Nɔ Hewɔ ni Biblia lɛ Enyɛ Ehi Shi Kɛbashi Ŋmɛnɛ

Biblia lɛ enyɛ ehi shi kɛbashi ŋmɛnɛ. Enɛ hewɔ lɛ, obaanyɛ oná eko ní okane ŋmɛnɛ. Ni kɛ́ ohala Biblia ni atsɔɔ shishi jogbaŋŋ lɛ, obaanyɛ oná nɔmimaa akɛ nɔ ni okaneɔ lɛ tamɔ nɔ ni aŋma yɛ blema lɛ nɔŋŋ.a Shi mɛni hewɔ Biblia lɛ enyɛ ekpee fitemɔ, shiteekɛwoo ni naa wa, kɛ gbɛ ni aje atsake emli saji lɛ ekomɛi lɛ naa, ni enyɛ ehi shi kɛbashi ŋmɛnɛ lɛ? Mɛni hewɔ esoro wolo nɛɛ kwraa nakai lɛ?

Mɛi babaoo ni kaseɔ Biblia lɛ kɛ nɔ ni bɔfo Paulo wie lɛ kpãa gbee. Eŋma akɛ: “Ŋmalɛ lɛ fɛɛ jɛ Nyɔŋmɔ mumɔ lɛŋ.” (2 Timoteo 3:16) Amɛheɔ amɛyeɔ akɛ Biblia lɛ enyɛ ehi shi ejaakɛ eji Nyɔŋmɔ Wiemɔ, ni eyɛ srɔto kwraa, ni akɛ, Nyɔŋmɔ ebaa yi kɛbashi ŋmɛnɛ. Faizal, ni atsĩ etã yɛ klɛŋklɛŋ sane ni yɔɔ Buu-Mɔɔ nɛɛ mli lɛ kpɛ mli akɛ ebaakase Biblia lɛ koni ekɛna kɛji nibii ni awie yɛ Biblia lɛ he lɛ ja loo ejaaa. Nɔ ni ena lɛ hã enaa kpɛ ehe. Etsɛɛɛ kɛkɛ ni ebayɔse akɛ tsɔɔmɔi pii ni Kristendom sɔlemɔi lɛ tsɔɔ lɛ bɛ Biblia lɛ mli. Kɛfata he lɛ, be ni ená ele nɔ ni Biblia lɛ kɛɔ yɛ Nyɔŋmɔ yiŋtoo kɛhã shikpɔŋ lɛ he lɛ, emii shɛ ehe waa.

Ewie akɛ: “Amrɔ nɛɛ mina faŋŋ akɛ Biblia lɛ ni mihiɛ lɛ ji nikeenii ko ni jɛ Nyɔŋmɔ ŋɔɔ. Kɛ́ Nyɔŋmɔ yɛ hewalɛ ni ebaanyɛ ekɛbɔ jeŋ muu lɛ fɛɛ lɛ, ani enyɛŋ ehã wɔ wolo ko ni ebaa yi hu ehã wɔ? Kɛ́ mikpɛlɛɛɛ sane nɛɛ nɔ lɛ, belɛ miiba hewalɛ ni Nyɔŋmɔ, ni ji Ofe lɛ yɔɔ lɛ shi. Ni namɔ ji mi ni maba hewalɛ ni Nyɔŋmɔ yɔɔ lɛ shi?”​—Yesaia 40:8.