Mɛni Biblia lɛ Kɛɔ?

Ani adesai ni to jamɔ shishi?

MƐI KOMƐI HEƆ YEƆ akɛ adesai ji mɛi ni to jamɔ shishi; mɛi krokomɛi hu susuɔ akɛ Nyɔŋmɔ tsɔɔ jamɔ nɔ eyeɔ ebua mɛi koni amɛtsi amɛbɛŋkɛ lɛ. Te bo hu osusuɔ tɛŋŋ?

NƆ NI BIBLIA LƐ KƐƆ

‘Jamɔ ko yɛ ni he tse ní abuleko yɛ wɔ-Nyɔŋmɔ kɛ wɔ-Tsɛ lɛ hiɛ.’ (Yakobo 1:27) Jamɔ ni he tse, ni ji anɔkwa jamɔ lɛ jɛ Nyɔŋmɔ ŋɔɔ.

NƆ KROKO HU NI BIBLIA LƐ TSƆƆ WƆ

• Dani jamɔ ko baasa Nyɔŋmɔ hiɛ lɛ, esa akɛ etsɔɔmɔi lɛ adamɔ Biblia mli anɔkwalei anɔ.​—Yohane 4:23, 24.

• Sɛɛnamɔ bɛ jamɔi ni tsɔɔmɔi damɔ adesai asusumɔi anɔ lɛ ahe.—Marko 7:7, 8.

Ani ehe miihia ni wɔhi jamɔ pɔtɛɛ ko mli?

MƐNI OBAAKƐƐ?

• Hɛɛ

• Dabi

• Ekolɛ

NƆ NI BIBLIA LƐ KƐƆ

“Nyɛhãa wɔteŋ mɔ fɛɛ mɔ asusua enyɛmi he bɔ ni afee ni wɔkanyakanyaa wɔhe koni wɔjie suɔmɔ kpo ní wɔtsu nitsumɔi kpakpai, ni wɔkakwa kpe ni wɔkpeɔ kutuu lɛ.” (Heb 10:24, 25) Nyɔŋmɔ miisumɔ ni ejálɔi lɛ afee kuu ni ato amɛhe gbɛjianɔ.

NƆ KROKO HU NI BIBLIA LƐ TSƆƆ WƆ

• Esa akɛ mɛi ni feɔ ekome kɛjáa Nyɔŋmɔ lɛ ahiɛ hemɔkɛyeli kome.​—1 Korintobii 1:10, 11.

• Mɛi ni yɔɔ jamɔ ni Nyɔŋmɔ kpɛlɛɔ nɔ lɛ mli lɛ feɔ jeŋ muu fɛɛ weku kome.​—1 Petro 2:17.