SANEYITSO LƐ MLITSƆƆMƆ: MƐNI HEWƆ NƆNAI EFA NAKAI? MƐƐ BE ESƐƐ BAAFO?
Akpãta Mɛi Babaoo ni Efeko Nɔ ko Ahiɛ!
Noelle, ni eji gbɛkɛ yoo fioo ni sumɔɔ mɛi asane waa lɛ sumɔɔ nitɛŋmɔ waa. Latsaa be gbɛkɛ ko beni enyiɛ amɛtsu lɛ sɛɛ lɛ, egbee shi ni ekokolo kɛyagbee nubu ni eweku lɛ efee ni awuɔ lɛ mli. Beni emii nu ni egbo lɛ, no mli eshwɛ otsii enyɔ ni ebaaye afii ejwɛ.
Charlotte, Daniel, Olivia, Josephine . . . Gbɛ́i nɛɛ ji gbekɛbii 20 ni amɛye afii ekpaa loo kpawo ni fata mɛi 26 ni atswara amɛ tu agbe amɛ yɛ skul ko ni yɔɔ Connecticut, yɛ U.S.A., yɛ December 14, 2012 lɛ nɔ lɛ ahe lɛ ekomɛi agbɛ́i. Yɛ yara ko ni afee lɛ shishi lɛ, Maŋ Hiɛnyiɛlɔ Obama tsĩ gbekɛbii lɛ agbɛi atã, ni ekɛɛ etoibolɔi ni miiye awerɛho lɛ akɛ: “Esa akɛ nɛkɛ yiwalɛ nifeemɔi nɛɛ asɛɛ afo.”
Awula ko ni atsɛɔ lɛ Bano ni eye afii 18 lɛ kɛ eweku fã kɛshi Iraq kɛtee Norway yɛ afi 1996. Enanemɛi tsɛɔ lɛ akɛ Hulu Kpɛmɔ. Dɔlɛ sane ji akɛ Bano fata mɛi 77 ni yiwalɔ ko gbe amɛ yɛ July 22, afi 2011 lɛ ahe; yiwalɔ ni gbe amɛ lɛ shwã ekɛɛ akɛ: “Miikpa fai . . . akɛ minyɛɛɛ magbe mɛi babaoo fe nakai.”
Abɔ saji ni kumɔɔ mɔ tsui tamɔ nɛkɛ nɔŋŋ ahe amaniɛ shii abɔ yɛ je lɛŋ he fɛɛ he. Susumɔ ŋkɔmɔyeli kɛ piŋmɔ ni ejɛ osharai, mlatɔmɔ, tai, yiwalɛ nifeemɔ, adebɔɔ naa osharai kɛ ekrokomɛi ni tamɔ enɛɛmɛi amli eba lɛ ahe okwɛ. Akpãta mɛi babaoo ni efeko nɔ ko lɛ ahiɛ yakatswaa, ni mɛi babaoo ena nɔ, ni bei pii lɛ jeee nɔ ko ni amɛfee hewɔ!
Mɛi komɛi shwaa Nyɔŋmɔ, ni nɔ ni amɛkɛjieɔ amɛnaa ji akɛ, wɔ-Bɔlɔ lɛ susuuu adesai ahe. Mɛi komɛi hu muɔ sane naa akɛ Nyɔŋmɔ naa wɔpiŋmɔi lɛ, shi ejeɔ gbɛ ni efeee he nɔ ko. Mɛi krokomɛi hu kɛɔ akɛ amanehului nɛɛ ji shɛɛ mli sane. Etamɔ nɔ ni mɔ fɛɛ mɔ hiɛ esusumɔ yɛ sane nɛɛ he. Nɛgbɛ wɔbaanyɛ wɔná hetoi ni ja ni haa mɔ tsui nyɔɔ emli lɛ yɛ? Wɔbaajɛ Nyɔŋmɔ Wiemɔ ni ji Biblia lɛ mli wɔtsɔɔ nɔ ni kɛ piŋmɔi baa, kɛ bɔ ni abaafee afo sɛɛ lɛ yɛ saji ni nyiɛ sɛɛ lɛ amli.