Sanebimɔi Ni Jɛ Kanelɔi Adɛŋ
Be ni David ŋma Lala 61:8 lɛ, ewie akɛ, ebaajie Nyɔŋmɔ gbɛ́i lɛ yi kɛya “naanɔ.” Ani enɛ tsɔɔ akɛ David susu akɛ egboŋ kɔkɔɔkɔ?
Dabi. Nɔ ni David wie lɛ ja, ni jeee sane he ewoɔ.
David wie yɛ Lala 61:8 lɛ akɛ: “Malá majie ogbɛ́i lɛ yi kɛya naanɔ be ni miyeɔ mishiwoi lɛ anɔ gbi fɛɛ gbi lɛ.” Ewie nɔ ko ni tamɔ nɛkɛ nɔŋŋ yɛ ŋmalɛi krokomɛi ni eŋmala lɛ hu amli. Akɛ nɔkwɛmɔnɔ lɛ ewie akɛ: “Ao Yehowa, mi-Nyɔŋmɔ, majie oyi kɛ mitsui fɛɛ, ni mawo ogbɛ́i lɛ hiɛ nyam kɛya naanɔ.” Ni eŋma hu akɛ: “Majie ogbɛ́i lɛ yi kɛya naanɔi anaanɔ.”—Lala 86:12; 145:1, 2.
Be ni David ŋma sane nɛɛ, no mli lɛ ehiɛɛɛ susumɔ lɛ akɛ egboŋ kɔkɔɔkɔ. Ele akɛ, akɛ adesai lɛ wɔ fɛɛ wɔfee esha, no hewɔ lɛ bɔ fɛɛ bɔ ni fee lɛ wɔbaagboi tamɔ bɔ ni Yehowa ewie lɛ. (1 Mo. 3:3, 17-19; Lala 51:4, 5) Ele hu akɛ, Yehowa tsuji anɔkwafoi tamɔ Abraham, Isak, kɛ Yakob ni hi shi yɛ blema lɛ gboi, ni lɛ hu ebaagbo kɛ̃. (Lala 37:25; 39:4) No hewɔ lɛ, nɔ ni David wie yɛ Lala 61:8 lɛ tsɔɔ akɛ, eeshwe, ni etswa efai shi hu akɛ, ebaajie Nyɔŋmɔ yi kɛya naanɔ, ni tsɔɔ akɛ, ebaajie Nyɔŋmɔ yi kɛyashi ebaagbo.—2 Sam. 7:12.
Nibii ni David ŋmala lɛ ekomɛi kɔɔ shihilɛi ni eyaje mli lɛ ahe, tamɔ bɔ ni wɔnaa yɛ yiteŋgbɛ niŋmaa ni yɔɔ Lala 18, 51, kɛ 52 lɛ mli lɛ. Yɛ Lala 23 lɛ, David wie akɛ, Yehowa ji tookwɛlɔ ni kwɛɔ enɔ, etsɔɔ lɛ gbɛ, ehãa emii shɛɔ ehe, ni ebuɔ ehe. Be ni David ji tookwɛlɔ lɛ, nɛkɛ pɛpɛɛpɛ eyɔɔ, ni no hewɔ eesumɔ ni esɔmɔ Yehowa ‘ewala gbii fɛɛ’ lɛ.—Lala 23:6.
Kaimɔ akɛ Yehowa ni kɛ emumɔ lɛ tsirɛ David ni eŋmala nibii nɛɛ. Nibii ni eŋmala lɛ ekomɛi lɛ, gbalɛi ni, ni wɔsɛɛ dani amɛbaaba mli. Akɛ nɔkwɛmɔnɔ lɛ, yɛ Lala 110 lɛ, David wie akɛ, be ko baashɛ ni abaahã e-Nuŋtsɔ lɛ ‘ata Nyɔŋmɔ ninejurɔ nɔ’ yɛ ŋwɛi ni abaahã lɛ hewalɛ kpele. Koni efee mɛni? Koni ekpãtã mɛi ni nyɛɔ Nyɔŋmɔ lɛ ahiɛ, ni ‘egbala jeŋmaji lɛ atoi.’ David wekutɔkpaa lɛ mli Yesu, ni ji Mesia lɛ jɛ. Mesia nɛɛ baajɛ ŋwɛi eye shikpɔŋ lɛ nɔ, ni ebaasɔmɔ akɛ ‘osɔfo kɛbaaya naanɔ.’ (Lala 110:1-6) Be ni Yesu ba shikpɔŋ lɛ nɔ lɛ, ehã ana akɛ gbalɛ ni yɔɔ Lala 110 lɛ kɔɔ ehe, ni ebaaba mli wɔsɛɛ.—Mat. 22:41-45.
Enɛ hãa wɔnaa akɛ, nibii ni akɛ mumɔ tsirɛ David ni eŋmala lɛ ekomɛi kɔɔ nibii ni tee nɔ yɛ ebeiaŋ lɛ ahe, ni ekomɛi hu kɔɔ nibii ni baaba mli wɔsɛɛ be ni atee lɛ shi ni ená hegbɛ akɛ ejie Yehowa yi kɛya naanɔ lɛ ahe. Enɛ yeɔ ebuaa wɔ ni wɔnaa akɛ, nɔ ni David wie yɛ Lala 37:10, 11, 29 lɛ baanyɛ akɔ nibii ni tee nɔ yɛ blema Israel lɛ ahe, ni yɛ nakai beiaŋ nɔŋŋ lɛ, ebaanyɛ ekɔ nibii ni baaya nɔ yɛ shikpɔŋ lɛ nɔ wɔsɛɛ be ni Yehowa eye eshiwoo lɛ nɔ lɛ ahe.—Kwɛmɔ sane ni yitso ji, “Obaafata Mihe Yɛ Paradeiso” lɛ kuku 8 lɛ. Eyɛ Buu-Mɔɔ nɛɛ nɔŋŋ mli.
Nɔ ni David ŋma yɛ Lala 61:8 kɛ ŋmalɛi krokomɛi ni tamɔ nakai lɛ hãa wɔnaa nɔ ni David miitao ni efee be ni eyɔɔ wala mli lɛ. No ji, eesumɔ ni ejie Yehowa yi kɛyashi ebaagbo. Agbɛnɛ hu, ehãa wɔnaa nɔ ni David baafee wɔsɛɛ be ni Yehowa etee lɛ shi lɛ.