Wɔbɛ osɔfoi akuu ni awoɔ amɛ nyɔmɔ yɛ wɔgbɛjianɔtoo lɛ mli. Yɛ no najiaŋ lɛ, aholeɔ nɔkwɛlɔi ni sa koni ‘amɛkwɛ Nyɔŋmɔ asafo lɛ’ nɔ tamɔ bɔ ni afee be ni ato Kristofoi asafo lɛ shishi lɛ. (Bɔfoi 20:28) Asafoŋ onukpai nɛɛ hãa Nyɔŋmɔ mumɔ lɛ tsɔɔ amɛ gbɛ, amɛnyiɛɔ hiɛ yɛ asafo lɛ mli, ni amɛkwɛɔ asafo lɛ nɔ, ‘jeee tamɔ nɔ ni aanyɛ amɛnɔ, shi moŋ amɛjɛɔ amɛsuɔmɔ mli amɛfeɔ nakai yɛ Nyɔŋmɔ hiɛ; ni jeee yɛ sɛɛnamɔ gbonyo hewɔ hu, shi moŋ tsuijurɔ naa.’ (1 Petro 5:1-3) Mɛni amɛtsuɔ kɛyeɔ amɛbuaa wɔ?

Amɛkwɛɔ wɔnɔ ni amɛbuɔ wɔhe. Asafoŋ onukpai lɛ kɛ gbɛtsɔɔmɔ hãa asafo lɛ kɛjɛɔ Ŋmalɛ lɛ mli, ni amɛyeɔ amɛbuaa asafoŋbii lɛ ni amɛhi Yehowa masɛi. Akɛni asafoŋ onukpai lɛ le akɛ Nyɔŋmɔ etuu nitsumɔ ni he hiaa nɛɛ ewo amɛdɛŋ hewɔ lɛ, amɛyeee ewebii lɛ anɔ nuŋtsɔmɛi asane, shi moŋ amɛyeɔ amɛbuaa amɛ ni amɛná miishɛɛ. (2 Korintobii 1:24) Asafoŋ onukpai lɛ bɔɔ mɔdɛŋ akɛ amɛbaale asafoŋbii lɛ ateŋ mɔ fɛɛ mɔ jogbaŋŋ, tamɔ bɔ ni tookwɛlɔ kwɛɔ egwantɛŋi lɛ ateŋ eko fɛɛ eko jogbaŋŋ lɛ.​—Abɛi 27:23.

Amɛtsɔɔ wɔ bɔ ni wɔbaafee wɔfee Nyɔŋmɔ suɔmɔnaa nii. Daa otsi lɛ, asafoŋ onukpai lɛ kwɛɔ asafoŋ kpeei ni wɔfeɔ lɛ anɔ ni amɛkɛwajeɔ wɔhemɔkɛyeli lɛ. (Bɔfoi 15:32) Hii ni kɛ amɛhe ehã nɛɛ nyiɛɔ hiɛ hu yɛ shiɛmɔ nitsumɔ lɛ mli, amɛkɛ wɔ yaa shiɛmɔ, ni amɛyeɔ amɛbuaa wɔ ni wɔhe asa yɛ shiɛmɔ nitsumɔ lɛ fãi srɔtoi lɛ fɛɛ amli.

Amɛwoɔ wɔteŋ mɔ fɛɛ mɔ hewalɛ. Asafoŋ onukpai lɛ jɛɔ Ŋmalɛ lɛ mli amɛkɛ wɔteŋ mɔ fɛɛ mɔ wieɔ ni amɛshɛjeɔ wɔmii koni wekukpaa ni yɔɔ wɔ kɛ Yehowa teŋ lɛ mli awa. Amɛbaanyɛ amɛkɛ wɔ awie yɛ shĩa loo amɛfee nakai yɛ Maŋtsɛyeli Asa lɛ nɔ.​—Yakobo 5:14, 15.

Yɛ nii ni asafoŋ onukpai lɛ tsuɔ yɛ asafo lɛ mli lɛ fɛɛ sɛɛ lɛ, ehe miihia ni amɛteŋ mɛi babaoo kɛ amɛbe lɛ eko atsu amɛheloonaa nitsumɔ kɛ weku mli sɔ̃i ahe nii. Esa akɛ wɔbu nyɛmimɛi hii ni tsuɔ nii waa nɛɛ.​—1 Tesalonikabii 5:12, 13.

• Mɛni asafoŋ onukpai lɛ tsuɔ?

• Mɛɛ gbɛi anɔ asafoŋ onukpai lɛ yeɔ amɛbuaa wɔteŋ mɔ fɛɛ mɔ?

Biblia lɛ wieɔ Kristofoi hii kui enyɔ ni tsuɔ asafo lɛ mli sɔ̃i ahe nii lɛ ahe. Amɛji, ‘nɔkwɛlɔi kɛ sɔɔlɔi.’ (Filipibii 1:1) Bei pii lɛ, ayɛ nyɛmimɛi hii nɛɛ babaoo ni miisɔmɔ yɛ asafo fɛɛ asafo mli. Mɛni asafoŋ sɔɔlɔi lɛ tsuɔ kɛyeɔ amɛbuaa wɔ?

Amɛwaa onukpai akuu lɛ. Asafoŋ sɔɔlɔi lɛ ateŋ mɛi komɛi ji oblahii, ni amɛteŋ mɛi komɛi hu edara yɛ afii amli. Amɛhãa Nyɔŋmɔ mumɔ lɛ tsɔɔ amɛ gbɛ, anyɛɔ amuɔ afɔ̃ɔ amɛnɔ, ni amɛ fɛɛ amɛkɛ hiɛdɔɔ tsuɔ amɛsɔ̃i lɛ ahe nii. Amɛtsuɔ nitsumɔi srɔtoi ni he hiaa yɛ asafo lɛ mli kɛ Maŋtsɛyeli Asa lɛ nɔ, titri lɛ, nɔ ni kɔɔɔ nitsɔɔmɔ kɛ asafo lɛ nɔkwɛmɔ he. Enɛ yeɔ ebuaa asafoŋ onukpai lɛ ni amɛkɛ amɛjwɛŋmɔ maa nitsɔɔmɔ kɛ asafoŋbii lɛ asaramɔ nɔ.

Amɛtsuɔ nitsumɔi ni sɛɛnamɔi yɔɔ he. Ahãa asafoŋ sɔɔlɔi lɛ ekomɛi kwɛɔ shitaramɔ nɔ koni amɛkpee mɛi ni baa asafoŋ kpeei lɛ. Amɛteŋ mɛi komɛi kwɛɔ tsɔji ni awieɔ awoɔ mli lɛ anɔ, mɛi komɛi kwɛɔ woji anɔ, mɛi komɛi kwɛɔ asafo lɛ shika he akɔntaabuu lɛ nɔ, ni mɛi komɛi hu kwɛɔ shikpɔŋkuku ni ajaraa ahãa asafoŋbii lɛ anɔ. Amɛwaa hu kɛkuraa Maŋtsɛyeli Asa lɛ. Asafoŋ onukpai lɛ baanyɛ ahã amɛye amɛbua mɛi ni edara yɛ afii amli lɛ. Suɔmɔ mli ni asafoŋ sɔɔlɔi lɛ jɛɔ amɛtsuɔ nitsumɔ fɛɛ nitsumɔ ni akɛwoɔ amɛdɛŋ yɛ asafo lɛ mli lɛ hewɔ lɛ, asafoŋbii lɛ buɔ amɛ waa.​—1 Timoteo 3:13.

Amɛji Kristofoi hii ni feɔ nɔkwɛmɔnɔ kpakpa. Aholeɔ asafoŋ sɔɔlɔi yɛ Kristofoi asui kpakpai ni amɛjieɔ lɛ kpo lɛ ahewɔ. Bɔ ni amɛtsuɔ nifeemɔi ni akɛhãa amɛ yɛ asafoŋ kpeei ashishi lɛ ahe nii amɛhãa lɛ hãa wɔhemɔkɛyeli lɛ mli waa. Nɔkwɛmɔnɔ kpakpa ni amɛfeɔ yɛ shiɛmɔ nitsumɔ lɛ mli lɛ kanyaa wɔ koni wɔkɛ hiɛdɔɔ ashiɛ. Akɛni amɛ kɛ asafoŋ onukpai lɛ feɔ ekome hewɔ lɛ, amɛhãa miishɛɛ kɛ ekomefeemɔ hiɔ asafo lɛ mli. (Efesobii 4:16) Wɔsɛɛ lɛ, ekolɛ amɛ hu amɛbaashɛ taomɔ nii lɛ ahe, ni abaahã amɛsɔmɔ akɛ asafoŋ onukpai.

• Namɛi ji asafoŋ sɔɔlɔi?

• Mɛɛ gbɛ nɔ sɔɔlɔi lɛ yeɔ amɛbuaa koni nibii aya nɔ jogbaŋŋ yɛ asafo lɛ mli?

Kristofoi A-Greek Ŋmalɛ lɛ tsĩɔ Barnaba kɛ bɔfo Paulo tã waa. Hii nɛɛ sɔmɔ akɛ nɔkwɛlɔi gbɛfalɔi yɛ blema Kristofoi lɛ abeiaŋ ni amɛsara asafoi lɛ. Mɛni hewɔ? Amɛnyɛmimɛi Kristofoi lɛ ahilɛkɛhamɔ kã amɛtsui nɔ waa. Paulo kɛɛ akɛ eetao ‘eku esɛɛ ni eyasara nyɛmimɛi lɛ’ ni ekwɛ bɔ ni amɛyɔɔ. Ejɛ esuɔmɔ mli efã gbɛ shitoi ohai abɔ koni eyawo amɛ hewalɛ. (Bɔfoi 15:36) Nakai nɔŋŋ nɔkwɛlɔi gbɛfalɔi ni yɔɔ ŋmɛnɛ lɛ hu shweɔ ni amɛfee.

Amɛbaa koni amɛbawo wɔ hewalɛ. Kpokpaa nɔkwɛlɔ fɛɛ kpokpaa nɔkwɛlɔ saraa asafoi aaafee 20, ni eyeɔ otsi yɛ amɛteŋ eko fɛɛ eko ŋɔɔ, ni efeɔ enɛ shii enyɔ daa afi. Wɔbaanyɛ wɔná nyɛmimɛi hii nɛɛ kɛ amɛŋamɛi, kɛ́ amɛbote gbalashihilɛ mli lɛ, aniiashikpamɔi lɛ ahe sɛɛ waa. Amɛbɔɔ mɔdɛŋ waa akɛ amɛbaale onukpai kɛ gbekɛbii fɛɛ, ni amɛyɛ he miishɛɛ akɛ amɛbaafata wɔhe kɛya shiɛmɔ ni amɛkɛ wɔ aya wɔ-Biblia mli nikaselɔi lɛ aŋɔɔ. Nɔkwɛlɔi nɛɛ kɛ asafoŋ onukpai lɛ yasaraa asafoŋbii lɛ. Agbɛnɛ hu, amɛhãa wiemɔi yɛ asafoŋ kpeei, kpeei bibii, kɛ kpeei wuji ashishi ni amɛkɛwoɔ wɔ hewalɛ.​—Bɔfoi 15:35.

Amɛsusuɔ mɔ fɛɛ mɔ he. Bɔ ni asafoi lɛ jáa Nyɔŋmɔ amɛhãa lɛ ji nɔ titri ni kã kpokpaa nɔkwɛlɔi lɛ atsui nɔ waa. Amɛkɛ asafoŋ onukpai lɛ kɛ asafoŋ sɔɔlɔi lɛ kpeɔ ni amɛkwɛɔ bɔ ni asafo lɛ yaa ehiɛ ehãa, ni amɛwoɔ amɛ ŋaa yɛ bɔ ni amɛbaafee amɛtsu amɛsɔ̃i ahe nii jogbaŋŋ lɛ he. Amɛyeɔ amɛbuaa gbɛgbalɔi lɛ koni amɛnyɛ amɛtsu shiɛmɔ nitsumɔ lɛ jogbaŋŋ, ni amɛyɛ he miishɛɛ akɛ amɛbaale mɛi hei ni kɛ asafo lɛ bɔɔ lɛ kɛ bɔ ni amɛyaa amɛhiɛ amɛhãa. Nyɛmimɛi hii nɛɛ ateŋ mɔ fɛɛ mɔ jɛɔ etsuiŋ ekɛ ehe shãa afɔle, ni amɛji ‘wɔnanemɛi nitsulɔi yɛ wɔhilɛkɛhamɔ hewɔ.’ (2 Korintobii 8:23) Esa akɛ wɔkase amɛhemɔkɛyeli lɛ kɛ bɔ ni amɛkɛ amɛhe ehã kɛjáa Nyɔŋmɔ lɛ.​—Hebribii 13:7.

• Mɛni hewɔ kpokpaa nɔkwɛlɔi saraa asafoi lɛ?

• Te obaafee tɛŋŋ oná amɛsaramɔ lɛ he sɛɛ lɛ?

Kɛ́ adebɔɔ naa oshãra ba lɛ, Yehowa Odasefoi toɔ gbɛjianɔ amrɔ nɔŋŋ ni amɛyayeɔ amɛbuaa amɛnyɛmimɛi ni oshãra lɛ enina amɛ lɛ. Nakai ni wɔfeɔ lɛ tsɔɔ akɛ wɔsumɔɔ wɔnyɛmimɛi lɛ waa. (Yohane 13:34, 35; 1 Yohane 3:17, 18) Mɛɛ gbɛi anɔ wɔtsɔɔ wɔyeɔ wɔbuaa?

Wɔtsuɔ onia. Be ni hɔmɔ ko ni naa wa ba Yudea lɛ, Kristofoi ni yɔɔ Antiokia lɛ kɛ shika maje kɛyaye amɛbua amɛnyɛmimɛi Kristofoi lɛ. (Bɔfoi 11:27-30) Nakai nɔŋŋ hu kɛ́ wɔnu akɛ wɔnyɛmimɛi ni yɔɔ je lɛŋ hei srɔtoi lɛ kɛ jaramɔ shihilɛ miikpe lɛ, wɔjɛɔ wɔsafoi lɛ amli wɔtsuɔ onia kɛmajeɔ koni akɛhé nibii ni he hiaa amɛ.​—2 Korintobii 8:13-15.

Wɔyeɔ wɔbuaa yɛ gbɛi krokomɛi anɔ. Asafoŋ onukpai ni yɔɔ he ni oshãra lɛ eba yɛ lɛ taoɔ asafoŋbii lɛ ateŋ mɔ fɛɛ mɔ sɛɛ gbɛ ni amɛkwɛɔ akɛ amɛyɛ shweshweeshwe lo. Ajinafoi akuu ni kɛ yelikɛbuamɔ hãa lɛ kwɛɔ ni nyɛmimɛi lɛ aná niyenii, nu ni mli tse, atadei, wɔɔhe, kɛ tsofai. Odasefoi babaoo ni he esa yɛ nitsumɔi komɛi ni he baahia lɛ amli lɛ jɛɔ amɛsuɔmɔ mli ni amɛ diɛŋtsɛ amɛyaa hei nɛɛ ni amɛyayeɔ amɛbuaa loo amɛsaa shĩai kɛ Maŋtsɛyeli Asai ni efite lɛ. Ekomefeemɔ ni yɔɔ wɔteŋ lɛ kɛ niiashikpamɔ ni wɔná yɛ nitsumɔ ni wɔfeɔ ekome kɛtsuɔ lɛ mli lɛ hãa wɔnyɛɔ wɔtoɔ gbɛjianɔ oya nɔŋŋ kɛ́ hiamɔ lɛ ba. Wɔfeɔ “mɛi ni etsɔmɔ wɔwekumɛi yɛ hemɔkɛyeli lɛ mli lɛ” ejurɔ, shi kɛ́ ehe bahia lɛ, wɔwaa mɛi krokomɛi hu ekɔɔɔ he eko jamɔ mli ni amɛyɔɔ.​—Galatiabii 6:10.

Wɔjɛɔ Ŋmalɛ lɛ mli wɔshɛjeɔ amɛmii. Miishɛjemɔ he miihia mɛi ni oshãra enina amɛ lɛ waa. Yɛ be ni tamɔ nɛkɛ mli lɛ, Yehowa ni ji “miishɛjemɔ fɛɛ Nyɔŋmɔ lɛ” woɔ wɔ hewalɛ. (2 Korintobii 1:3, 4) Wɔkɛ miishɛɛ gbaa mɛi ni eyaje oshãra mli lɛ shiwoi ni yɔɔ Biblia lɛ mli lɛ, ni wɔhãa amɛnáa nɔmimaa akɛ etsɛŋ kwraa ni Nyɔŋmɔ Maŋtsɛyeli lɛ baajie oshãrai fɛɛ ni hãa wɔpiŋɔ lɛ kɛya.​—Kpojiemɔ 21:4.

• Mɛni hewɔ Odasefoi nyɛɔ amɛtsuɔ nibii ahe nii oya nɔŋŋ kɛ́ oshãra ba lɛ?

• Mɛɛ Ŋmalɛ mli miishɛjemɔi wɔbaanyɛ wɔkɛhã mɛi ni eje oshãra mli lɛ?

Be ni eshwɛ fioo ni Yesu baagbo lɛ, ekɛ ekaselɔi lɛ ateŋ mɛi ejwɛ, ni ji Petro, Yakobo, Yohane, kɛ Andrea gba sane ko. Be ni Yesu kɛ amɛ wieɔ lɛ, egba nibii ni baakadi naagbee gbii lɛ, ni ji be ni eba lɛ. Kɛkɛ ni ebi sane ko ni he hiaa waa, akɛ: “Namɔ tuuntu ji nyɔŋ anɔkwafo kɛ hiɛshikalɔ lɛ ni enuŋtsɔ lɛ kɛ lɛ eto ewebii lɛ anɔ koni ehã amɛ amɛniyenii yɛ be ni sa mli lɛ?” (Mateo 24:3, 45; Marko 13:3, 4) No mli lɛ, Yesu miiwo ekaselɔi lɛ shi akɛ, lɛ, ni ji ‘amɛnuŋtsɔ’ lɛ, baahala mɛi eto esɛɛnyiɛlɔi lɛ anɔ yɛ naagbee gbii lɛ amli koni amɛtsɔɔ esɛɛnyiɛlɔi lɛ Nyɔŋmɔ he nii be fɛɛ be. Namɛi baafee nyɔŋ nɛɛ?

Nyɔŋ lɛ ji Yesu sɛɛnyiɛlɔi ni afɔ amɛ mu lɛ ateŋ mɛi fioo ni tsuɔ nii akɛ kuu. “Nyɔŋ” lɛ ji Yehowa Odasefoi A-Gbɛtsɔɔmɔ Kuu lɛ. Nyɔŋ lɛ hãa mɛi fɛɛ ni jáa Yehowa lɛ mumɔŋ niyenii yɛ be naa. Wɔkwɛɔ nyɔŋ anɔkwafo nɛɛ gbɛ koni eya nɔ ehã wɔ ‘wɔniyenii bɔ ni sa yɛ be ni sa mli.’​—Luka 12:42.

Nyɔŋ lɛ kwɛɔ Nyɔŋmɔ shĩa lɛ nɔ. (1 Timoteo 3:15) Yesu kɛ nitsumɔ ko ni tsii wo nyɔŋ lɛ dɛŋ akɛ ekwɛ Yehowa gbɛjianɔtoo lɛ fã ni yɔɔ shikpɔŋ lɛ nɔ lɛ nɔ. Enɛ tsɔɔ akɛ, nyɔŋ lɛ baakwɛ heloonaa nibii fɛɛ ni asafo lɛ yɔɔ lɛ nɔ, ebaanyiɛ hiɛ yɛ shiɛmɔ nitsumɔ lɛ mli, ni ebaatsɔɔ wɔ nii kɛtsɔ wɔsafoi lɛ anɔ. “Nyɔŋ anɔkwafo kɛ hiɛshikalɔ lɛ” hãa wɔ mumɔŋ niyenii, loo etsɔɔ wɔ Nyɔŋmɔ he nii kɛtsɔ woji, vidioi, kɛ nibii krokomɛi ni wɔkɛtsuɔ nii yɛ shiɛmɔ nitsumɔ lɛ mli lɛ, kɛ agbɛnɛ hu, kɛtsɔ asafoŋ kpeei kɛ kpeei krokomɛi ashishi nifeemɔi anɔ, koni wɔná nibii ni he hiaa wɔ lɛ yɛ be ni sa mli.

Nyɔŋ lɛ ji anɔkwafo, ejaakɛ eshiɛɔ Biblia mli anɔkwalei lɛ ni afã lɛ akɛ eshiɛ lɛ, ni eji hiɛshikalɔ hu, ejaakɛ ekɛ hiɛshikamɔ kwɛɔ Kristo nibii ni yɔɔ shikpɔŋ lɛ nɔ lɛ anɔ. (Bɔfoi 10:42) Yehowa miiye eebua nyɔŋ lɛ, ni eejɔɔ nyɔŋ lɛ nitsumɔ lɛ nɔ. Enɛ hewɔ lɛ, asafo lɛ miishwere, ni nyɔŋ lɛ miiya nɔ eetsɔɔ wɔ Nyɔŋmɔ he nii babaoo.​—Yesaia 60:22; 65:13.

• Namɔ Yesu hala akɛ etsɔɔ ekaselɔi lɛ Nyɔŋmɔ he nii?

• Mɛni hewɔ wɔbaanyɛ wɔkɛɛ akɛ nyɔŋ lɛ ji anɔkwafo ni ehiɛ kã shi?

Yɛ blema Kristofoi ni afɔ amɛ mu lɛ abeiaŋ lɛ, kuu fioo ko, ni ji “bɔfoi lɛ kɛ onukpai lɛ” ni yɔɔ Yerusalem lɛ, ji mɛi ni sɔmɔ akɛ gbɛtsɔɔmɔ kuu. Amɛkpɛ yiŋ srɔtoi ni he hiaa waa ni ye ebua Kristofoi fɛɛ ni yɔɔ asafo lɛ mli lɛ. (Bɔfoi 15:2) Dani amɛbaakpɛ amɛyiŋ yɛ sane ko he lɛ, amɛkwɛɔ nɔ ni Ŋmalɛ lɛ ewie yɛ nakai sane lɛ he ni amɛsusuɔ he, ni amɛhãa Nyɔŋmɔ mumɔ lɛ tsɔɔ amɛ gbɛ. (Bɔfoi 15:25) Ŋmɛnɛ lɛ, nakai nɔŋŋ Gbɛtsɔɔmɔ Kuu lɛ feɔ.

Nyɔŋmɔ tsɔɔ amɛnɔ ehãa afeɔ esuɔmɔnaa nii. Nyɛmimɛi hii ni afɔ amɛ mu ni sɔmɔɔ akɛ Gbɛtsɔɔmɔ Kuu lɛ yɛ Nyɔŋmɔ Wiemɔ lɛ he miishɛɛ waa, ni amɛle bɔ ni atoɔ wɔnitsumɔ lɛ he gbɛjianɔ kɛ bɔ ni atsɔɔ Ŋmalɛ lɛ nɔ atsuɔ saji ahe nii. Amɛkpeɔ daa otsi ni amɛsusuɔ nyɛmimɛi ni yɔɔ jeŋ fɛɛ lɛ ahiamɔ nii ahe. Amɛkɛ gbɛtsɔɔmɔi ni jɛ Biblia lɛ mli lɛ hãa kɛtsɔ woji ni amɛŋmalaa lɛ loo nɔkwɛlɔi gbɛfalɔi kɛ mɛi krokomɛi anɔ, tamɔ bɔ ni blema gbɛtsɔɔmɔ kuu lɛ fee lɛ nɔŋŋ. Enɛ hãa Nyɔŋmɔ webii lɛ asusumɔi kɛ amɛnifeemɔi fɛɛ feɔ ekome. (Bɔfoi 16:4, 5) Gbɛtsɔɔmɔ Kuu lɛ kwɛɔ gbɛjianɔ ni atoɔ kɛtsɔɔ wɔ Nyɔŋmɔ he nii lɛ nɔ, amɛwoɔ wɔ fɛɛ hewalɛ ni wɔkɛ Maŋtsɛyeli shiɛmɔ nitsumɔ lɛ afee nɔ titri yɛ wɔshihilɛ mli, ni amɛkwɛɔ koni ahala nyɛmimɛi hii kɛhã sɔɔmɔ hegbɛi.

Amɛhãa Nyɔŋmɔ mumɔ lɛ tsɔɔ amɛ gbɛ. Gbɛtsɔɔmɔ Kuu lɛ hãa Yehowa, ni ji Jeŋ Muu Fɛɛ Nɔyelɔ lɛ, kɛ Yesu, ni ji asafo lɛ Yitso lɛ tsɔɔ lɛ gbɛ. (1 Korintobii 11:3; Efesobii 5:23) Gbɛtsɔɔmɔ Kuu lɛ mli bii lɛ ebuuu amɛhe akɛ amɛji Nyɔŋmɔ webii lɛ ahiɛnyiɛlɔi. Amɛ kɛ Kristofoi krokomɛi ni afɔ amɛ mu lɛ fɛɛ nyiɛɔ Yesu, ni ji “Gwantɛŋbi lɛ sɛɛ kɛyaa he fɛɛ he ni eyaa.” (Kpojiemɔ 14:4) Gbɛtsɔɔmɔ Kuu lɛ mli bii lɛ miisumɔ ni wɔsɔle wɔhã amɛ koni amɛnyɛ amɛtsu amɛnitsumɔ lɛ jogbaŋŋ.

• Namɛi sɔmɔ akɛ gbɛtsɔɔmɔ kuu lɛ yɛ blema?

• Ŋmɛnɛ lɛ, mɛɛ gbɛ nɔ Gbɛtsɔɔmɔ Kuu lɛ hãa Nyɔŋmɔ tsɔɔ lɛ gbɛ?

Atsɛɔ hei ni Yehowa Odasefoi jɛɔ amɛtoɔ nibii ahe gbɛjianɔ koni amɛnyɛ amɛtsu shiɛmɔ nitsumɔ lɛ akɛ, Betel. Hei nɛɛ nɔŋŋ ajɛɔ akwɛɔ nitsumɔ nɛɛ nɔ. Gbɛ́i Betel lɛ sa waa, ejaakɛ Hebri wiemɔ Betel lɛ shishi ji, “Nyɔŋmɔ Shĩa.” (1 Mose 28:17, 19, shishigbɛ niŋmaa) Ayɛ Betel yɛ je lɛŋ hei srɔtoisrɔtoi. Gbɛtsɔɔmɔ Kuu lɛ sɔmɔɔ yɛ jeŋ fɛɛ nitsumɔhe yitso lɛ yɛ New York State, yɛ U.S.A., ni amɛjɛɔ jɛmɛ amɛkwɛɔ nitsumɔ ni atsuɔ yɛ nitsumɔhe niji srɔtoi lɛ amli lɛ nɔ. Mɛi ni sɔmɔɔ yɛ nitsumɔhe niji lɛ ni feɔ Betel weku lɛ. Amɛji weku lɛɛlɛŋ, ejaakɛ amɛyɛ he kome, amɛfeɔ ekome kɛtsuɔ nii, amɛfeɔ ekome kɛyeɔ nii, ni amɛfeɔ ekome kɛkaseɔ Biblia lɛ.​—Lala 133:1.

Esoro Betel kwraa, ejaakɛ mɛi ni tsuɔ nii yɛ jɛmɛ lɛ hiɔ shi akɛ weku, ni amɛkɛ amɛhe shãa afɔle amɛhãa mɛi krokomɛi. Mɛi fɛɛ ni sɔmɔɔ yɛ Betel lɛ ji Kristofoi ni ejɔɔ amɛwala nɔ amɛhã Nyɔŋmɔ akɛ amɛbaafee esuɔmɔnaa nii, ni amɛkɛ amɛbe fɛɛ tsuɔ nii koni Maŋtsɛyeli lɛ he nibii lɛ aya hiɛ. (Mateo 6:33) Awooo amɛteŋ mɔ ko mɔ ko nyɔmɔ, shi ahãa amɛ wɔɔhe, niyenii, kɛ shika ni amɛbaanyɛ amɛkɛhé nibii komɛi ni he baahia amɛ. Mɔ fɛɛ mɔ ni yɔɔ Betel lɛ yɛ enitsumɔ; mɛi komɛi tsuɔ nii yɛ ɔfis, mɛi komɛi hoɔ nii, ni mɛi komɛi hu saa he ni ayeɔ nii yɛ lɛ. Mɛi komɛi kalaa woji, mɛi komɛi saa tsũi amli, mɛi komɛi fɔɔ nii ahe, mɛi komɛi kuraa shĩa lɛ, ni mɛi komɛi hu tsuɔ nibii krokomɛi.

Nitsumɔ ni atsuɔ yɛ Betel lɛ yeɔ ebuaa ni anyɛɔ ashiɛɔ Maŋtsɛyeli lɛ he sane lɛ. Oti titri ni ma mɛi fɛɛ ni tsuɔ nii yɛ Betel lɛ ahiɛ ji, ni amɛhã mɛi babaoo ale anɔkwalei ni yɔɔ Biblia lɛ mli lɛ. Akɛ nɔkwɛmɔnɔ lɛ, susumɔ wolo nɛɛ ni ohiɛ lɛ he okwɛ. Gbɛtsɔɔmɔ Kuu lɛ kwɛ ni aŋma. No sɛɛ lɛ, akɛmaje wiemɔ shishitsɔɔmɔ kui ohai abɔ yɛ je lɛŋ hei srɔtoi kɛtsɔ Intanɛt lɛ nɔ. Be ni atsɔɔ shishi agbe naa lɛ, akɛ tsɔji ni kalaa woji oyayaayai kala yɛ Betel nitsumɔhei ni akalaa woji yɛ lɛ, kɛkɛ ni akɛwo meele mli ni akɛmaje asafoi aaafee 120,000 ni yɔɔ jeŋ fɛɛ lɛ. Nitsumɔ ni Betel weku lɛ mli bii lɛ tsuɔ lɛ yeɔ ebuaa ni anyɛɔ atsuɔ nitsumɔ ni he hiaa fe fɛɛ ŋmɛnɛ lɛ, ni ji, sane kpakpa lɛ shiɛmɔ lɛ.​—Marko 13:10.

• Namɛi sɔmɔɔ yɛ Betel, ni mɛɛ gbɛ nɔ atsɔɔ akwɛɔ amɛ?

• Mɛɛ nitsumɔ ni he hiaa waa mɛi ni tsuɔ nii yɛ Betel lɛ yeɔ amɛbuaa ni anyɛɔ atsuɔ?

Betel weku lɛ mli bii lɛ tsuɔ nitsumɔi srɔtoi. Amɛteŋ mɛi komɛi tsɔɔ wiemɔ shishi, mɛi komɛi kalaa magazin kɛ woji, mɛi komɛi kwɛɔ ni asafoi lɛ anine shɛɔ woji ni amɛshɛ lɛ anɔ, mɛi komɛi feɔ vidioi kɛ rikɔdiŋ srɔtoi, ni mɛi komɛi hu tsuɔ nibii krokomɛi. Nibii fɛɛ ni amɛtsuɔ lɛ yeɔ ebuaa ni anyɛɔ atsuɔ shiɛmɔ nitsumɔ lɛ yɛ maŋ loo maji ni nitsumɔhe nine lɛ kwɛɔ nɔ lɛ anɔ.

Nitsumɔhe Nine Ajinafoi Akuu lɛ kwɛɔ nitsumɔ lɛ nɔ. Gbɛtsɔɔmɔ Kuu lɛ halaa asafoŋ onukpai etɛ loo nɔ ni fe nakai ni sa jogbaŋŋ ni amɛsɔmɔ akɛ Nitsumɔhe Nine Ajinafoi Akuu ni amɛkwɛ nitsumɔ ni atsuɔ yɛ nitsumɔhe nine lɛ nɔ. Amɛhãa Gbɛtsɔɔmɔ Kuu lɛ leɔ bɔ ni nitsumɔ lɛ yaa nɔ ehãa kɛ ekolɛ naagbai ni nyɛmimɛi lɛ kɛmiikpe yɛ maji ni amɛkwɛɔ nɔ lɛ anɔ. Enɛ yeɔ ebuaa Gbɛtsɔɔmɔ Kuu lɛ ni amɛna saji ni esa akɛ amɛwie he yɛ woji, vidioi, kɛ nibii krokomɛi ni abaafee wɔsɛɛ lɛ amli, kɛ agbɛnɛ hu, yɛ asafoŋ kpeei kɛ kpeei wuji ashishi. Gbɛtsɔɔmɔ Kuu lɛ najiaŋdamɔlɔi yasaraa nitsumɔhe niji lɛ yɛ be kɛ beiaŋ. Kɛ́ amɛtee lɛ, amɛkɛ gbɛtsɔɔmɔ hãa Nitsumɔhe Nine Ajinafoi Akuu lɛ koni no aye abua amɛ ni amɛnyɛ amɛtsu amɛnitsumɔ lɛ jogbaŋŋ. (Abɛi 11:14) Agbɛnɛ hu, atoɔ nifeemɔ krɛdɛɛ ko he gbɛjianɔ ahãa nyɛmimɛi ni yɔɔ nitsumɔhe nine lɛ shikpɔŋkuku lɛ mli lɛ, ni yɛ nifeemɔ nɛɛ shishi lɛ, nitsumɔhe yitso najiaŋdamɔlɔ lɛ hãa wiemɔ kɛwoɔ amɛ hewalɛ.

Ajɛɔ jɛmɛ ayeɔ abuaa asafoi lɛ. Nyɛmimɛi hii ni yɔɔ nitsumɔhe nine lɛ ateŋ mɛi komɛi kwɛɔ kɛji ehe miihia ni ato asafoi hei. Amɛteŋ mɛi komɛi hu kwɛɔ nitsumɔ ni gbɛgbalɔi, maŋsɛɛ sɔɔlɔi, kɛ kpokpaa nɔkwɛlɔi ni sɔmɔɔ yɛ nitsumɔhe nine lɛ shikpɔŋkuku lɛ mli lɛ tsuɔ lɛ nɔ. Amɛtoɔ kpeei bibii kɛ kpeei wuji ahe gbɛjianɔ, amɛkwɛɔ ni amamɔɔ Maŋtsɛyeli Asai, ni amɛkwɛɔ hu ni akɛ woji majeɔ asafoi lɛ. Nɔ fɛɛ nɔ ni atsuɔ yɛ nitsumɔhe nine lɛ yeɔ ebuaa ni anyɛɔ atsuɔ shiɛmɔ nitsumɔ lɛ jogbaŋŋ.​—1 Korintobii 14:33, 40.

• Mɛɛ gbɛ nɔ Nitsumɔhe Nine Ajinafoi Akuu lɛ yeɔ ebuaa Gbɛtsɔɔmɔ Kuu lɛ?

• Mɛni atsuɔ yɛ nitsumɔhe nine lɛ?

Bɔ ni afee ni wɔnyɛ wɔjaje “sane kpakpa” lɛ wɔtsɔɔ “jeŋmaŋ fɛɛ jeŋmaŋ kɛ weku fɛɛ weku, kɛ wiemɔ fɛɛ wiemɔ, kɛ gbɔmɛi srɔtoi fɛɛ” lɛ, wɔkalaa woji yɛ wiemɔi fe 900 amli. (Kpojiemɔ 14:6) Te wɔfeɔ tɛŋŋ wɔtsuɔ nitsumɔ ni wa nɛɛ? Wɔyɛ niŋmalɔi akuu yɛ jeŋ fɛɛ kɛ wiemɔi ashishitsɔɔlɔi ni etuu amɛhe amɛhã ni yeɔ amɛbuaa wɔ kɛtsuɔ enɛ, ni amɛ fɛɛ amɛji Yehowa Odasefoi.

Aŋmaa yɛ Blɔfo mli klɛŋklɛŋ. Gbɛtsɔɔmɔ Kuu lɛ kwɛɔ nitsumɔ ni Niŋmaa Nitsumɔhe ni yɔɔ wɔnitsumɔhe yitso lɛ tsuɔ lɛ nɔ. Niŋmaa Nitsumɔhe lɛ toɔ niŋmalɔi fɛɛ ni yɔɔ nitsumɔhe yitso lɛ kɛ mɛi ni yɔɔ nitsumɔhe niji krokomɛi amli lɛ anitsumɔ lɛ he gbɛjianɔ. Akɛni wɔniŋmalɔi akuu lɛ mli bii lɛ yɛ maji srɔtoi anɔ hewɔ lɛ, ehãa wɔŋmalaa saji ni kɔɔ mɛi srɔtoi ashihilɛ he, ni no hãa anyaa wɔwoji lɛ ahe yɛ jeŋ fɛɛ.

Akɛ nɔ ni aŋma lɛ majeɔ wiemɔi ashishitsɔɔlɔi lɛ. Kɛ́ akwɛ nɔ ni aŋma lɛ mli ni akpɛlɛ nɔ lɛ, akɛmajeɔ kɛtsɔɔ Intanɛt lɛ nɔ kɛyahãa wiemɔi ashishitsɔɔlɔi akui ni yɔɔ je lɛŋ hei srɔtoi lɛ ni amɛ hu amɛtsɔɔ shishi, amɛkaneɔ mli, ni amɛkwɛɔ akɛ nɔ fɛɛ nɔ ja lo. Amɛbɔɔ mɔdɛŋ akɛ amɛbaahala ‘anɔkwale wiemɔi ni ja’ ni baahã shishinumɔ ni yɔɔ Blɔfo nɔ lɛ mli lɛ kɛ amɛnɔ lɛ akpã gbee.​—Jajelɔ 12:10.

Kɔmpiuta yeɔ ebuaa ni ehãa atsuɔ he nii oya. Anyɛŋ akɛ kɔmpiuta aye niŋmalɔi kɛ wiemɔi ashishitsɔɔlɔi ni ji adesai lɛ anajiaŋ. Kɛ̃lɛ, kɔmpiuta yeɔ ebuaa ni ehãa anyɛɔ atsuɔ nitsumɔ lɛ oyayaayai. Yehowa Odasefoi efee nɔ ko ni akɛwoɔ kɔmpiuta nɔ ni atsɛɔ lɛ yɛ Blɔfo mli akɛ Multilanguage Electronic Publishing System (MEPS) ní hãa atswaa wiemɔi okadii lɛ yɛ wiemɔi ohai abɔ mli, ni anyɛɔ akɛ mfonirii hɔlɔɔ mli, ni akalaa.

Mɛni hewɔ wɔbɔɔ mɔdɛŋ waa wɔtsɔɔ wiemɔi ashishi kɛyaa wiemɔi ni mɛi akpei fioo pɛ po wieɔ lɛ amli lɛ? Ejaakɛ Yehowa suɔmɔnaa nii ji, “ahere gbɔmɛi srɔtoi fɛɛ yiwala ni agbɛnɛ hu, amɛná anɔkwale lɛ he nilee krɔŋŋ lɛ.”​—1 Timoteo 2:3, 4.

• Mɛɛ gbɛ nɔ atsɔɔ aŋmalaa wɔwoji lɛ?

• Mɛni hewɔ wɔtsɔɔ wɔwoji lɛ ashishi kɛyaa wiemɔi babaoo amli lɛ?

Daa afi lɛ, wɔgbɛjianɔtoo lɛ kalaa ni ejaraa Bibliai kɛ woji krokomɛi akpekpei ohai abɔ ni aheee nɔ ko. Wɔmamɔɔ Maŋtsɛyeli Asai kɛ nitsumɔhe niji ni wɔkuraa amɛ. Wɔkwɛɔ Betelbii kɛ maŋsɛɛ sɔɔlɔi akpei abɔ, ni wɔyeɔ wɔbuaa kɛ́ adebɔɔ naa oshãra ba. No hewɔ lɛ, ekolɛ obaabi akɛ, ‘Nɛgbɛ anáa shika yɛ kɛfeɔ nibii nɛɛ fɛɛ?’

Wɔheee too, wɔheee mlijaa nyɔŋma, ni wɔkɛ plɛte tsɔɔɔ mɛi ahiɛ kɛheee shika. Eyɛ mli akɛ shika ni wɔkɛfiɔ wɔshiɛmɔ nitsumɔ lɛ sɛɛ lɛ fa waa moŋ, shi wɔbalaaa shika. Nɔ ni fa fe afii 100 ni eho nɛɛ, Buu-Mɔɔ wolo tɛtrɛɛ ni ji enyɔ nɔ ní afee lɛ tsɔɔ mli akɛ, wɔheɔ wɔyeɔ akɛ Yehowa fiɔ wɔsɛɛ, no hewɔ lɛ, “wɔkpaŋ mɛi fai ni asaŋ wɔbiŋ mɛi koni amɛye amɛbua wɔ”​—ni wɔfeko nakai hu!​—Mateo 10:8.

Atsuɔ onia kɛyeɔ abuaa wɔnitsumɔ lɛ. Mɛi babaoo nyaa wɔ-Biblia tsɔsemɔ nitsumɔ lɛ he ni amɛtsuɔ onia kɛfiɔ sɛɛ. Odasefoi lɛ diɛŋtsɛ hu jɛɔ amɛsuɔmɔ mli amɛkɛ amɛbe, amɛhewalɛ, amɛshika, kɛ amɛnibii krokomɛi fiɔ Nyɔŋmɔ suɔmɔnaa nii ni afeɔ yɛ jeŋ fɛɛ lɛ sɛɛ. (1 Kronika 29:9) Ayɛ oniatsumɔ adekai yɛ Maŋtsɛyeli Asai kɛ Kpee Asai lɛ anɔ koni mɛi ni miisumɔ ni amɛtsu onia lɛ kɛ amɛshika lɛ ayawo mli. Aloo abaanyɛ atsu onia kɛtsɔ wɔwɛbsaiti lɛ, ni ji jw.org lɛ nɔ. Bei pii lɛ, mɛi ni tsuɔ onia lɛ ji mɛi ni bɛ nɔ ko, amɛtamɔ yoo okulafo ohiafo lɛ ni kɛ kapɛji bibii enyɔ wo sɔlemɔ shĩa lɛ onia adeka lɛ mli ni Yesu wie ehe ekpakpa lɛ. (Luka 21:1-4) No hewɔ lɛ, mɔ fɛɛ mɔ baanyɛ “ekɛ nɔ ko ato” koni enyɛ ehã “bɔ ni ekpɛ mli yɛ etsui mli” lɛ.​—1 Korintobii 16:2; 2 Korintobii 9:7.

Wɔyɛ nɔmimaa akɛ, Yehowa baaya nɔ atsirɛ mɛi ni miitao ‘amɛkɛ amɛnibii ni jara wa lɛ awo ehiɛ nyam’ lɛ ni amɛya nɔ amɛfi Maŋtsɛyeli nitsumɔ lɛ sɛɛ koni anyɛ afee esuɔmɔnaa nii kwraa.​—Abɛi 3:9.

• Mɛni hãa esoroɔ wɔgbɛjianɔtoo lɛ yɛ jamɔi krokomɛi ahe?

• Mɛni akɛ onia ni atsuɔ lɛ feɔ?

Atsɛɔ wɔjamɔhe lɛ Maŋtsɛyeli Asa, ejaakɛ Biblia mli tsɔɔmɔ ni yaa nɔ yɛ jɛmɛ lɛ gbalaa jwɛŋmɔ kɛyaa Nyɔŋmɔ Maŋtsɛyeli lɛ, ni ji Yesu shiɛmɔ lɛ saneyitso lɛ nɔ titri.​—Luka 8:1.

Jɛmɛ ji akutso lɛ mli he ni ajáa Nyɔŋmɔ yɛ diɛŋtsɛ. Jɛmɛ ji akutso lɛ mli he ni ajɛɔ atoɔ Maŋtsɛyeli lɛ he sane kpakpa lɛ shiɛmɔ lɛ he gbɛjianɔ. (Mateo 24:14) Esoro Maŋtsɛyeli Asai lɛ eko fɛɛ eko dalɛ kɛ bɔ ni ama lɛ ahã, shi amɛbɛ haŋtsii, ni yɛ hei pii lɛ, asafoi ni fa fe ekome kpeɔ yɛ jɛmɛ. Yɛ nyɛsɛɛ afii nɛɛ amli lɛ, wɔmamɔ Maŋtsɛyeli Asai akpei nyɔŋmai abɔ (kɛ́ aja mli lɛ, wɔmamɔɔ enumɔ daa gbi) bɔ ni afee ni asafoi babaoo ni atoɔ shishi lɛ aná he ko akpe yɛ. Te wɔfeɔ tɛŋŋ wɔfeɔ enɛ lɛ?​—Mateo 19:26.

Asafoi lɛ fɛɛ tsuɔ onia kɛwoɔ fotro pɔtɛɛ ko mli ni akɛmamɔɔ. Akɛ shikai ni anáa yɛ fotro nɛɛ mli lɛ majeɔ nitsumɔhe nine lɛ ni amɛkɛmamɔɔ Maŋtsɛyeli Asai amɛhãa asafoi ni eko he miihia amɛ lɛ loo amɛkɛtsakeɔ bɔ ni amamɔ asai komɛi ahã lɛ.

Mɛi ni jɛ shihilɛi srɔtoi amli ni kɛ amɛhe ehã ni awooo amɛ nyɔmɔ mamɔɔ. Ato Maŋtsɛyeli Asai Amaamɔ Kui ahe gbɛjianɔ yɛ maji babaoo anɔ. Tsumaa sɔɔlɔi ni ajara amɛ awo kui amli kɛ mɛi krokomɛi ni kɛ amɛhe ehã fãa gbɛ kɛjɛɔ asafo kome mli kɛyaa ekroko mli yɛ maŋ kome too lɛ nɔŋŋ mli, ni akrowai po fata he, koni amɛyaye amɛbua asafoi lɛ kɛmamɔ amɛ-Maŋtsɛyeli Asai. Yɛ maji krokomɛi anɔ lɛ, ahala Odasefoi ni he esa koni amɛkwɛ ni amamɔ Maŋtsɛyeli Asai ni asaa ekomɛi hu yɛ kpokpai ni akɛhã amɛ lɛ anɔ. Eyɛ mli akɛ mɛi babaoo ni le ŋaa nitsumɔ lɛ hu kɛ amɛhe hãa moŋ, shi he fɛɛ he ni amaa tsũ lɛ eko yɛ lɛ, asafo ni yɔɔ jɛmɛ lɛ mli bii titri ji mɛi ni kɛ amɛhe hãa. Nɔ ni hãa anyɛɔ atsuɔ enɛ ji Yehowa mumɔ lɛ kɛ ewebii ni jɛɔ amɛsuɔmɔ mli amɛkɛ amɛhe hãa lɛ.​—Lala 127:1; Kolosebii 3:23.

• Mɛni hewɔ atsɛɔ wɔjamɔhe lɛ Maŋtsɛyeli Asa lɛ?

• Te feɔ tɛŋŋ ni anyɛɔ amamɔɔ Maŋtsɛyeli Asai yɛ jeŋ fɛɛ lɛ?

Nyɔŋmɔ gbɛ́i krɔŋkrɔŋ lɛ kã Yehowa Odasefoi A-Maŋtsɛyeli Asai lɛ eko fɛɛ eko nɔ. No hewɔ lɛ, Maŋtsɛyeli Asa lɛ nɔ ni wɔbaasaa, ni wɔhã efee nɔ ni yɔɔ hiŋmɛi nɔ, ni wɔkura hu lɛ ji hegbɛ kpele ni wɔná, ni eji wɔjamɔ krɔŋŋ lɛ fã ko ni he hiaa waa. Mɔ fɛɛ mɔ baanyɛ ekɛ ehe awo mli.

Ye obua ni asaa jɛmɛ kɛ́ akpa asafoŋ kpeei. Daa kɛ́ akpa asafoŋ kpeei lɛ, nyɛmimɛi hii kɛ yei kɛ be kukuoo ko saa Maŋtsɛyeli Asa lɛ nɔ kɛ miishɛɛ. Yɛ be kɛ beiaŋ lɛ, asaa jɛmɛ jogbaŋŋ fe bɔ ni afeɔ kɛ́ akpa asafoŋ kpeei lɛ. Asafoŋ onukpa loo asafoŋ sɔɔlɔ ko kwɛɔ nitsumɔ lɛ nɔ, ni enyiɛɔ gbɛtsɔɔmɔ ni akɛhã kɛhã jɛmɛ saamɔ lɛ sɛɛ ni ekɛfeɔ enɛ. Yɛ bɔ ni jɛmɛ yɔɔ lɛ naa lɛ, abɛɔ ni ashaa shikpɔŋ lɛ, akpalaa mulu ni yɔɔ jɛmɛ lɛ, atsumɔɔ sɛi lɛ ahe ni atoɔ amɛ jogbaŋŋ, asaa nushwiemɔhe lɛ, atsumɔɔ samfɛji amli kɛ ashwishwɛi lɛ ahiɛ, atsiɔ jwɛi lɛ ashwieɔ, ni asaa loo ahuɔ ehewɔ. Kɛ́ hooo kwraa lɛ, shi kome yɛ afi mli lɛ, atoɔ be ko ni akɛyasaa jɛmɛ fe bɔ ni afeɔ lɛ daa lɛ. Kɛ́ wɔhã wɔbii lɛ fata wɔhe kɛsaa jɛmɛ lɛ, ehãa amɛnáa bulɛ kɛhãa wɔjamɔhe lɛ.​—Jajelɔ 5:1.

Ye obua kɛsaa nibii ni efite yɛ jɛmɛ lɛ. Daa afi lɛ akwɛɔ bɔ ni Maŋtsɛyeli Asa lɛ mli kɛ ehewɔ shikamɔ yɔɔ hã. Enɛ yeɔ ebuaa ni asaa nibii ni efite yɛ asa lɛ nɔ lɛ be fɛɛ be, ni ehãaa afite shika bɔ ni esaaa. (2 Kronika 24:13; 34:10) Maŋtsɛyeli Asa ni he tse ni akuraa lɛ jogbaŋŋ lɛ sa kɛhã wɔ-Nyɔŋmɔ lɛ jamɔ. Wɔhe ni wɔkɛwoɔ nitsumɔ nɛɛ mli lɛ tsɔɔ bɔ ni Yehowa kɛ he ni wɔjáa lɛ yɛ lɛ kã wɔtsui nɔ hã. (Lala 122:1) Enɛ hu hãa mɛi ni yɔɔ wɔkutso lɛ mli lɛ náa wɔhe jwɛŋmɔ kpakpa.​—2 Korintobii 6:3.

• Mɛni hewɔ esaaa akɛ wɔkuɔ wɔhiɛ wɔshwieɔ wɔjamɔhe lɛ nɔ lɛ?

• Mɛɛ gbɛjianɔ ato kɛhã Maŋtsɛyeli Asa lɛ nɔ saamɔ?

Ani obaasumɔ ni otao sane ko mli koni Biblia mli nilee ni oyɔɔ lɛ aya hiɛ? Ani ootao ole ŋmalɛ pɔtɛɛ ko loo mɔ ko, loo he ko, loo nɔ ko ni atsĩ tã yɛ Biblia lɛ mli lɛ he nii babaoo? Aloo ekolɛ ootao okwɛ akɛ Nyɔŋmɔ Wiemɔ lɛ baanyɛ aye abua bo kɛtsu onaagba ko he nii? Kɛ́ nakai lɛ, taomɔ nii amli yɛ wojiatoohe ni yɔɔ Maŋtsɛyeli Asa lɛ nɔ lɛ.

Ehãa wɔnáa nibii ni akɛtaoɔ saji amli. Eeenyɛ efee akɛ, obɛ Yehowa Odasefoi a-Biblia kasemɔ woji ni yɔɔ bo diɛŋtsɛ owiemɔ mli lɛ fɛɛ eko. Shi woji ni afee nyɛsɛɛ nɛɛ ateŋ babaoo yɛ wojiatoohe ni yɔɔ Maŋtsɛyeli Asa lɛ nɔ lɛ. Ekolɛ ayɛ Biblia shishitsɔɔmɔi srɔtoi, dishinari, kɛ woji krokomɛi ni akɛtaoɔ nii amli. Obaanyɛ oya wojiatoohe nɛɛ dani aje asafoŋ kpee shishi loo be ni akpa. Kɛ́ kɔmpiuta yɛ jɛmɛ lɛ, ekolɛ obaana Watchtower Library lɛ yɛ nɔ. Enɛ ji program ko ni akɛwoɔ kɔmpiuta nɔ ni akɛ wɔwoji srɔtoi babaoo ewo nɔ ni abaanyɛ akɛtao sane ko, loo wiemɔ ko, loo ŋmalɛ ko mli yɛ gbɛ ni waaa kwraa nɔ.

Ewaa skulbii ni yɔɔ Wɔshiɛmɔ Kɛ Wɔshihilɛ Kpee lɛ mli lɛ. Obaanyɛ oya wojiatoohe ni yɔɔ Maŋtsɛyeli Asa lɛ nɔ lɛ koni oyasaa ohe kɛhã onifeemɔi. Wɔshiɛmɔ Kɛ Wɔshihilɛ Kpee nɔkwɛlɔ lɛ ji mɔ ni kwɛɔ wojiatoohe lɛ nɔ. Lɛ ji mɔ ni esa akɛ ekwɛ ni aná woji hei ni baa lɛ eko awo wojiatoohe lɛ ni agbɛnɛ hu, ekwɛ ni ato woji lɛ jogbaŋŋ. Lɛ loo mɔ ni kɛ bo kaseɔ nii lɛ baanyɛ atsɔɔ bo bɔ ni obaafee otao nii amli. Shi esaaa akɛ akɔlɔɔ woji nɛɛ kɛshĩɔ Maŋtsɛyeli Asa lɛ nɔ. Ni agbɛnɛ hu, esa akɛ wɔhiɛ woji nɛɛ jogbaŋŋ, ni esaaa akɛ wɔŋmalaa mli.

Biblia lɛ kɛɔ wɔ akɛ, kɛ́ wɔmiitao ‘wɔná Nyɔŋmɔ he nilee’ lɛ, esa akɛ wɔtao tamɔ ataoɔ “jwetrii ni aŋɔtee.” (Abɛi 2:1-5, shishigbɛ niŋmaa) Wojiatoohe ni yɔɔ Maŋtsɛyeli Asa lɛ nɔ lɛ baanyɛ aye abua bo ni oje oniiamlitaomɔ lɛ shishi.

• Mɛɛ nibii ni akɛtaoɔ nii amli yɔɔ wojiatoohe ni yɔɔ Maŋtsɛyeli Asa lɛ nɔ lɛ?

• Namɔ baanyɛ aye abua bo ni ole bɔ ni obaafee otao nii amli jogbaŋŋ yɛ wojiatoohe lɛ?

Yesu Kristo kɛɛ esɛɛnyiɛlɔi lɛ akɛ: “Nyɛhãa nyɛla lɛ atsoa yɛ gbɔmɛi ahiɛ, koni amɛna nyɛnitsumɔi kpakpai lɛ, ni amɛwo nyɛ-Tsɛ ni yɔɔ ŋwɛi lɛ hiɛ nyam.” (Mateo 5:16) Enɛ hewɔ lɛ, wɔkɛ ŋmɛnɛŋmɛnɛ beiaŋ nilee ni aná yɛ ilɛtrɔnik nibii ahe, ni Intanɛt lɛ fata he lɛ, miitsu nii waa. Wɔwɛbsaiti ni wɔkɛtsuɔ nii, ni ji jw.org lɛ, ji he ni abaanyɛ ana Yehowa Odasefoi ahemɔkɛyelii kɛ amɛnitsumɔi lɛ ahe saji yɛ. Mɛɛ nibii yɔɔ jɛmɛ?

Saji ni mɛi fɔɔ bimɔ lɛ ahetoo ni jɛ Biblia lɛ mli. Obaanyɛ ona saji ni he hiaa waa ni mɛi ebi lɛ ekomɛi ahetoo yɛ jɛmɛ. Akɛ nɔkwɛmɔnɔ lɛ, tratii ni ji Ani Amanehulu Sɛɛ Baafo Be Ko? kɛ Ani Gbohii Lɛ Baanyɛ Ahi Shi Ekoŋŋ Lɛɛlɛŋ? lɛ yɛ Intanɛt lɛ nɔ yɛ wiemɔi ni fa fe 600 amli. Agbɛnɛ hu, obaanyɛ ona Jeŋ Hee Shishitsɔɔmɔ lɛ yɛ wiemɔi ni fa fe 130 amli, kɛ Biblia kasemɔ he woji babaoo ni Mɛni Wɔbaanyɛ Wɔkase Kɛjɛ Biblia Lɛ Mli? wolo lɛ fata he, kɛ magazin ni ji Buu-Mɔɔ kɛ Awake! lɛ. Woji nɛɛ pii yɛ ni obaanyɛ okane loo obo amɛmli wiemɔi lɛ atoi yɛ wɛbsaiti lɛ nɔ loo odaunlodi amɛhe MP3, PDF, loo EPUB. Obaanyɛ oprinti eko po ohã mɔ ko ni yɔɔ wiemɔ lɛ he miishɛɛ lɛ yɛ lɛ diɛŋtsɛ ewiemɔ mli! Obaanyɛ ona vidioi ni afee yɛ mumuii awiemɔi srɔtoi amli yɛ nɔ. Obaanyɛ odaunlodi Biblia kanemɔ ni afee lɛ drama, Biblia mli dramai, kɛ lalai ni ŋɔɔ kɛjɛ wɛbsaiti lɛ nɔ.

Anɔkwa saji ni kɔɔ Yehowa Odasefoi ahe. Nɔ kroko ni yɔɔ wɛbsaiti lɛ nɔ ji saji ni yaa nɔ bianɛ kɛ vidioi ni kɔɔ wɔjeŋ muu fɛɛ nitsumɔ lɛ he, shihilɛi ni Yehowa Odasefoi kɛmiikpe, kɛ yelikɛbuamɔ ni wɔkɛhãa mɛi ni eyaje oshãra mli lɛ ahe saji. Obaana kpeei wuji ni abaafee lɛ ahe saji kɛ wɔnitsumɔhe niji lɛ adrɛs srɔtoi lɛ hu yɛ nɔ.

Kɛtsɔ enɛ nɔ lɛ, wɔmiihã anɔkwale la lɛ miitso kɛmiiya shikpɔŋ lɛ nɔ hei fɛɛ. Mɛi ni jɛ je lɛŋ hei srɔtoi fɛɛ, ni mɛi ni yɔɔ Antarctica lɛ po fata he lɛ, miiná enɛ he sɛɛ. Wɔshwelɛ ji akɛ, “Yehowa wiemɔ lɛ aya nɔ agbɛ ashwã oyayaayai” kɛya shikpɔŋ lɛ nɔ hei fɛɛ kɛwo Nyɔŋmɔ hiɛ nyam.​—2 Tesalonikabii 3:1.

• Mɛɛ gbɛ nɔ jw.org wɛbsaiti lɛ yeɔ ebuaa mɛi babaoo ni amɛkaseɔ Biblia mli anɔkwale lɛ?

• Mɛɛ nibii obaasumɔ ni oyakwɛ yɛ wɔwɛbsaiti lɛ nɔ?