Koumanniè ou pé ritienn sé vèsé-a

Ès délè, sa rèd ba’w viré-sonjé an vèsé Labib ou ja li pliziè fwa, ouben sav koté i yé adan Bib-la ? Pétèt sé an vèsé ka fè’w dibien, ouben ka endé’w goumen kont vié lidé, ouben ankò an vèsé ou lé pran ba an moun (Sòm 119:11, 111). Mi yonn-dé lidé ki ké endé’w ritienn sé vèsé-a :

• Sèvi pati-a « Catégories » adan JW Library^®. Lè’w ka li Labib asou JW Library épi ou ka tonbé asou an vèsé ou lé sonjé, ou pé anrèjistré’y pou ritouvé’y pli fasilman apré.

• Mété vèsé-a ou lé ritienn an koté ou ka wè’y. Ékri’y asou an ti papié épi mété ti papié-tala an koté ou ké wè’y souvan. I ni ki ké simié kolé’y asou miwè-yo, épi dòt asou frijidè-yo. Dòt ankò ké pran an foto vèsé-a épi kèy mété’y konm zimaj asou òwdinatè-yo, tablèt-yo ouben téléfòn pòwtab yo.

• Fè ti kat. Ékri liv Labib-la, chapit-la épi vèsé-a asou an koté kat-la, épi asou lòt koté-a sa ki matjé adan vèsé-a. Apré, éséyé ritienn liv-la, chapit-la épi vèsé-a, épi fè an éfò pou sonjé sa ki matjé adan vèsé-a. Men ou pé fè’y osi an lòt sans-lan.