Nyɔŋmɔ To Gbɛjianɔ Koni Ekpɔ̃ Adesai

Nyɔŋmɔ wo anɔkwafo Abraham shi akɛ shiwoo “seshi” lɛ baafee Abraham seshibii lɛ ateŋ mɔ kome. Abaatsɔ nakai seshi lɛ nɔ ajɔɔ gbɔmɛi ni yɔɔ “jeŋmaji fɛɛ” anɔ lɛ. (1 Mose 22:18) Sɛɛ mli lɛ, Abraham nabi Yakob fã kɛyahi Mizraim, jɛmɛ eweku lɛ bada ni ebatsɔ blema Israel maŋ lɛ.

Fee sɛɛ beni amɛyɔɔ Mizraim lɛ, yiwalɔ Farao ko ye Israelbii lɛ nyɔŋ kɛyashi Nyɔŋmɔ wo Mose akɛ gbalɔ, ni lɛ enyiɛ maŋ lɛ hiɛ kɛshi Mizraim kɛtsɔ Ŋshɔ Tsuru lɛ ni aha emli gba enyɔ yɛ naakpɛɛ gbɛ nɔ lɛ nɔ. No sɛɛ lɛ, Nyɔŋmɔ ha Israel mlai, ní Kitãi Nyɔŋma lɛ hu fata he, koni ekudɔ amɛ ni ebu amɛhe. Nakai mlai lɛ tsɔɔ afɔlei ni esa akɛ ashã kɛha eshai faa. Nyɔŋmɔ ha Mose kɛɛ Israel akɛ, ebaatsu gbalɔ kroko kɛba amɛŋɔɔ. Nakai gbalɔ lɛ baafee shiwoo “seshi” lɛ.

Aaafee afii 400 sɛɛ lɛ, Nyɔŋmɔ wo Maŋtsɛ David shi akɛ, mɔ ni baa, ni ji “seshi” ni awo ehe shi yɛ Eden lɛ, baaye maŋtsɛyeli ko ni baahi shi kɛya naanɔ lɛ nɔ akɛ maŋtsɛ. Nakai mɔ lɛ baatsɔ Mesia lɛ, ni ji Kpɔ̃lɔ ni Nyɔŋmɔ ehala koni ehere adesai ayiwala ni ekɛ Paradeiso aba shikpɔŋ lɛ nɔ ekoŋŋ lɛ.

Nyɔŋmɔ tee nɔ eha ale Mesia lɛ he saji krokomɛi kɛtsɔ David kɛ gbalɔi krokomɛi lɛ anɔ. Amɛgba akɛ Mesia lɛ baafee mɔ ko ni baa ehe shi ni mli hi, ni ebaafo hɔmɔ, jalɛsane ni ayeee kɛ tai asɛɛ yɛ enɔyeli lɛ mli. Adesai fɛɛ kɛ amɛhe baahi shi yɛ hejɔlɛ mli ni toiŋjɔlɛ baahi amɛkɛ kooloi lɛ ateŋ. Hela, nɔnaa kɛ gbele—ni fataaa Nyɔŋmɔ shishijee yiŋtoo lɛ he lɛ—baaho aya, ni mɛi ni egboi lɛ baaku sɛɛ aba wala mli yɛ shikpɔŋ lɛ nɔ.

Nyɔŋmɔ tsɔ gbalɔ Mika nɔ egba akɛ abaafɔ Mesia lɛ yɛ Betlehem, ni etsɔ gbalɔ Daniel hu nɔ egba akɛ sɛɛ mli lɛ abaagbe Mesia lɛ. Shi Nyɔŋmɔ baatee Mesia lɛ shi kɛjɛ gbohii ateŋ ni ebaawo lɛ maŋtsɛ yɛ ŋwɛi. Daniel na kɛtsɔ hiɛ hu akɛ, naagbee kwraa lɛ Mesia Maŋtsɛyeli lɛ baaye nɔyelii krokomɛi fɛɛ anajiaŋ kɛaatee naanɔ. Ani Mesia lɛ ba lɛɛlɛŋ taakɛ agba lɛ?

​——Edamɔ 1 Mose yitsei 22-50, kɛ 2 Mose, 5 Mose, 2 Samuel, Lala, Yesaia, Daniel, Mika, Zakaria 9:9.