Mɛni Hewɔ Esa akɛ Okɛ Biblia Shishitoo Mlai Atsu Nii?
ANI nɔ ni Biblia lɛ kɛɔ yɛ bɔlɛnamɔ he lɛ be eho ni eyɛ kpɛŋŋ tsɔ? Dabi. Moŋ lɛ, nɔ ni Biblia lɛ kɛɔ yɛ bɔlɛnamɔ he lɛ baanyɛ aye abua wɔ koni:
▪ Wɔkaná helai ni anáa kɛjɛɔ bɔlɛnamɔ mli
▪ Wɔkaŋɔ ajwamaŋ hɔ
▪ Wɔkaná haomɔi ni gbalatsemɔ kɛbaa
▪ Wɔhenilee akayi wɔ
▪ Wɔkafite bulɛ ni mɛi yɔɔ kɛha wɔ akɛni wɔha mɔ ko kɛ wɔ egbe ekɔnɔ kɛkɛ lɛ hewɔ
Yehowa Nyɔŋmɔ,a wɔ-Bɔlɔ lɛ, miisumɔ ni wɔkɛ nikeenii ni ekɛha wɔ lɛ atsu nii jogbaŋŋ ni wɔná he sɛɛ. Nyɔŋmɔ ji “mɔ ni tsɔɔo nii ni hi hao.” (Yesaia 48:17) Kɛ́ mɔ ko hiɔ shi yɛ Biblia mli shishitoo mlai ni kɔɔ bɔlɛnamɔ he lɛ anaa lɛ:
▪ Nyɔŋmɔ kpɛlɛɔ enɔ
▪ Etoiŋ jɔɔ lɛ
▪ Ewajeɔ ekomefeemɔ ni yɔɔ eweku lɛ mli lɛ
▪ Enáa gbɛ́i kpakpa
▪ Enáa bulɛ ehaa ehe
Shi kɛ́ amrɔ nɛɛ ohiii shi yɛ jeŋba he shishitoo mlai ni yɔɔ Biblia lɛ mli lɛ anaa hu? Ani obaanyɛ otsake ojeŋba? Ani Nyɔŋmɔ kɛ ohe ekeŋ bo yɛ otsutsu jeŋba lɛ hewɔ?
Susumɔ sane nɛɛ he okwɛ: Mɛi komɛi ni hi Kristofoi asafo lɛ mli yɛ klɛŋklɛŋ afii 100 lɛ mli lɛ ji ajwamaŋbɔlɔi, gbalafitelɔi, hii ni kɛ hii loo yei ni kɛ yei náa bɔlɛ dani amɛbatsɔmɔ Kristofoi. Amɛtsake amɛjeŋba, ni amɛná he sɛɛ waa. (1 Korintobii 6:9-11) Ŋmɛnɛ lɛ, mɛi akpei abɔ efee tsakemɔi ni tamɔ nakai nɔŋŋ yɛ jeŋ fɛɛ. Amɛkwa amɛtsutsu jeŋba sha lɛ, ni amɛná amɛjeŋba ni amɛha ekɛ Biblia mli shishitoo mlai ekpã gbee lɛ he sɛɛ waa. Ákɛ nɔkwɛmɔnɔ lɛ, susumɔ Sarah ni wɔtsĩ etã yɛ klɛŋklɛŋ saneyitso lɛ mli lɛ niiashikpamɔ lɛ he okwɛ.
“Mihe Jɔ Mi Amrɔ Nɔŋŋ”
Sarah na akɛ jeŋba ni ekɔ lɛ haaa ená heyeli kɛ miishɛɛ ni esusu akɛ ebaaná lɛ. Ekɛɛ akɛ: “Minu he akɛ mihenilee lɛ he ewo muji.” Ekɛshi sɛɛ akɛ: “Mihiɛ gbo ni mitsui ye akɛ ekolɛ maŋɔ hɔ loo maná hela gbonyo ko. Mihiɛ kpaaa nɔ kɔkɔɔkɔ akɛ Nyɔŋmɔ yɛ, ni mile akɛ shihilɛ gbɛ ni mikɔ lɛ edɔ lɛ. Minu he akɛ mihe tseee, ni no ha mihao waaa.”
Sɛɛ mli lɛ, Sarah nyɛ etsake ejeŋba. Eha efɔlɔi ni ji Yehowa Odasefoi lɛ ye amɛbua lɛ. Agbɛnɛ hu ebi koni Kristofoi asafoŋ onukpai lɛ aye abua lɛ. Sarah kɛɛ akɛ: “Suɔmɔ kɛ mlihilɛ ni mifɔlɔi kɛ asafoŋ onukpai lɛ jie kpo amɛtsɔɔ mi lɛ ha minaa kpɛ mihe waa. Mihe jɔ mi amrɔ nɔŋŋ.”
Amrɔ nɛɛ, Sarah yɛ bii enyɔ ni eetsɔse amɛ. Sarah kɛɛ akɛ: “Migbaa mibii lɛ gbɛ ni mikɔ lɛ, ni mishiuuu nɔ ko nɔ. Miisumɔ ni amɛle bɔ ni Nyɔŋmɔ shishitoo mlai ni mikɛtsuuu nii lɛ ye mi awui ha. Oti ni ma mihiɛ ji ni maye mabua amɛ koni amɛna akɛ kɛ́ amɛhi shi yɛ Nyɔŋmɔ shishitoo mlai ni kɔɔ bɔlɛnamɔ he lɛ anaa lɛ, amɛbaaná he sɛɛ yɛ gbɔmɔtsoŋ, jwɛŋmɔŋ, kɛ henumɔŋ. Miná nɔmimaa akɛ, Nyɔŋmɔ kɛ jeŋba he shishitoo mlai haa wɔ ejaakɛ esumɔɔɔ ni wɔyeɔ wɔhe awui.”
Bo hu kɛ́ ohi shi yɛ shishitoo mlai ni Nyɔŋmɔ jɛɔ suɔmɔ mli ekɛhaa lɛ anaa lɛ, obaaná he sɛɛ babaoo. Biblia lɛ kɛ shiwoo nɛɛ haa akɛ: “Yehowa akpɔi lɛ ja pɛ, ni ehaa mɔ tsui nyáa; Yehowa kitã lɛ yɛ krɔŋŋ, ni ehaa mɔ hiŋmɛii anɔ tseɔ. . . . Amɛnɔyeli lɛ, nyɔmɔwoo kpele yɛ mli.”—Lala 19:9, 12.b—w11-E 11/1.
[Shishigbɛ niŋmai]
a Biblia lɛ tsɔɔ akɛ Nyɔŋmɔ gbɛ́i diɛŋtsɛ ji Yehowa.
b Kɛ́ ootao ole ŋaawoi ni hi jogbaŋŋ ni Biblia lɛ kɛhaa lɛ he saji babaoo lolo lɛ, taomɔ Yehowa Odasefoi ni yɔɔ he ni oyɔɔ lɛ. Aloo obaanyɛ oŋma kɛya adrɛs ni yɔɔ wolo tɛtrɛɛ nɛɛ baafa 4 lɛ ateŋ nɔ ni sa, loo obaanyɛ oya wɔ-Wɛb saiti ni ji www.watchtower.org lɛ.
[Wiemɔ ni akɔ ni akɛmiitsu nii ni yɔɔ baafa 8]
Bei pii lɛ, mɛi ni kuɔ amɛhiɛ amɛshwieɔ Biblia mli shishitoo mlai anɔ lɛ kɛ haomɔ baa
[Wiemɔ ni akɔ ni akɛmiitsu nii ni yɔɔ baafa 9]
Mɛi ni hiɔ shi yɛ Biblia mli shishitoo mlai anaa lɛ náa henilee kpakpa ni ekomefeemɔ ni mli wa hiɔ amɛweku lɛ mli