Nyɔŋmɔ Baanyɛ Ashɛje Omii

NƆ HEWƆ NI MƐI KOMƐI AYIŊ FEƆ AMƐ ENYƆƆNYƆ: Yɛ mɛi komɛi agbɛfaŋ lɛ, kɛ́ miishɛjemɔ he miihia amɛ waa po lɛ, amɛsusuɔ akɛ, sɔlemɔ ni amɛaasɔle koni Nyɔŋmɔ aye abua amɛ lɛ tsɔɔ akɛ amɛmiifo amɛ pɛ amɛnɔ mli. Yoo ko ni atsɛɔ lɛ Raquel lɛ wie akɛ, “Kɛ́ mikwɛ mɛi abɔ ni yɔɔ je lɛ mli kɛ amanehului babaoo ni amɛkɛkpeɔ lɛ, minuɔ he akɛ, naagba ni mikɛkpeɔ lɛ jeee nɔ ko kwraa ní esa akɛ mabi Nyɔŋmɔ ni eye ebua mi.”

NƆ NI NYƆŊMƆ WIEMƆ LƐ TSƆƆ: Nyɔŋmɔ efee nɔ ko momo kɛye ebua adesai, ni eshɛje amɛmii yɛ gbɛ krɛdɛɛ ko ni sa waa nɔ. Afɔ mɔ fɛɛ mɔ ni yɔɔ shikpɔŋ lɛ nɔ ŋmɛnɛ lɛ yɛ esha mli, no hewɔ lɛ, mɔ ko kwraa bɛ ni baanyɛ afee Nyɔŋmɔ suɔmɔnaa nii kɛmɔ shi. Kɛ̃lɛ, Nyɔŋmɔ “sumɔ wɔ, ni etsu ebi lɛ [Yesu Kristo] akɛ ebafee wɔhe eshai lɛ ahe kpatamɔ nɔ̃.” (1 Yohane 4:10) Nyɔŋmɔ tsɔ Yesu afɔleshãa gbele lɛ nɔ koni ehã wɔná eshaifaa, henilee ni he tse, kɛ naanɔ wala he hiɛnɔkamɔ yɛ jeŋ hee ko ni toiŋjɔlɛ yɔɔ mli lɛ mli.a Shi ani nakai afɔleshãa lɛ yɛ kɛhã adesai aweku lɛ fɛɛ kɛkɛ, aloo ani etsɔɔ hu akɛ Nyɔŋmɔ susuɔ ohe waa akɛ mɔ aŋkro?

Susumɔ bɔfo Paulo he okwɛ. Yesu afɔleshãa lɛ ná enɔ hewalɛ aahu akɛ eŋma akɛ: ‘Nyɔŋmɔ bi lɛ, ni sumɔ mi ni eŋɔ ehe ehã yɛ mihewɔ lɛ, hemɔkɛyeli mli mihiɛ ka yɛ.’ (Galatabii 2:20) Eji anɔkwale akɛ, Yesu gbo dani Paulo batsɔ Kristofonyo. Kɛ̃lɛ, Paulo na Yesu afɔleshãa lɛ akɛ eji nikeenii ni Nyɔŋmɔ diɛŋtsɛ kɛduro lɛ.

Yesu afɔleshãa gbele lɛ ji nikeenii ni Nyɔŋmɔ diɛŋtsɛ kɛduro bo hu. Nikeenii nɛɛ tsɔɔ akɛ Nyɔŋmɔ shwɛɛɛ ohe kwraa. Ebaanyɛ ehã onyɛ oná “naanɔ miishɛjemɔ kɛ nɔhiɛnɔkamɔ kpakpa,” koni ‘ewaje bo yɛ wiemɔ kpakpa kɛ nitsumɔ kpakpa fɛɛ mli.’​—2 Tesalonikabii 2:16, 17.

Shi, aaafee afii 2,000 nɛ ni Yesu kɛ ewala shã afɔle. Mɛɛ odaseyeli yɔɔ ni tsɔɔ akɛ Nyɔŋmɔ miitao ni okɛ lɛ abɔ ŋmɛnɛ?