Ani Oosaa Ohe Ooto Be Ni ‘Shikpɔŋ Lɛ Baatsɔ Onɔ’ Lɛ?

ANI OOFEE NIBII NI BAANYƐ AYE ABUA BO NI OFATA HE KƐSAA SHIKPƆŊ LƐ NƆ?

Be ni Yehowa bɔ adesai lɛ, efã amɛ ni ‘amɛyi shikpɔŋ lɛ nɔ obɔ ni amɛkwɛ nɔ.’ (1 Mo. 1:28) Enɛ tsɔɔ akɛ, Nyɔŋmɔ shwe ni adesai asaa shikpɔŋ lɛ nɔ, koni fiofio lɛ, shikpɔŋ muu lɛ fɛɛ atsɔ paradeiso. Nitsumɔ nɛɛ kã shi kɛhã mɛi ni wɔsɛɛ lɛ shikpɔŋ lɛ baatsɔ amɛnɔ lɛ. Shi akɛni Eden abɔɔ lɛ bɛ dɔŋŋ hewɔ lɛ, amɛbɛ paradeiso ko ni amɛbaalɛɛ mli kɛkpele shikpɔŋ lɛ nɔ fɛɛ. Anɔkwa, yɛ Harmagedon sɛɛ lɛ, ehe baahia ni atsu nii waa kɛsaa shikpɔŋ lɛ nɔ hei ni efite lɛ. Ŋwanejee ko bɛ he akɛ, enɛ ebafeŋ nitsumɔ bibioo kwraa!

Enɛ hãa wɔkaiɔ be ni aŋɔ Israelbii lɛ nom kɛtee Babilon ni ahã amɛku amɛsɛɛ kɛba amɛshikpɔŋ lɛ nɔ ekoŋŋ lɛ. No mli lɛ, amɛshikpɔŋ lɛ ekã shi afii 70 ni mɔ ko mɔ ko bɛ nɔ. Shi gbalɔ Yesaia gba akɛ, Yehowa baaye ebua amɛ ni amɛsaa amɛshikpɔŋ lɛ nɔ ni esaa efee fɛo ekoŋŋ. Ewie akɛ: “Ebaahã eŋa lɛ nɔ atsɔ tamɔ Eden ni eŋa kpataa lɛ hu baatsɔ tamɔ Yehowa abɔɔ lɛ.” (Yes. 51:3) Nakai pɛpɛɛpɛ eba lɛ. Yehowa ye ebua amɛ ni amɛsaa amɛshikpɔŋ lɛ nɔ fɛfɛo ekoŋŋ. Nakai nɔŋŋ Yehowa baaye ebua mɛi ni shikpɔŋ lɛ baatsɔ amɛnɔ lɛ ni amɛbaasaa shikpɔŋ lɛ nɔ fɛfɛo. Shi mɛni obaanyɛ ofee kɛtsɔɔ akɛ oosumɔ ni ofata he kɛsaa shikpɔŋ lɛ nɔ yɛ nakai beiaŋ?

Nɔ kome ni obaanyɛ ofee ji, ni obaasaa oshĩa lɛ kɛ ehewɔ ni ohã efee falefale be fɛɛ be. Obaanyɛ ofee nakai kɛ́ mɛi ni yɔɔ okutso lɛ mli lɛ ekuraaa amɛshĩai lɛ jogbaŋŋ po. Obaanyɛ oye obua kɛsaa nyɛ-Maŋtsɛyeli Asa lɛ kɛ Kpee Asa lɛ nɔ hu. Kɛ́ nɔ ko etsĩii onaa lɛ, obaanyɛ ofiili fɔm kɛhã mɛi ni miisumɔ ni amɛyaye amɛbua kɛ́ oshãra ba lɛ. Enɛ baatsɔɔ akɛ, be fɛɛ be ni oshãra baaba he ko lɛ, oosumɔ ni oye obua. Agbɛnɛ hu, obaanyɛ okase hesai komɛi ni wɔsɛɛ lɛ kɛ́ Yehowa dro bo akɛ ohi shikpɔŋ lɛ nɔ kɛya naanɔ lɛ, obaanyɛ okɛye obua kɛsaa shikpɔŋ lɛ nɔ.

ANI OOSAA OHE OOTO KONI ONYƐ OYE OBUA KƐKWƐ MƐI NI ABAATEE AMƐ SHI LƐ?

Be ni Yesu tee Yairo biyoo lɛ shi nɔŋŋ lɛ, ebi ni ahã gbekɛ lɛ nɔ ko ni eye. (Mar. 5:42, 43) Ekolɛ ewaŋ akɛ abaatao niyenii ahã gbekɛ ni eye afii 12 lɛ ni eye. Shi kɛ́ okwɛ lɛ, kɛ́ shi ni Yesu ewo akɛ “mɛi fɛɛ ni yɔɔ gbohii abui lɛ amli lɛ baanu egbee ni amɛbaaje kpo” lɛ ba mli lɛ, te amɛkwɛmɔ baaji ahã tɛŋŋ? (Yoh. 5:28, 29) Eyɛ mli akɛ Biblia lɛ ewieko nibii babaoo yɛ enɛ he moŋ, shi wɔle akɛ nibii tamɔ niyenii, wɔɔhe, atade, kɛ nibii krokomɛi ahe baahia mɛi ni abaatee amɛ shi lɛ. Ani nibii komɛi yɛ ni obaanyɛ ofee bianɛ po kɛsaa ohe oto koni onyɛ oye obua amɛ? Susumɔ nibii ni nyiɛ sɛɛ nɛɛ ahe okwɛ.

Kɛ́ atswa adafi akɛ kpokpaa nɔkwɛlɔ lɛ miiba ebasara nyɛsafo lɛ, obaanyɛ ohã asafoŋ onukpai lɛ ale akɛ kɛ́ eba lɛ obaasumɔ ni ebaye nii yɛ oŋɔɔ. Kɛ́ nyɛmi ko ni yɔɔ Betel lɛ nitsumɔ tsake ni no hewɔ lɛ eetao he ko ehi yɛ nyɛkutso lɛ mli, loo shihilɛ ko hewɔ lɛ kpokpaa nɔkwɛlɔ ko nyɛɛɛ asɔmɔ dɔŋŋ akɛ kpokpaa nɔkwɛlɔ ni eetao he ko ehi lɛ, obaanyɛ oye obua nyɛmimɛi nɛɛ ni amɛná he ko ni sa amɛhi. Kɛ́ aaba abafee kpokpaa wulu nɔ kpee loo kpee krɛdɛɛ yɛ he ni oyɔɔ lɛ, obaanyɛ okɛ ohe ahã kɛsaa he ni abaafee kpee lɛ yɛ lɛ dani kpee be lɛ ashɛ loo be ni agbe kpee lɛ naa. Agbɛnɛ hu, obaanyɛ ofata he kɛhere mɛi ni jɛ maŋ kroko nɔ amɛmiiba kpee yɛ he ni nyɛyɔɔ lɛ.

ANI OOSAA OHE OOTO KONI OTSƆƆ MƐI NI ABAATEE AMƐ SHI LƐ NII?

Yɛ nɔ ni awie yɛ Bɔfoi 24:15 lɛ naa lɛ, abaatee mɛi akpekpe toi akpei abɔ shi. Mɛi nɛɛ ateŋ mɛi babaoo ji mɛi ni náaa hegbɛ amɛkase Yehowa he nii dani amɛgboi. Kɛ́ atee amɛ shi lɛ, amɛbaaná hegbɛ lɛ akɛ amɛkase Yehowa he nii.a Nyɔŋmɔ tsuji anɔkwafoi ni le nitsɔɔmɔ jogbaŋŋ ni baatsɔɔ amɛ nii. (Yes. 11:9) Nyɛmi yoo ko ni atsɛɔ lɛ Charlotte ni eshiɛ yɛ Yuropa, South Amerika, kɛ Afrika lɛ kɛ miishɛɛ miikpa nakai be lɛ gbɛ waa. Ewie akɛ: “Miishwe waa ni matsɔɔ mɛi ni abaatee amɛ shi lɛ nii. Kɛ́ mikane mɔ ko ni hi shi yɛ blema lɛ he sane lɛ, bei pii lɛ mikɛɔ mihe akɛ, ‘Eji mɔ nɛɛ ná ele Yehowa kulɛ, ekolɛ efeŋ enii bɔ ni efee lɛ.’ Miishwe waa ni magba mɛi ni abaatee amɛ shi lɛ Yehowa he nii ni mahã amɛle akɛ kɛ́ amɛsɔmɔ lɛ lɛ, amɛbaaná he sɛɛ waa.”

Nibii pii yɛ ni Yehowa tsuji anɔkwafoi ni hi shi dani Yesu ba shikpɔŋ lɛ nɔ lɛ po baakase. Ebaafee miishɛɛ waa akɛ wɔbaagba mɔ ko tamɔ Daniel bɔ ni gbalɛi ni eŋmala eshwie shi ni enuuu shishi lɛ ba mli amɛhã. (Dan. 12:8) Enɛ baafee hegbɛ kpele diɛŋtsɛ. Aloo kwɛ bɔ ni ebaafee miishɛɛ ehã kɛ́ wɔmiigba Rut kɛ Naomi akɛ amɛwekutɔkpaa lɛ mli Mesia lɛ jɛ. Ebaaŋɔɔ wɔnaa waa akɛ wɔbaafata he kɛtsu nitsɔɔmɔ nitsumɔ ni baaya nɔ yɛ jeŋ fɛɛ yɛ nakai beiaŋ lɛ eko, ejaakɛ nibii ni yaa nɔ yɛ jeŋ fɔŋ nɛɛ mli ni suɔ wɔtsui ni gbalaa wɔjwɛŋmɔ lɛ eko ehiŋ shi dɔŋŋ!

Mɛni obaanyɛ ofee bianɛ kɛtsɔɔ akɛ oosaa ohe ooto koni otsɔɔ mɛi ni abaatee amɛ shi lɛ nii? Nɔ kome ni obaanyɛ ofee ji, ni obaaya ohiɛ yɛ bɔ ni otsɔɔ nii ohãa lɛ mli, ni agbɛnɛ hu, okɛ ohe awo shiɛmɔ nitsumɔ ni atsuɔ yɛ jeŋ fɛɛ lɛ mli waa. (Mat. 24:14) Kɛ́ afii abɔ ni oye loo shihilɛ ko hewɔ lɛ bianɛ lɛ onyɛɛɛ otsu shiɛmɔ nitsumɔ lɛ bɔ ni otsui shweɔ po lɛ, onyɛmɔ fɛɛ ni okɛtsuɔ lɛ baanyɛ atsɔɔ akɛ oosaa ohe ooto koni onyɛ otsɔɔ mɛi ni abaatee amɛ shi lɛ nii.

No hewɔ lɛ, sane ko ni he hiaa waa ni esa akɛ wɔbi wɔhe ji, ‘Ani miifee nibii ni tsɔɔ akɛ miisaa mihe miito be ni shikpɔŋ lɛ baatsɔ minɔ lɛ lɛɛlɛŋ? Ani miikpa be ni abaasaa shikpɔŋ lɛ nɔ fɛfɛo lɛ gbɛ? Ani miisaa mihe miito koni maye mabua kɛkwɛ mɛi ni abaatee amɛ shi lɛ ni atsɔɔ amɛ nii?’ Kɛ́ oŋɔ hegbɛ fɛɛ hegbɛ ni obaaná lɛ kɛtsu nibii ni abaatsu wɔsɛɛ be ni shikpɔŋ lɛ etsɔ onɔ lɛ, no baatsɔɔ akɛ oosaa ohe ooto lɛɛlɛŋ!