfee lɛ Yehowa Odasefoi lɛ?

Ehãa anaa Nyɔŋmɔ ni wɔjáa. Nyɔŋmɔ gbɛ́i ni ji Yehowa lɛ jeɔ kpo shii akpei abɔ yɛ Biblia lɛ mli yɛ blema wolokpoi ni akɛ niji ŋmala lɛ amli. Akɛ gbɛnaa gbɛ́i tamɔ Nuŋtsɔ loo Nyɔŋmɔ eye gbɛ́i nɛɛ najiaŋ yɛ Biblia shishitsɔɔmɔi babaoo amli. Kɛ̃lɛ, anɔkwa Nyɔŋmɔ lɛ jie lɛ diɛŋtsɛ egbɛ́i Yehowa lɛ shi etsɔɔ Mose, ni ekɛɛ lɛ akɛ: “Enɛ ji migbɛ́i kɛmiiya naanɔ.” (2 Mose 3:15) Etsɔ gbɛ nɛɛ nɔ ehã ana akɛ, esoro lɛ kwraa yɛ amale nyɔŋmɔi fɛɛ ahe. Wɔshiɔ wɔtsitsi akɛ Nyɔŋmɔ gbɛ́i krɔŋkrɔŋ lɛ kã wɔnɔ.

Ehãa anaa nitsumɔ ni akɛwo wɔdɛŋ. Mɛi babaoo ni hi shi yɛ blema, kɛjɛ nuu anɔkwafo Habel yinɔ tɔ̃ɔ lɛ, ye hemɔkɛyeli ni amɛyɔɔ yɛ Yehowa mli lɛ he odase. Yɛ afii ohai abɔ ni eho lɛ amli lɛ, Noa, Abraham, Sara, Mose, David, kɛ mɛi krokomɛi bafata “odasefoi babaoo tamɔ atatu” nɛɛ ahe. (Hebribii 11:4–12:1) Tamɔ bɔ ni mɔ ko baanyɛ aye odase yɛ saneyelihe ehã mɔ ko ni efeko efɔŋ ko lɛ, nakai nɔŋŋ wɔ hu wɔtswa wɔfai shi akɛ wɔbaahã mɛi ale anɔkwale ni kɔɔ Nyɔŋmɔ he lɛ.

Wɔkɛmiikase Yesu. Biblia lɛ tsɛɔ Yesu akɛ “anɔkwa odasefonyo ni yeɔ anɔkwa.” (Kpojiemɔ 3:14) Yesu diɛŋtsɛ kɛɛ akɛ ehã ekaselɔi lɛ ‘le Nyɔŋmɔ gbɛ́i lɛ,’ ni etee nɔ eye anɔkwale ni kɔɔ Nyɔŋmɔ he lɛ he “odase.” (Yohane 17:26; 18:37) No hewɔ lɛ, esa akɛ Kristo anɔkwa sɛɛnyiɛlɔi lɛ ahã Yehowa gbɛ́i lɛ akã amɛnɔ ni amɛhã mɛi ale gbɛ́i nɛɛ. Enɛ ji nɔ ni Yehowa Odasefoi bɔɔ mɔdɛŋ akɛ amɛbaafee.

• Mɛni hewɔ Biblia Kaselɔi lɛ hã abɔi amɛ tsɛmɔ akɛ Yehowa Odasefoi lɛ?

• Afii enyiɛ nɛ ni Yehowa ená odasefoi yɛ shikpɔŋ lɛ nɔ?

• Namɔ ji Yehowa Odasefonyo ni fe fɛɛ?

Biblia lɛ gba akɛ, yɛ Kristo gbele sɛɛ lɛ, amale tsɔɔlɔi baate shi yɛ blema Kristofoi lɛ ateŋ ni amɛkɛ amale tsɔɔmɔi baafutu Biblia mli anɔkwale tsɔɔmɔi lɛ. (Bɔfoi 20:29, 30) Nakai pɛpɛɛpɛ eba lɛ. Amale tsɔɔlɔi kɛ amagajalɔi atsɔɔmɔi bafutu Yesu tsɔɔmɔi lɛ, ni enɛ kɛ amale Kristojamɔ ba. (2 Timoteo 4:3, 4) Ŋmɛnɛ lɛ, te wɔbaafee tɛŋŋ wɔná nɔmimaa akɛ wɔnuɔ nɔ ni Biblia lɛ tsɔɔ diɛŋtsɛ lɛ shishi jogbaŋŋ?

Be ni Yehowa eto akɛ ebaajie anɔkwale lɛ kpo lɛ bashɛ. Yehowa gba akɛ yɛ ‘naagbee be lɛ mli lɛ, anɔkwa nilee baafa babaoo.’ (Daniel 12:4) Yɛ afi 1870 lɛ, kuu bibioo ko ni miitao anɔkwale lɛ yɔse akɛ nibii babaoo ni sɔlemɔi lɛ tsɔɔ lɛ damɔɔɔ Ŋmalɛ lɛ nɔ. No hewɔ lɛ, amɛbɔi nibii amlipɛimɔ koni amɛle nɔ ni Biblia lɛ tsɔɔ diɛŋtsɛ, ni Yehowa ye ebua amɛ ni amɛnu ŋmalɛi lɛ ashishi jogbaŋŋ.

Hii anɔkwafoi komɛi kase Biblia lɛ jogbaŋŋ. Mɛi ni tsɔ wɔhiɛ, ni ji Biblia Kaselɔi ni yɔɔ ekãa nɛɛ, tsɔ gbɛ ko nɔ amɛkase Biblia lɛ, ni wɔkɛ nakai gbɛ lɛ nɔŋŋ miitsu nii ŋmɛnɛ. Amɛsusu Biblia mli saji lɛ ahe ekomekomei. Kɛ́ amɛkɛ Biblia mli sane ko ni shishinumɔ wa kpe lɛ, amɛtaoɔ ŋmalɛi krokomɛi ni gbálaa mli. Kɛ́ amɛná shishinumɔ ni ja ni kɛ Ŋmalɛ lɛ kpãa gbee lɛ, amɛŋmaa amɛfɔ̃ɔ shi. No hewɔ lɛ, amɛhã Biblia lɛ nɔŋŋ ye ebua amɛ koni amɛnu Biblia lɛ shishi, ni enɛ ji nɔ ni hã Biblia mli anɔkwalei lɛ bafee faŋŋ ekoŋŋ kɛhã amɛ. Anɔkwalei ni amɛna lɛ kɔɔ Nyɔŋmɔ gbɛ́i lɛ, e-Maŋtsɛyeli lɛ, nɔ hewɔ ni ebɔ adesai kɛ shikpɔŋ lɛ, shihilɛ mli ni gbohii lɛ yɔɔ, kɛ gbohiiashitee he hiɛnɔkamɔ lɛ he. Amɛniiamlitaomɔ lɛ hã amɛye amɛhe kɛje hemɔkɛyelii kɛ nifeemɔi babaoo ni kɛ Biblia lɛ kpãaa gbee lɛ ahe.​—Yohane 8:31, 32.

Be ni shɛɔ afi 1879 lɛ, Biblia Kaselɔi lɛ eyɔse akɛ, be eshɛ ni esa akɛ amɛhã mɛi ale anɔkwalei nɛɛ. No hewɔ lɛ, yɛ nakai afi lɛ mli lɛ amɛbɔi Buu-Mɔɔ Eetswa Yehowa Maŋtsɛyeli He Adafi lɛ kalamɔ, ni aakala kɛbashi ŋmɛnɛ. Amrɔ nɛɛ, wɔkɛ Biblia mli anɔkwalei miihã mɛi yɛ maji 240 anɔ yɛ wiemɔi ni fa fe 750 amli. Anɔkwa nilee fako yɛ shikpɔŋ lɛ nɔ nɛkɛ pɛŋ!

• Yɛ Kristo gbele sɛɛ lɛ, mɛni ba Biblia mli anɔkwalei lɛ anɔ?

• Mɛni ehã anɔkwalei ni yɔɔ Nyɔŋmɔ Wiemɔ lɛ mli lɛ efee faŋŋ ekoŋŋ kɛhã wɔ?

Be ko ni eho lɛ, Yehowa Odasefoi kalaa Biblia shishitsɔɔmɔi srɔtoi, amɛkɛtsuɔ nii, ni amɛjaraa amɛhãa mɛi, ni amɛfee nakai afii pii. Shi sɛɛ mli lɛ, wɔyɔse akɛ ehe miihia ni wɔfee Biblia shishitsɔɔmɔ hee ni baaye abua mɛi jogbaŋŋ ni “amɛná anɔkwale lɛ he nilee krɔŋŋ lɛ,” ejaakɛ no ji Nyɔŋmɔ suɔmɔnaa nii kɛhã adesai fɛɛ. (1 Timoteo 2:3, 4) No hewɔ lɛ, wɔbɔi Jeŋ Hee Shishitsɔɔmɔ Biblia lɛ, ni ji Biblia shishitsɔɔmɔ ko ni ekanemɔ kɛ eshishinumɔ yɔɔ mlɛo lɛ he nitsumɔ, ni yɛ afi 1950 lɛ, wɔjie klɛŋklɛŋ fã lɛ kpo. Atsɔɔ Biblia nɛɛ shishi jogbaŋŋ kɛtee wiemɔi ni fa fe 130 amli.

Ehe bahia ni aná Biblia ni shishinumɔ waaa. Wiemɔi tsakeɔ yɛ be kɛ beiaŋ, ni wiemɔi ni akɛtsu nii yɛ Biblia shishitsɔɔmɔi lɛ ateŋ babaoo amli lɛ abe eho ni amɛshishinumɔ wa. Agbɛnɛ hu, nyɛsɛɛ nɛɛ ana blema wolokpoi babaoo ni akɛ niji ŋmala ni etsɛ fe wolokpoi ni yɔɔ momo lɛ, ni enɛ ehã anu Hebri, Aramaik, kɛ Greek wiemɔi ni akɛŋma Biblia lɛ ashishi jogbaŋŋ.

Ehe bahia ni aná Biblia shishitsɔɔmɔ ni tsakeko Nyɔŋmɔ Wiemɔ lɛ hiɛ. Esaaa akɛ Biblia shishitsɔɔlɔi jieɔ nɔ ko yɛ Nyɔŋmɔ Wiemɔ ni ajɛ mumɔŋ aŋma lɛ mli, ni asaŋ esaaa akɛ amɛkɛ nɔ ko fataa he, moŋ lɛ esa akɛ amɛtsɔɔ wiemɔi lɛ ashishi pɛpɛɛpɛ. Kɛ̃lɛ, akɛ Nyɔŋmɔ gbɛ́i, ni ji Yehowa lɛ tsuuu nii yɛ Biblia shishitsɔɔmɔi pii amli.

Ehe bahia ni aná Biblia shishitsɔɔmɔ ni baawo mɔ ni hã aŋma Biblia lɛ hiɛ nyam. (2 Samuel 23:2) Yehowa gbɛ́i lɛ jeɔ kpo aaafee shii 7,000 sɔŋŋ yɛ Jeŋ Hee Shishitsɔɔmɔ lɛ mli, ni tsɔɔ akɛ, ejeɔ kpo yɛ he fɛɛ he ni eje kpo yɛ yɛ blema Biblia wolokpoi ni akɛ niji ŋmala ni etsɛ fe fɛɛ lɛ amli, tamɔ bɔ ni wɔnaa yɛ mfoniri ni yɔɔ shishigbɛ lɛ mli lɛ. (Lala 83:18) Akɛ hiɛdɔɔ tao nii amli afii babaoo kɛfee Biblia nɛɛ. Enɛ hewɔ lɛ, ekanemɔ ŋɔɔ, ejaakɛ kɛ́ okane lɛ onuɔ nɔ ni Nyɔŋmɔ taoɔ ole lɛ shishi jogbaŋŋ. Kɛ́ Jeŋ Hee Shishitsɔɔmɔ lɛ eko yɛ owiemɔ mli jio, eko bɛ owiemɔ mli jio lɛ, wɔmiiwo bo hewalɛ ni okɛfee oti ni ma ohiɛ akɛ obaakane Yehowa Wiemɔ lɛ daa gbi.​—Yoshua 1:8; Lala 1:2, 3.

• Mɛni hã wɔna akɛ ehe miihia ni aná Biblia shishitsɔɔmɔ kroko lɛ?

• Mɛni esa akɛ mɔ ko ni miitao akase Nyɔŋmɔ suɔmɔnaa nii lɛ afee daa?