SANEBIMƆI NI BIBLIA LƐ EHÃ HETOO
Ani ŋwɛibɔfoi baanyɛ aye abua wɔ?
Tamɔ bɔ ni ŋwɛibɔfoi lɛ ye amɛbua Daniel, ni ji Nyɔŋmɔ jaìlɔ ni yeɔ anɔkwa ni hi shi yɛ blema lɛ, nakai nɔŋŋ ŋmɛnɛ lɛ, amɛyeɔ amɛbuaa mɛi ni amɛná sane kpakpa lɛ he sɛɛ
Yehowa Nyɔŋmɔ bɔ ŋwɛibɔfoi akpekpei abɔ, sɛɛ mli kwraa dani ebɔ adesai. (Hiob 38:4, 7) Ŋwɛibɔfoi nɛɛ ji mumɔŋ bɔɔnii ni yɔɔ hewalɛ ni sɔmɔɔ Nyɔŋmɔ, bei komɛi lɛ, Nyɔŋmɔ tsuɔ amɛ koni amɛyatsɔɔ mɛi ni sɔmɔɔ lɛ yɛ shikpɔŋ lɛ nɔ lɛ agbɛ ni amɛbu amɛhe. (Lala 91:10, 11) Ŋmɛnɛ lɛ, ŋwɛibɔfoi miiye kɛmiibua mɛi ni amɛná sane kpakpa ni Yesu sɛɛnyiɛlɔi lɛ shiɛɔ lɛ he sɛɛ.—Kanemɔ Kpojiemɔ 14:6, 7.
Ani esa akɛ wɔsɔle wɔhã ŋwɛibɔfoi lɛ ni amɛye amɛbua wɔ? Dabi. Sɔlemɔ ji jamɔ nifeemɔ, ni Nyɔŋmɔ pɛ esa akɛ wɔsɔle wɔhã ni eye ebua wɔ. (Kpojiemɔ 19:10) Akɛni Nyɔŋmɔ sɔɔlɔi ji ŋwɛibɔfoi lɛ hewɔ lɛ, kɛ́ ekɛ gbɛtsɔɔmɔ hã amɛ lɛ amɛboɔ lɛ toi moŋ fe ni amɛaabo adesai atoi. No hewɔ lɛ, be fɛɛ be lɛ, esa akɛ wɔsɔle wɔhã Nyɔŋmɔ pɛ, ní wɔkɛtsɔ Yesu nɔ.—Kanemɔ Lala 103:20, 21; Mateo 26:53.
Ani ayɛ ŋwɛibɔfoi fɔji?
Taakɛ adesai ji lɛ, abɔ ŋwɛibɔfoi lɛ hu kɛ heyeli ni amɛbaanyɛ amɛhala akɛ amɛbaafee nɔ ni ja loo nɔ ni ejaaa. Awerɛho sane ji akɛ, ŋwɛibɔfoi pii te shi amɛwo Nyɔŋmɔ. (2 Petro 2:4) Satan ji mɔ klɛŋklɛŋ ni te shi ewo Nyɔŋmɔ; ŋwɛibɔfoi krokomɛi hu fee nakai ni amɛbatsɔmɔ daimonioi. Nyɛsɛɛ nɛɛ lɛ, ashɛrɛ Satan kɛ edaimonioi lɛ kɛjɛ ŋwɛi ashwie shikpɔŋ lɛ nɔ.—Kanemɔ Kpojiemɔ 12:7-9.
Efɔŋfeemɔ kɛ awuiyeli ni efa kɛjɛ afi 1914 lɛ mli kɛbaa nɛɛ ji okadi ni tsɔɔ akɛ etsɛŋ ni Nyɔŋmɔ baakpata Satan kɛ edaimonioi lɛ ahiɛ. Kɛkɛ lɛ, Nyɔŋmɔ baahã shikpɔŋ lɛ aku sɛɛ atsɔ paradeiso ekoŋŋ taakɛ eji yɛ shishijee lɛ.—Kanemɔ Kpojiemɔ 12:12; 21:3, 4.