Kɛ́ Ofee Yeyeeye​—“Afifiaa Wɔ Waa yɛ Gbɛ Fɛɛ Gbɛ Nɔ”

MƆ FƐƐ MƆ feɔ yeyeeye​—Nyɔŋmɔ tsuji po feɔ yeyeeye. Lalatsɛ lɛ ŋma akɛ, ‘ekɔmɔyeli loo eyeyeeyefeemɔi fa babaoo.’ (Lala 94:19) Yesu wie akɛ, yɛ naagbee be lɛ mli lɛ, “shihilɛ mli yeyeeyefeemɔi” baahã Yehowa sɔɔmɔ awa waa. (Luka 21:34) Ani bo hu ofeɔ yeyeeye? Ani shika he naagbai, oweku lɛ mli naagbai, loo hela ko miisu otsui? Mɛni Yehowa baanyɛ afee kɛye abua bo koni onyɛ okpee shihilɛ lɛ naa?

“Hewalɛ ni Fa Kɛteke Nɔ”

Wɔnyɛŋ wɔdamɔ yeyeeyefeemɔ naa yɛ wɔ diɛŋtsɛ wɔhewalɛ naa. Bɔfo Paulo ŋma akɛ: “Afifiaa wɔ waa yɛ gbɛ fɛɛ gbɛ nɔ, shi jeee kpɛŋŋ bɔ ni wɔnyɛɛɛ wɔtsi wɔhe; wɔyiŋ feɔ wɔ kɔshikɔshi, shi jeee bɔ ni wɔbɛ tsɔmɔhe ko kwraa; . . . atsirɛɔ wɔ atswiaa shi, shi wɔhiɛ kpãtãko.” Mɛni yeɔ ebuaa wɔ ni wɔnyɛɔ wɔdamɔɔ naagbai nɛɛ anaa? “Hewalɛ ni fa kɛteke nɔ lɛ,” ni ji hewalɛ ni jɛ Yehowa, wɔ-Nyɔŋmɔ ofe lɛ ŋɔɔ lɛ.​—2 Korintobii 4:7-9.

Susumɔ gbɛi ni Yehowa tsɔ nɔ eduro bo “hewalɛ ni fa kɛteke nɔ” be ko ni eho lɛ ahe okwɛ. Ani okaiɔ maŋshiɛmɔ ko ni woɔ mɔ hewalɛ ni hã ohiɛ sɔ Yehowa suɔmɔ ni tsakeee lɛ waa? Be ni oyaa shiɛmɔ ni ogbaa mɛi krokomɛi bɔ ni Yehowa baahã shikpɔŋ lɛ atsɔ Paradeiso lɛ, ani no hãaa hemɔkɛyeli ni oyɔɔ yɛ Yehowa shiwoi amli lɛ mli awa? Kɛ́ wɔtee Kristofoi akpeei, ni wɔkɛ mɛi krokomɛi gba nibii ni wɔheɔ wɔyeɔ lɛ ahe sane lɛ, ewajeɔ wɔ ni wɔnyɛɔ wɔdamɔɔ shihilɛ mli yeyeeyefeemɔi anaa, ni ehãa wɔnáa toiŋjɔlɛ koni wɔnyɛ wɔsɔmɔ Yehowa kɛ miishɛɛ.

“Nyɛsaa Nyɛnaa Nyɛkwɛa, ni Nyɛaana akɛ Yehowa Hi”

Yɛ anɔkwale mli lɛ, bei komɛi lɛ, obaanu he tamɔ nɔ ni shihilɛ lɛ miinyɛ onɔ ni okɛ ohiŋmɛii enyɔ akwɛ tɔ kome mli. Akɛ nɔkwɛmɔnɔ lɛ, Yehowa efã wɔ akɛ wɔtao Maŋtsɛyeli lɛ klɛŋklɛŋ. Agbɛnɛ hu, eekpa gbɛ akɛ, wɔbaakane Biblia lɛ daa, wɔfee aŋkro nikasemɔ, ni wɔfee nibii krokomɛi ni baahã wekukpaa ni yɔɔ wɔ kɛ lɛ teŋ lɛ mli awa. (Mateo 6:33; Luka 13:24) Shi, kɛji shiteekɛwoo, hela, loo weku mli naagbai hãaa onyɛ otsu nibii nɛɛ ahe nii jogbaŋŋ hu? Ni kɛji oheloonaa nitsumɔ lɛ hãa etɔɔ bo bliboo, ni ehãaa oná deka kɛhã asafoŋ kpeei kɛ shiɛmɔ hu? Akɛni onáaa dekã kɛ hewalɛ kɛtsu nibii ni ebiɔ ni otsu he nii lɛ ahe nii hewɔ lɛ, ekolɛ obaafee basaa. Ekolɛ obaanu he po akɛ nibii ni Yehowa miikpa gbɛ akɛ ofee lɛ fa tsɔ.

Yehowa nuɔ nii ashishi. No hewɔ lɛ, ele nɔ ni wɔbaanyɛ wɔfee kɛ nɔ ni wɔnyɛŋ wɔfee. Ni ele akɛ, kɛ́ wɔgbɔjɔ loo wɔfee basaa lɛ, eheɔ be dani wɔnyɛɔ wɔdamɔɔ wɔnaji anɔ ekoŋŋ.​—Lala 103:13, 14.

Akɛ nɔkwɛmɔnɔ lɛ, susumɔ bɔ ni Yehowa ye ebua gbalɔ Elia lɛ he okwɛ. Be ko lɛ, Elia tsui fã, ni enijiaŋ je wui aahu akɛ, ejo foi kɛtee ŋa lɛ nɔ. Shi, ani Yehowa kã ehiɛ? Ani efã lɛ ni eku esɛɛ eyatsu enitsumɔ akɛ gbalɔ lɛ? Dabi, Yehowa efeee nakai. Moŋ lɛ, etsu ŋwɛibɔfo ko ni eyatsĩɛ Elia blɛoo ni ehã lɛ niyenii eye, ni efee nakai shii enyɔ. Shi no po hãaa Elia aná ekãa. Gbii 40 sɛɛ lɛ, no mli lɛ, ekã he eeye etsui. No hewɔ lɛ, mɛni ekoŋŋ Yehowa fee kɛye ebua lɛ? Klɛŋklɛŋ kwraa lɛ, Yehowa hã ena akɛ ebaanyɛ ebu ehe. Nɔ ni ji enyɔ lɛ, Yehowa kɛ “kɔɔyɔɔ ni tswaa nyãrakee gbɛɛmɔ,” loo “gbee ko ni yɔɔ blɛoo,” taakɛ ejeɔ kpo yɛ blema niŋmai lɛ amli lɛ, shɛje Elia mii. Naagbee lɛ, Yehowa hã Elia le akɛ mɛi akpei abɔ yɛ lolo ni kɛ anɔkwayeli miijá Nyɔŋmɔ. Etsɛɛɛ ni Elia yatsa enitsumɔ lɛ nɔ akɛ gbalɔ ni yɔɔ ekãa. (1 Maŋtsɛmɛi 19:1-19) Mɛni wɔkaseɔ yɛ sane nɛɛ mli? Be ni Elia fee yeyeeye lɛ, Yehowa to etsui shi ehã lɛ, ni emusuŋ tsɔ lɛ yɛ ehewɔ. Yehowa tsakeko. Bɔ ni ekɛ Elia ye lɛ, nakai nɔŋŋ ekɛ wɔ yeɔ.

Kɛ́ ootao osɔmɔ Yehowa ekoŋŋ lɛ, susumɔ nɔ ni obaanyɛ ofee ohã lɛ bianɛ lɛ he. Okɛ nɔ ni obaanyɛ otsu ŋmɛnɛ lɛ akato nɔ ni onyɛɔ otsuɔ be ko ni eho lɛ he. Akɛ nɔkwɛmɔnɔ lɛ, kɛ́ foidalɔ ko kpa foijee nyɔji abɔ loo afii komɛi, ni ebɔi ekoŋŋ lɛ, ebaahe be dani ebaaná tsui kɛ hewalɛ ni ekɛjo foi tamɔ bɔ ni efeɔ tsutsu lɛ. No hewɔ lɛ, yɛ shishijee mli lɛ, ekɛ otii bibii ni ebaanyɛ eshɛ he baamamɔ ehiɛ. Kristofoi tamɔ foidalɔi. Ni oti ko ma amɛhiɛ yɛ foi ni amɛdaa lɛ mli. (1 Korintobii 9:24-27) Mɛni hewɔ okɛ mumɔŋ oti ko ni obaanyɛ oshɛ he amrɔ nɛɛ emaaa ohiɛ? Akɛ nɔkwɛmɔnɔ lɛ, obaanyɛ okɛfee oti akɛ obaaya asafoŋ kpee. Bi Yehowa ni eye ebua bo ni onyɛ oshɛ oti nɛɛ he. Be ni ohe waa yɛ mumɔŋ lɛ, ‘obaasa onaa okwɛ, ni obaana akɛ Yehowa hi.’ (Lala 34:9) Kaimɔ akɛ, Yehowa hiɛ sɔɔ nɔ fɛɛ nɔ ni ofeɔ kɛtsɔɔ akɛ osumɔɔ lɛ lɛ waa, ekɔɔɔ he eko kɛ́ eji nɔ ko bibioo po.​—Luka 21:1-4.

“Nɔ ni Wo Mi Hewalɛ”

Mɛni Yehowa fee kɛye ebua June koni enyɛ eku esɛɛ kɛba eŋɔɔ? June wie akɛ: “Misɔle mibi Yehowa dɛŋ yelikɛbuamɔ shii abɔ. Kɛkɛ ni mibihii lɛ ateŋ mɔ kome ŋa kɛɛ mi akɛ abaafee kpee yɛ he ni miyɔɔ lɛ. Mikpɛ miyiŋ akɛ maya kpee lɛ gbi kome. Miná miishɛɛ waa akɛ mikɛ Yehowa webii efee ekome ekoŋŋ! Nakai kpee lɛ ji nɔ ni wo mi hewalɛ. Amrɔ nɛɛ, mikɛ miishɛɛ miisɔmɔ Yehowa ekoŋŋ. Mitsui enyɔ mimli waa yɛ shihilɛ mli. Miyɔse akɛ, minyɛmimɛi Kristofoi lɛ ahe miihia mi, ni esa akɛ makpɛlɛ ni amɛye amɛbua mi. Eŋɔɔ minaa akɛ minyɛ miku misɛɛ dani ekpe sɛɛ tsɔ.”