Mɛi Etɛ Ni Hi Shi Yɛ Afi 1500 Afii Lɛ Amli Ni Tao Anɔkwale Lɛ—Mɛni Amɛna?

“MƐNI ji anɔkwale?” Enɛ ji sane ni Roma nɔyelɔ Pontio Pilato ni ye Yudea nɔ yɛ klɛŋklɛŋ afi 100 lɛ mli lɛ bi Yesu be ni ayeɔ esane lɛ. (Yohane 18:38) Yɛ anɔkwale mli lɛ, Pilato biii sane nɛɛ ni ekɛle anɔkwale lɛ. Sane ni ebi nɛɛ hã ana faŋŋ akɛ eyiŋ miifee lɛ enyɔɔnyɔ loo akɛ eeye Yesu he fɛo kɛkɛ. Eeenyɛ efee akɛ Pilato na anɔkwale akɛ, mɔ fɛɛ mɔ kɛ nɔ ni ehalaa akɛ no ji anɔkwale loo nɔ ko ni atsɔɔ mɔ ko ni ehe eye; anyɛŋ ale nɔ ni ji anɔkwale kɔkɔɔkɔ. Ŋmɛnɛ lɛ nakai ji bɔ ni mɛi pii feɔ amɛnii yɛ anɔkwale lɛ he.

Sɔlemɔyalɔi ni hi shi yɛ Yuropa yɛ afi 1500 afii lɛ amli lɛ leee nɔ ni amɛbaahe amɛye akɛ eji anɔkwale. Kɛjɛ amɛgbekɛbiiashi lɛ, atsɔɔ amɛ akɛ nɔ fɛɛ nɔ ni paapa lɛ baakɛɛ loo nɔ ni abaatsɔɔ amɛ yɛ sɔlemɔ lɛ mli lɛ, no ji anɔkwale, shi be ni sɔlemɔi srɔtoi bahe shi yɛ Yuropa ni amɛbɔi susumɔi hei gbɛɛ kɛshwãmɔ pɛ kɛkɛ ni amɛjwɛŋmɔ bɔi amɛ enyɔnyɔɔnyɔ feemɔ. Te nɔ ni amɛbaahe amɛye lɛ? Te amɛaafee tɛŋŋ amɛle nɔ ni ji anɔkwale?

Nakai beaŋ lɛ, mɛi babaoo tao ale anɔkwale lɛ, ni amɛteŋ hii etɛ kpɛ amɛyiŋ akɛ, ja amɛle.a Mɛni amɛfee kɛna nɔ ni ji anɔkwale kɛ nɔ ji amale lɛ? Ni mɛni amɛna? Hã wɔkwɛ.

“BE FƐƐ BE LƐ, ESA AKƐ AHÃ BIBLIA LƐ . . . AFEE NƆ NI NƆ KWƆ FE FƐƐ”

Wolfgang Capito ji oblanyo ko ni jamɔ ehe ejwɛŋmɔ fɛɛ. Ekase datrɛyeli, saneyeli kɛ osɔfoyeli yɛ skul, ni yɛ 1512 mli lɛ, ebatsɔ osɔfo, ni no sɛɛ lɛ ebatsɔ osɔfo ni kwɛɔ osɔfonukpa ni yɔɔ Mainz lɛ sɛɛ.

Shishijee mli lɛ, Capito bɔ mɔdɛŋ akɛ ebaate shi ewo mɛi ni etse amɛhe ni shiɛɔ amɛshiɔ Katolik Sɔlemɔ lɛ tsɔɔmɔ lɛ. Etsɛɛɛ kwraa ni ana akɛ Capito diɛŋtsɛ hu miifĩ mɛi ni etse amɛhe nɛɛ asɛɛ. Mɛni efee? Yinɔsaneŋmalɔ James M. Kittelson ŋma akɛ, kɛ́ abi Capito tsɔɔmɔi komɛi ahe saji lɛ, nɔ ni ekɛɔ ji akɛ, “Biblia lɛ ji he ni hi fe fɛɛ ni esa akɛ ajɛ akojo tsɔɔmɔ ko, ejaakɛ no pɛ ji nɔ ni ja.” Enɛ hã Capito mu sane naa akɛ, sɔlemɔ lɛ tsɔɔmɔi akɛ kɛ́ Katolikbii lɛ miiye Mass lɛ, aboloo kɛ wein lɛ tsɔɔ Yesu heloo kɛ la diɛŋtsɛ yɛ naakpɛɛ gbɛ nɔ lɛ, damɔɔɔ ŋmalɛ nɔ, ni nakai nɔŋŋ eji yɛ woo ni akɛhãa saints loo hetselɔi lɛ agbɛfaŋ. (Kwɛmɔ akrabatsa ni ji ““Kwɛmɔ Akɛ Nibii Nɛɛ yɛ Mli Nakai Lo.”) Yɛ afi 1523 mli lɛ, Capito shi gbɛhe wulu ni eyɔɔ akɛ osɔfonukpa sɛɛmɔ lɛ, ni eyahi Strasbourg ni yɔɔ France lɛ, he ni no mli lɛ, mɛi ni etse amɛhe kɛjɛ Katolik jamɔ lɛ he lɛ ehe shi waa yɛ lɛ.

Capito shĩa ni yɔɔ Strasbourg lɛ batsɔ he ni mɛi ni ekpɛlɛɛɛ Katolik tsɔɔmɔi lɛ anɔ lɛ kpeɔ yɛ, ni ekã shi faŋŋ akɛ amɛsusu jamɔ mli saji kɛ Biblia tsɔɔmɔi babaoo ahe. Eyɛ mli akɛ mɛi ni etse amɛhe lɛ ateŋ mɛi komɛi tee nɔ amɛtsɔɔ Triniti tsɔɔmɔ lɛ moŋ, shi wolo ko (The Radical Reformation) tsɔɔ mli akɛ Triniti tsɔɔmɔ lɛ ejeee kpo yɛ woji ni Capito ŋmala lɛ amli. Mɛni hewɔ? Michael Servetus ni jɛ Spain ni ekase nyɔŋmɔjamɔ he saji waa lɛ kɛ Biblia lɛ tsu nii kɛkpa Triniti tsɔɔmɔ lɛ he mama. Capito ná enɛ he miishɛɛ waa.b

Akɛni mɔ ko wala baanyɛ aŋmɛɛ lɛ kɛ́ ekpoo Triniti tsɔɔmɔ lɛ hewɔ lɛ, Capito kɛ hiɛshikamɔ tsu nii kɛ́ eewie Triniti lɛ he yɛ faŋŋ mli. Kɛ̃lɛ, woji ni eŋmala lɛ tsɔɔ akɛ eyiŋ etɛ̃ɛɛ lɛ yɛ Triniti tsɔɔmɔ lɛ he kwraa dani ekɛ Servetus bɔi sharamɔ. Sɛɛ mli lɛ, Katolik osɔfo ko ŋma akɛ, Capito kɛ ewebii lɛ “ekpoo jamɔ mli sane ko ni anyɛŋ anu shishi ni ji Triniti tsɔɔmɔ ni yɔɔ Krɔŋkrɔŋ waa lɛ, ni amɛfee nakai ni amɛhãaa mɔ ko ale.” Yɛ afii 100 sɛɛ lɛ, kɛ́ aawie klɛŋklɛŋbii ni ale waa akɛ amɛwie amɛshi Triniti tsɔɔmɔ lɛ fɛɛ ahe lɛ, atsĩɔ Capito tã klɛŋklɛŋ.

Capito he eye akɛ anɔkwale lɛ, Biblia lɛ mli eyɔɔ. Ekɛɛ akɛ: “Be fɛɛ be lɛ, esa akɛ ahã Biblia lɛ kɛ Kristo mla lɛ afee nɔ ni nɔ kwɔ fe fɛɛ kɛ́ aakase nyɔŋmɔjamɔ he nii.” James M. Kittelson tsɔɔ mli akɛ, Capito “wie veveeve akɛ nɔ titri ni hã nyɔŋmɔjamɔŋ ninelɔi lɛ anine nyɛ shi ji Ŋmalɛ lɛ ni amɛkɛtsuuu nii lɛ.”

Mɔdɛŋ ni Capito bɔ akɛ ebaakase anɔkwale lɛ kɛjɛ Nyɔŋmɔ Wiemɔ lɛ mli lɛ ji nɔ ni ná Martin Cellarius (ni ale lɛ hu akɛ Martin Borrhaus), ni ji oblanyo ko ni kɛ lɛ hi shi yɛ afi 1526 mli lɛ nɔ hewalɛ, ni lɛ hu ekpɛlɛ akɛ ebaakase anɔkwale lɛ kɛjɛ Nyɔŋmɔ Wiemɔ lɛ mli.

“ANƆKWA NYƆŊMƆ LƐ HE NILEE”

Afɔ Cellarius yɛ afi 1499 mli, ni ekɛ hiɛdɔɔ kase nyɔŋmɔjamɔ kɛ jeŋnilee he nii. Etee Wittenberg, ni yɔɔ Germany lɛ ni eyatsɔɔ nii yɛ jɛmɛ. Akɛni Wittenberg ji he klɛŋklɛŋ ni mɛi bɔi amɛhe tsemɔ yɛ Katolik jamɔ lɛ he yɛ hewɔ lɛ, etsɛɛɛ nɔŋŋ ni Cellarius kɛ Martin Luther kɛ mɛi krokomɛi ni miitao amɛtsake sɔlemɔ lɛ tsɔɔmɔi lɛ ahiɛ lɛ bɔi sharamɔ. Te Cellarius aaafee tɛŋŋ ena srɔto ni yɔɔ adesai asusumɔi kɛ anɔkwalei ni yɔɔ Ŋmalɛ lɛ mli lɛ teŋ?

Wolo ko (Teaching the Reformation) tsɔɔ mli akɛ, Cellarius he eye akɛ kɛ́ mɔ ko baanu Biblia lɛ shishi jogbaŋŋ lɛ, esa akɛ “ekɛ hiɛdɔɔ akane Ŋmalɛ lɛ, ekɛ Ŋmalɛ afɔ Ŋmalɛ he too, ni esɔle ni eshwa ehe.” Be ni Cellarius pɛi Biblia lɛ mli lɛ, mɛni ena?

Yɛ July 1527 mli lɛ, Cellarius ŋma nibii ni ena lɛ yɛ ewolo ni ji On the Works of God lɛ mli. Eŋma akɛ nibii ni yɔɔ krɔŋkrɔŋ ni afeɔ yɛ sɔlemɔ lɛ mli, tamɔ aboloo kɛ wein ni akɛtsuɔ nii kɛ́ aaye Mass lɛ, ji okadifeemɔ nɔ ko diɛŋtsɛ. Woloŋlelɔ kpanaa ko ni atsɛɔ lɛ Robin Barnes lɛ tsɔɔ mli akɛ, Cellarius wolo lɛ, “tsɔɔ Biblia gbalɛi amli ni etsɔɔ akɛ be ko baaba ni amanehulu kɛ nɔnaa baaba jeŋ fɛɛ, kɛkɛ lɛ, no sɛɛ lɛ, gbalɛi ni tsɔɔ akɛ abaasaa shikpɔŋ lɛ nɔ fɛɛ lɛ hu eba mli.”​—2 Petro 3:10-13.

Nɔ ni sa kadimɔ waa hu ji wiemɔ kuku ko ni Cellarius wie kɛkɔ Yesu Kristo he lɛ. Eyɛ mli akɛ Cellarius eteee shi ewooo Triniti lɛ tɛ̃ɛ moŋ, shi etsɔɔ srɔto ni yɔɔ “Ŋwɛi Tsɛ” lɛ kɛ “e-Bi Yesu Kristo” teŋ, ni eŋma akɛ Yesu ji Nyɔŋmɔ ofe lɛ nyɔŋmɔi kɛ ebii babaoo lɛ ateŋ mɔ kome.​—Yohane 10:34, 35.

Robert Wallace ŋma yɛ ewolo ni ji Antitrinitarian Biography (eŋma yɛ afi 1850 mli) lɛ mli akɛ, woji ni Cellarius ŋmala lɛ yɛ srɔto yɛ nɔ ni mɛi ni he Triniti amɛye yɛ afi 1500 lɛ ŋmala lɛ ahe.c No hewɔ lɛ, woloŋlelɔi pii mu sane naa akɛ Cellarius kpoo Triniti tsɔɔmɔ lɛ. Awieɔ ehe akɛ eji dɛŋdadei ni Nyɔŋmɔ kɛtsu nii ni “ekɛdu anɔkwa Nyɔŋmɔ lɛ kɛ Kristo he nilee ewo mɛi amli lɛ” ateŋ mɔ kome.

HIƐNƆKAMƆ AKƐ ABAANÁ KRISTOFOI ATSƆƆMƆ NI JA

Yɛ aaafee afi 1527 mli lɛ, Johannes Campanus ni kase nyɔŋmɔjamɔ he nii, ni abuɔ lɛ akɛ efata woloŋlelɔi ni hi shi yɛ ebeaŋ lɛ ahe lɛ hu yahi Wittenberg. Eyɛ mli akɛ, Campanus yɛ mɛi ni etse amɛhe kɛjɛ Katolik jamɔ lɛ he lɛ ateŋ moŋ, shi ekɛ Martin Luther tsɔɔmɔi lɛ kpaaa gbee. Mɛni hewɔ?

Campanus kpoo susumɔ ni ahiɛ akɛ aboloo lɛ kɛ wein lɛ tsɔɔ Yesu heloo kɛ elá diɛŋtsɛ yɛ naakpɛɛ gbɛ nɔ, kɛ tsɔɔmɔ akɛ Kristo gbɔmɔtso kɛ elá lɛ hiɔ aboloo kɛ wein ni ajɔɔ nɔ lɛ mli lɛ.d Niŋmalɔ André Séguenny wie akɛ, Campanus he ye akɛ, “aboloo lɛ tsakeee etsɔɔɔ nɔ kroko, shi ákɛ nɔ ko ni yɔɔ krɔŋkrɔŋ lɛ, efeɔ Kristo gbɔmɔtso lɛ he mfoniri.” Yɛ afi 1529 mli lɛ, afee kpee ko ni atsɛɔ lɛ Marburg Colloquy yɛ Marburg ni yɔɔ Germany lɛ kɛsusu saji nɛɛ ahe, be ni afeɔ kpee lɛ, aŋmɛɛɛ Campanus gbɛ ni ewie nibii ni ekase kɛjɛ Ŋmalɛ lɛ mli lɛ ahe. No sɛɛ lɛ, enanemɛi krokomɛi ni yɔɔ Wittenberg ni etse amɛhe kɛjɛ sɔlemɔ lɛ he lɛ kpoo lɛ.

Susumɔ ni Campanus hiɛ yɛ Tsɛ lɛ, Bi lɛ, kɛ mumɔ krɔŋkrɔŋ lɛ he lɛ ji nɔ titri ni wo mɛi ni etse amɛhe lɛ amli la lɛ. Campanus tsɔɔ yɛ ewolo ni ji Restitution ni eŋma yɛ afi 1532 lɛ mli akɛ, soro Yesu yɛ e-Tsɛ lɛ he. Etsɔɔ mli akɛ: Tsɛ lɛ kɛ Bi lɛ “ekomeŋ,” taakɛ bɔ ni akɛɔ akɛ wu kɛ ŋa hu ji “heloo kome lɛ”​—amɛfee ekome, kɛ̃lɛ soro wu lɛ yɛ ŋa lɛ he. (Yohane 10:30; Mateo 19:5) Campanus wie akɛ Ŋmalɛ lɛ kɛ nakai nɔkwɛmɔnɔ lɛ nɔŋŋ tsu nii kɛtsɔɔ akɛ Tsɛ lɛ yɛ hegbɛ yɛ Bi lɛ nɔ: “Yoo fɛɛ yoo . . . yitso ji nuu, ni Kristo yitso ji Nyɔŋmɔ.”​—1 Korintobii 11:3.

Ni mumɔ krɔŋkrɔŋ lɛ hu? No hu Campanus kwɛ Biblia lɛ mli ni eŋma akɛ: “Ŋmalɛ ko bɛ ni fĩɔ sɛɛ akɛ Mumɔ Krɔŋkrɔŋ lɛ ji mɔ ni ji etɛ nɔ . . . Awieɔ Nyɔŋmɔ mumɔ lɛ nitsumɔ he, ni tsɔɔ akɛ Nyɔŋmɔ feɔ nɔ fɛɛ nɔ kɛtsɔ emumɔŋ hewalɛ kɛ nifeemɔ nɔ.”​—1 Mose 1:2.

Luther tsɛ Campanus akɛ musubɔlɔ kɛ Nyɔŋmɔ Bi lɛ henyɛlɔ. Amɛteŋ mɔ kroko hu fã ni agbe Campanus. Shi, no hãaa Campanus nijiaŋ aje wui. Wolo ko (The Radical Reformation) tsɔɔ mli akɛ, “Campanus ná nɔmimaa akɛ Biblia mli sane nɛɛ, ni kɔɔ Nyɔŋmɔ kɛ adesai ahe ni atsɔɔ yɛ bɔfoi lɛ abeaŋ, ni sɔlemɔ lɛ eyanuuu shishi lɛ ji nɔ ni kɛ amɛshigbeemɔ lɛ ba.”

No mli lɛ, ejeee Campanus yiŋtoo akɛ ebaatse jamɔ kuu. Ekɛɛ akɛ, migbo deŋme yakatswaa “be ni mifata kuu ni etse ehe lɛ he kɛtao anɔkwale lɛ.” No hewɔ lɛ, ená nɔmimaa akɛ, kɛ́ Katolik Sɔlemɔ lɛ, tsake amɛsusumɔ lɛ, amɛbaanyɛ amɛto anɔkwa Kristofoi atsɔɔmɔ lɛ shishi ekoŋŋ. Yɛ naagbee lɛ, Katolik sɔlemɔ lɛ hiɛnyiɛlɔi lɛ mɔ Campanus ni amɛwo lɛ tsuŋ, eeenyɛ efee akɛ eye nɔ ni fe afii 20 yɛ tsuŋwoo he lɛ. Yinɔsaneŋmalɔi kɛɛ egbo yɛ aaafee afi 1575 lɛ mli.

“NYƐKAA NII FIAA NYƐKWƐA”

Akɛni Capito, Cellarius, Campanus, kɛ mɛi krokomɛi kɛ hiɛdɔɔ kase Biblia lɛ hewɔ lɛ, amɛnyɛ amɛna anɔkwale lɛ kɛjɛ nɔ ni ejaaa lɛ he. Eyɛ mli akɛ nibii ni mɛi nɛɛ ni taoɔ anɔkwale lɛ sɛɛ lɛ na lɛ ekomɛi kɛ Biblia lɛ kpaaa gbee moŋ, shi hii nɛɛ jɛ heshibaa mli amɛtao Ŋmalɛ lɛ mli, ni amɛbu anɔkwalei ni amɛná lɛ akɛ nɔ ko ni jara wa waa.

Bɔfo Paulo wo enanemɛi Kristofoi lɛ hewalɛ akɛ: “Nyɛkaa nii fiaa nyɛkwɛa, ni nɔ ni hi lɛ nyɛmɔa mli.” (1 Tesalonikabii 5:21) Yehowa Odasefoi ekala wolo ko ni hiɛ saneyitso ni sa jogbaŋŋ, ni ji Mɛni Biblia lɛ Tsɔɔ Diɛŋtsɛ? koni eye ebua bo ni ona anɔkwale lɛ.