“Lɛɛlɛŋ, Nyɔŋmɔ Gbɛi Kpeteŋkpele ni Yɔɔ Krɔŋkrɔŋ Fe Fɛɛ lɛ Nɛ”
Enɛ ji nɔ ni Nicholas ni jɛ Cusa lɛ wie yɛ afi 1430 lɛ yɛ shiɛmɔ wiemɔ ko ni eha lɛ mli.a Eji nuu ko ni kase nibii pii ahe nii, ákɛ nɔkwɛmɔnɔ lɛ, ekase Hela kɛ Hebri wiemɔ, jeŋ nilee, nyɔŋmɔjamɔ he saji, akɔntaabuu, kɛ ŋulamii ahe nii. Beni eye afii 22 lɛ, ebatsɔ woloŋlelɔ kpanaa yɛ Roman Katolik jamɔ mli mlai ahe. Awó lɛ osɔfonukpa yɛ afi 1448.
Aaafee afii 550 ni eho nɛ lɛ, Nicholas ni jɛ Cusa lɛ ha amã shihilɛhe ko yɛ Kues aha mɛi ni egbɔlɔ lɛ koni akwɛ amɛ yɛ jɛmɛ. Amrɔ nɛɛ atsɛɔ maŋ lɛ akɛ Bernkastel-Kues, ni eyɛ Germany maŋ ni ji Bonn lɛ wuoyigbɛ aaafee kilomitai 130. Amrɔ nɛɛ akɛ woji ni Cusa kɛ eniji ŋmala, ni fa fe 310 eto nakai tsu lɛ mli. Woji nɛɛ ateŋ ekome ji Kodɛs Cusanus 220, ni anaa shiɛmɔ wiemɔ ni Cusa ha yɛ afi 1430 lɛ yɛ mli. Yɛ nakai shiɛmɔ wiemɔ ni yitso ji, In principio erat verbum (Shishijee Lɛŋ lɛ, Wiemɔ lɛ Yɛ) lɛ mli lɛ, Nicholas ni jɛ Cusa lɛ ŋma Yehowa gbɛi lɛ yɛ Latin wiemɔ mli akɛ Iehoua.b Wolo lɛ baafa 56 lɛ wie yɛ Nyɔŋmɔ gbɛi lɛ he akɛ: “Eji gbɛi ni Nyɔŋmɔ ŋɔ ha ehe. No ji Tetragrammaton ni ji niŋmaa okadii ejwɛ lɛ. . . . Lɛɛlɛŋ, Nyɔŋmɔ gbɛi kpeteŋkpele ni yɔɔ krɔŋkrɔŋ fe fɛɛ lɛ nɛ.” Wiemɔ ni Nicholas ni jɛ Cusa lɛ wie lɛ maa nɔ mi akɛ Nyɔŋmɔ gbɛi lɛ je kpo yɛ Hebri Ŋmalɛi ní aŋmala ashwie shi yɛ shishijee mli lɛ amli.—2 Mose 6:3.
Nɛkɛ kodɛs ni aŋma mra mli yɛ afi 1400 afii lɛ amli lɛ fata kodɛs srɔtoi ni etsɛ fe fɛɛ ní atsɔɔ Tetragrammaton lɛ shishi yɛ mli akɛ “Iehoua” lɛ ahe. Wolo nɛɛ hu ji odaseyeli kroko ni tsɔɔ ákɛ akɛ Nyɔŋmɔ gbɛi lɛ ní aŋmaa lɛ tamɔ “Yehowa” yɛ wiemɔi krokomɛi amli lɛ etsu nii kɛtsɛ́ Nyɔŋmɔ aahu afii ohai abɔ.
[Shishigbɛ niŋmai]
a Gbɛi krokomɛi ni akɛtsɛɔ Nicholas ni jɛ Cusa lɛ ji Nikolaus Cryfts (Krebs), Nicolaus Cusanus, kɛ Nikolaus von Kues. Kues ji Germany maŋ ni afɔ lɛ yɛ lɛ gbɛi.
b Eha shiɛmɔ wiemɔ lɛ ni ekɛfi Triniti tsɔɔmɔ lɛ sɛɛ.
[Mfoniri ni yɔɔ baafa 16]
Cusa Wojiatoohe lɛ