Namɔ Baabaa Shikpɔŋ Lɛ Yi?

Bɔ ni adesai fiteɔ shikpɔŋ lɛ kɛ wala ni yɔɔ nɔ lɛ miisu mɛi babaoo atsui waa. Mɛi ni ekase shikpɔŋ lɛ kɛ enɔ nibii lɛ ahe nii lɛ kɛɛ, adesai anifeemɔi kɛ kooloi komɛi awala miiwo oshara mli, ni eekpatã kooloi kɛ tsei komɛi ahiɛ yɛ shikpɔŋ lɛ nɔ fe bei fɛɛ ni eho.

Ani adesai baafite shikpɔŋ lɛ? Aloo, ani be ko baaba ni amɛkpatãŋ nibii ni yɔɔ nɔ lɛ ahiɛ?

Ani adesai amɔdɛŋbɔɔ lɛ baaye omanye?

Mɛi ni kaseɔ shikpɔŋ lɛ kɛ enɔ nibii lɛ ahe nii lɛ ateŋ mɛi pii ewie akɛ, adesai baanyɛ akwɛ shikpɔŋ lɛ jogbaŋŋ ni amɛkpatãaa nibii ni yɔɔ nɔ lɛ ahiɛ. Niiamlitaolɔi komɛi ewie akɛ dani adesai baaye omanye yɛ enɛ feemɔ mli lɛ, ja amɛfee tsakemɔi komɛi yɛ nibii pii amli yɛ be kome too mli. Tsakemɔi nɛɛ ekomɛi nɛ:

Esa akɛ mɛi ahiɛ ahi bɔ ni amɛkuraa shikpɔŋ lɛ, kooi, hei ni nui yɔɔ, kɛ ŋshɔ lɛ jogbaŋŋ fe bɔ ni amɛfeɔ bianɛ lɛ.
Esa akɛ atsake okwaayeli gbɛi kɛ gbɛi ni atsɔɔ nɔ anáa srawa hewalɛ loo ilɛktrisiti kɛ mu lɛ mli.
Esa akɛ wɔtsake wɔniyeli mli, ni wɔfɔ dumɔnii kɛ yelibai yeli, ni wɔgbɔ loi henɔi fɛɛ ni wɔkpeɔ lɛ nɔ.
Esa akɛ wɔkpɛlɛ nɔ akɛ, shihilɛ kpakpa ni wɔbaaná lɛ damɔɔɔ heloonaa nibii pii ni wɔbaaná be fɛɛ be lɛ nɔ.

Te osusuɔ tɛŋŋ? Ani wɔbaanyɛ wɔkpa gbɛ akɛ nɔyelii, nitsumɔi, kɛ aŋkroaŋkroi kɛ ŋaawoi nɛɛ baatsu nii fe bei fɛɛ ni eho? Loo osusuɔ akɛ hiɛkɔɔ, ŋkomeŋfa, kɛ nii ni akwɛɛɛ kɛyaaa shɔŋŋ baafite gbɛjianɔtoo nɛɛ?—2 Timoteo 3:1-5.

Nɔ hewɔ ni wɔbaanyɛ wɔná hiɛnɔkamɔ

Biblia lɛ hãa wɔnáa nɔmimaa akɛ, wɔshikpɔŋ lɛ baahi shi kɛya naanɔ. Etsɔɔ nɔ hewɔ ni adesai amɔdɛŋbɔi pɛ nyɛŋ abaa shikpɔŋ nɛɛ yi lɛ, ehãa wɔnaa tsakemɔi diɛŋtsɛ ni esa akɛ afee. Etsɔɔ wɔ gbɛ nɔ hu ni abaatsɔ afee tsakemɔi nɛɛ.

Nɔ hewɔ ni adesai amɔdɛŋbɔi pɛ nyɛŋ abaa shikpɔŋ lɛ yi. Yehowaa Nyɔŋmɔ bɔ shikpɔŋ lɛ, ni ekɛ adesai wo nɔ koni amɛkwɛ nɔ. (1 Mose 1:28; 2:15) Ja adesai kɛ amɛ-Bɔlɔ lɛ gbɛtsɔɔmɔi kɛ emlai tsu nii dani amɛbaanyɛ amɛye omanye yɛ nitsumɔ nɛɛ mli. (Abɛi 20:24) Adesai eyafeee nakai, moŋ lɛ, amɛkpoo Yehowa ni amɛkɛ amɛ diɛŋtsɛ amɛgbɛtsɔɔmɔi bɔi nitsumɔ. (Jajelɔ 7:29) Adesai bɛ nyɛmɔ ni amɛ pɛ amɛbaanyɛ amɛkwɛ shikpɔŋ lɛ jogbaŋŋ ni amɛbaa yi, ni amɛmɔdɛŋbɔi yɛ enɛ gbɛfaŋ lɛ nyɛŋ aye omanye.—Abɛi 21:30; Yeremia 10:23.

Tsakemɔi ni esa akɛ afee. Nyɔŋmɔ ekpɛ eyiŋ akɛ ehãŋ adesai afite shikpɔŋ lɛ kɔkɔɔkɔ. (Kpojiemɔ 11:18) Eyeŋ ebuaŋ adesai anɔyelii kɛ kui ni miifite shikpɔŋ lɛ, moŋ lɛ, ekɛ nɔyeli kroko kɛ gbɛjianɔtoo kroko baaye amɛnajiaŋ. (Kpojiemɔ 21:1) Enɛ hewɔ lɛ Yehowa wie akɛ: “Naa! Miifee nibii fɛɛ ehee.”—Kpojiemɔ 21:5.

Gbɛ nɔ ni ebaatsɔ efee nakai tsakemɔ lɛ. Yehowa kɛ ŋwɛi nɔyeli ko, ni atsɛɔ lɛ Nyɔŋmɔ Maŋtsɛyeli lɛ, baaye adesai anɔyelii anajiaŋ. Nakai nɔyeli lɛ, ni Yesu Kristo ji enɔ maŋtsɛ lɛ, baaye shikpɔŋ nɛɛ nɔ fɛɛ.—Daniel 2:44; Mateo 6:10.

Nyɔŋmɔ Maŋtsɛyeli lɛ baatsɔse adesai fɛɛ koni amɛhi shi yɛ Nyɔŋmɔ jalɛ shishitoo mlai lɛ anaa. Kɛ́ adesai yɔse amɛ-Bɔlɔ lɛ, ni amɛhi shi yɛ egbɛtsɔɔmɔi lɛ anaa lɛ, amɛbaanyɛ amɛhi shikpɔŋ lɛ nɔ ni amɛfiteŋ enɔ nibii lɛ. (Yesaia 11:9) Biblia lɛ tsɔɔ bɔ ni Nyɔŋmɔ nɔyeli lɛ baahã eshishibii lɛ aná shihilɛ ni nɔ bɛ, ni ehãŋ amɛfite shikpɔŋ lɛ nɔ nibii lɛ. Nyɔŋmɔ nɔyeli lɛ baafee nibii ni nyiɛ sɛɛ nɛɛ:

Ebaahã mɔ fɛɛ mɔ aná niyenii eye.—Lala 72:16.
Ebaasaa shikpɔŋ lɛ nɔ nibii fɛɛ ni afite lɛ lɛ.—Yesaia 35:1, 2, 6, 7.
Ebaakwɛ ni adesai aye kooloi anɔ, ni kooloi lɛ hu akaye adesai awui.—Yesaia 11:6-8; Hosea 2:18.
Ebaakwɛ ni nibii ni mɛi tsɛɔ lɛ adebɔɔ naa osharai lɛ akaba.—Marko 4:37-41.

Obaanyɛ okpa gbɛ akɛ etsɛŋ, Nyɔŋmɔ Maŋtsɛyeli lɛ kɛ tsakemɔi nɛɛ fɛɛ baaba. Kɛhã enɛ he saji krokomɛi lɛ, kanemɔ sane ni ji, “Mɛɛ Be Nyɔŋmɔ Maŋtsɛyeli Lɛ Baabɔi Shikpɔŋ Lɛ Nɔ Yeli?” lɛ.

a Yehowa ji Nyɔŋmɔ gbɛ́i diɛŋtsɛ.—Lala 83:18.

Mɛni wɔbaanyɛ wɔfee bianɛ kɛtsɔɔ akɛ wɔhiɛ sɔɔ wɔshikpɔŋ lɛ?

Be ni wɔkwɛɔ be ni Nyɔŋmɔ Maŋtsɛyeli lɛ baatsu nibii fɛɛ ni afeɔ kɛgbaa shikpɔŋ lɛ naa lɛ he nii lɛ, nibii komɛi yɛ ni wɔbaanyɛ wɔfee amrɔ nɛɛ kɛtsɔɔ akɛ wɔhiɛ sɔɔ wɔshikpɔŋ lɛ. Akɛ nɔkwɛmɔnɔ lɛ, esa akɛ wɔkɛ nibii ni yɔɔ shikpɔŋ lɛ nɔ lɛ atsu nii yɛ hiɛshikamɔ mli, ni wɔkɛ mlai ni awo yɛ nɔ ni Blɔfo tsɛɔ lɛ recycling lɛ he lɛ atsu nii jogbaŋŋ.—Yohane 6:12, 13; Romabii 13:1, 5.

Brett ji mɔ ko ni kase shikpɔŋ lɛ kɛ enɔ nibii ahe nii jogbaŋŋ, shi amrɔ nɛɛ eba hejɔɔmɔ. Ekɛɛ, nɔ ni ekase lɛ ye ebua lɛ ni ena akɛ, Bɔlɔ ko yɛ ni baabaa shikpɔŋ lɛ yi. Kanemɔ esane lɛ ni okwɛ.
Gbɛ kome ni Yehowa Odasefoi tsɔɔ nɔ amɛtsɔɔ akɛ amɛbuɔ amɛ-Bɔlɔ lɛ ji, kɛ́ amɛmiimamɔ amɛtsũi wuji lɛ, amɛkɛ tsũmaa he ŋai ni baa shikpɔŋ lɛ kɛ enɔ nibii lɛ ayi tsuɔ nii. Kɛ́ ootao ole nɔ ni amɛnyɛ amɛtsu yɛ enɛ gbɛfaŋ lɛ, kwɛmɔ vidio ni ji Eco-Friendly Design Brings Honor to Jehovah lɛ.

Biblia ŋmalɛi ni kɔɔ shikpɔŋ lɛ he

1 Mose 2:15: “Yehowa Nyɔŋmɔ kɛ nuu lɛ yawo Eden abɔɔ lɛ mli koni etsu mli nii ní ekwɛ nɔ.”

Nɔ ni etsɔɔ: Nyɔŋmɔ kɛ shikpɔŋ lɛ ni adesai yɔɔ nɔ lɛ wo amɛdɛŋ koni amɛkwɛ nɔ.

1 Mose 1:28: “Kɛkɛ ni Nyɔŋmɔ jɔɔ amɛ, ni Nyɔŋmɔ kɛɛ amɛ akɛ: ‘Nyɛfɔa ní nyɛyi afaa, ni nyɛyia shikpɔŋ lɛ nɔ obɔ ni nyɛkwɛa nɔ, ni nyɛyea loi ni yɔɔ ŋshɔ lɛ mli kɛ bɔɔ nii ni filikiɔ yɛ ŋwɛi kɛ kooloi fɛɛ ni yɔɔ wala mli ni tsiɔ amɛhe yɛ shikpɔŋ lɛ nɔ lɛ anɔ.’”

Nɔ ni etsɔɔ: Nyɔŋmɔ kɛ kooloi wo adesai adɛŋ koni adesai akwɛ amɛ nɔ.

Yesaia 45:18: “Nɔ ni Yehowa, Mɔ ni bɔ ŋwɛi lɛ, anɔkwa Nyɔŋmɔ lɛ, Mɔ ni shɔ̃ shikpɔŋ lɛ, mɔ ni fee shikpɔŋ lɛ ni ekɛma shi shiŋŋ, ni ebɔɔɔ lɛ efolo, shi moŋ eshɔ̃ ni ahi nɔ lɛ kɛɛ nɛ: ‘Miji Yehowa, ni mɔ ko mɔ ko bɛ dɔŋŋ.’”

Nɔ ni etsɔɔ: Nyɔŋmɔ yiŋtoo kɛhã shikpɔŋ lɛ tsakeko. Mɛi ni baakwɛ shikpɔŋ lɛ nɔ tamɔ bɔ ni Yehowa kpɛ eyiŋ yɛ he kɛjɛ shishijee lɛ ji mɛi ni baahi nɔ.

Lala 37:29: “Jalɔi lɛ, shikpɔŋ lɛ baatsɔ amɛnɔ, ni amɛbaahi nɔ kɛya naanɔ.”

Nɔ ni etsɔɔ: Mɛi ni hiɔ shi yɛ Nyɔŋmɔ jalɛ shishitoo mlai lɛ anaa lɛ baaná hegbɛ ni amɛhi shi kɛya naanɔ.

Lala 98:6-8: ‘Nyɛláa kunimyeli lala yɛ Maŋtsɛ Yehowa hiɛ. Ŋshɔ lɛ kɛ nɔ fɛɛ nɔ ni yɔɔ mli lɛ ashimɔ tamɔ nugbɔshiimɔ, shikpɔŋ lɛ kɛ mɛi ni yɔɔ nɔ lɛ. Fai lɛ atswa amɛdɛ̃; gɔji lɛ afee ekome kɛlá nyamɔ lala.’

Nɔ ni etsɔɔ: Shikpɔŋ lɛ kɛ enɔ nibii lɛ baaná Nyɔŋmɔ nɔyeli lɛ he sɛɛ.