Saji ni Mɛi ni Kaneɔ lɛ Biɔ . . .

Mɛni Hewɔ Yehowa Odasefoi Shiɛɔ Yɛ Shĩa kɛ Shĩa?

▪ Wɔnaa famɔ nɛɛ ni Yesu kɛha esɛɛnyiɛlɔi lɛ yɛ Biblia lɛ mli: ‘Nyɛyaa ni nyɛyafea jeŋmaji fɛɛ mikaselɔi, ni nyɛtsɔɔ amɛ nii.’ (Mateo 28:19, 20) Ani famɔ nɛɛ kɔɔ Kristofoi fɛɛ ahe? Yesu mra be kaselɔi lɛ nu shishi nakai. Akɛ nɔkwɛmɔnɔ lɛ, bɔfo Petro kɛɛ akɛ: ‘Yesu wo wɔ kitã akɛ wɔshiɛ wɔtsɔɔ maŋ lɛ ni wɔye odase.’ (Bɔfoi lɛ Asaji 10:42) Bɔfo Paulo hu ŋma akɛ: “Aŋɔfĩ minɔ akɛ mijaje. Ejaakɛ kɛji mijajeee sanekpakpa lɛ, kpóo ha mi!”—1 Korintobii 9:16.

Jeee Paulo kɛ Petro pɛ ye famɔ ni Yesu kɛha lɛ nɔ, shi klɛŋklɛŋ afi 100 lɛŋ Kristofoi lɛ fɛɛ hu fee nakai. Amɛkɛ shiɛmɔ nitsumɔ lɛ fee amɛnitsumɔ titri. (Bɔfoi lɛ Asaji 5:28-32, 41, 42) Nakai nɔŋŋ Yehowa Odasefoi ni yɔɔ ŋmɛnɛ lɛ hu bɔɔ mɔdɛŋ amɛfeɔ. Amɛshiɛɔ sane kometoo lɛ nɔŋŋ ni Yesu shiɛ lɛ, no ji “Ŋwɛi maŋtsɛyeli lɛ.”—Mateo 10:7.

Namɛi esa akɛ ashiɛ Maŋtsɛyeli lɛ he sane lɛ atsɔɔ? Yesu tsɔɔ akɛ esa akɛ ashiɛ atsɔɔ gbɔmɛi fɛɛ yɛ he fɛɛ he. Ekɛɛ ekaselɔi lɛ akɛ: “Nyɛaatsɔmɔ midasefoi . . . kɛyashi shikpɔŋ lɛ naagbeehei lɛ.” (Bɔfoi lɛ Asaji 1:8) Yesu kɛɛ po akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ní akɛye jeŋmaji lɛ fɛɛ odase,” dani nibii agbɛjianɔtoo nɛɛ naagbee lɛ baaba. (Mateo 24:14) Bɔni afee ni klɛŋklɛŋ afii 100 lɛŋ Kristofoi lɛ aye famɔ nɛɛ nɔ lɛ, amɛbɔ mɔdɛŋ koni amɛshiɛ amɛtsɔɔ mɛi fɛɛ, jeee omanfoi loo aŋkroaŋkroi ni bɛ jamɔ ko mli pɛ. (Kolosebii 1:23; 1 Timoteo 2:3, 4) Nakai nɔŋŋ ŋmɛnɛ lɛ, Yehowa Odasefoi bɔɔ mɔdɛŋ akɛ amɛbaashiɛ amɛtsɔɔ mɔ fɛɛ mɔ.a

Mɛɛ gbɛ ni mɔɔ shi fe fɛɛ atsɔɔ nɔ ashiɛɔ Maŋtsɛyeli lɛ he sane lɛ? Yesu, mɔ ni le bɔ ni afeɔ ni nine shɛɔ mɛi babaoo anɔ lɛ, tsu ekaselɔi lɛ kɛtee maji, akrowai, kɛ mɛi ashĩai. (Mateo 10:7, 11, 12) Yesu gbele kɛ eshitee lɛ sɛɛ lɛ, ekaselɔi lɛ tee nɔ amɛshiɛ yɛ “shĩai.” (Bɔfoi lɛ Asaji 5:42) Taakɛ Yesu fee lɛ, amɛhu amɛshiɛ yɛ hei fɛɛ ni amɛkɛ mɛi kpeɔ yɛ lɛ, kɛ kpeehei. (Yohane 4:7-26; 18:20; Bɔfoi lɛ Asaji 17:17) Ŋmɛnɛ lɛ, Yehowa Odasefoi tsɔɔ nakai gbɛi nɔŋŋ anɔ amɛshiɛɔ amɛtsɔɔ mɛi fɛɛ.

Yesu ha ale akɛ, jeee mɔ fɛɛ mɔ baabo toi. (Mateo 10:14; 24:37-39) Ani esa akɛ enɛ aje Kristofoi anijiaŋ wui ni amɛkashiɛ? Susumɔ nɔkwɛmɔnɔ nɛɛ he okwɛ: Ŋɔɔ lɛ akɛ shikpɔŋhosomɔ wulu ko eba, ni ofata mɛi ayibaalɔi lɛ ahe kɛmiitao mɛi ni wala eyaje oshara mli lɛ, ani obaakpa mɛi lɛ ataomɔ akɛni be saŋŋ eho, ni hiɛkalɔi fioo ko pɛ aná hewɔ? Dabi, obaaya nɔ otao, bei abɔ ni oyɔɔ hiɛnɔkamɔ akɛ abaaná mɔ ko kɛ̃ ahere eyiwala lɛ. Yesu fã ekaselɔi lɛ ni amɛya nɔ amɛshiɛ, bei abɔ ni hiɛnɔkamɔ yɔɔ akɛ amɛbaná mɛi ni baabo Nyɔŋmɔ Maŋtsɛyeli lɛ he sanekpakpa lɛ toi lɛ. (Mateo 10:23; 1 Timoteo 4:16) Yehowa Odasefoi shiɛɔ yɛ shĩa kɛ shĩa kɛtaoɔ mɛi ni kɛ́ amɛnu maŋtsɛyeli lɛ he sane lɛ, amɛkɛbaatsu nii koni amɛná wala lɛ, ni Odasefoi lɛ kɛ enɛ tsɔɔ suɔmɔ ni amɛyɔɔ kɛha Nyɔŋmɔ kɛ mɛi krokomɛi.—Mateo 22:37-39; 2 Tesalonikabii 1:8.

Wolo tɛtrɛɛ ni okaneɔ nɛɛ kɛ nakai Biblia mli sane lɛ haa. Kɛ́ ootao ole enɛ he sane babaoo lɛ, ofainɛ be kroko kɛ́ Yehowa Odasefoi ba oŋɔɔ lɛ, okɛ amɛ awie he, loo ŋmaa kɛyaha mɛi ni fee wolo tɛtrɛɛ nɛɛ.—w12-E 06/1.

[Shishigbɛ niŋmaa]