-
Kisa ki pé endé’w kontinié étidié Labib ?Viv an bèl lavi pou toujou ! (An létid Labib ki pé pwofité’w)
-
-
LISON 12
Kisa ki pé endé’w kontinié étidié Labib ?
Lè nou ka vwayajé, nou ka dékouvè dé bèl bagay, men délè nou ka jwenn difikilté. Sé titak menm bagay-la épi létid Labib-la. Nou jis pé mandé kònou si nou kéy kapab kontinié létid Labib-la. Men poutji sa vo lapenn étidié ? É kisa ki pé endé’w kontinié magré difikilté ou pé jwenn ?
1. Poutji étidié Labib sitèlman enpòwtan ?
« Pawòl Bondié vivan épi puisan » (Ébré 4:12). Labib ni an gran valè pas i ka fè nou konnèt pansé Bondié é manniè i enmen nou. Sé la, konésans-lan, vré sajès-la é lèspwa ka sòti. Plis ki sa ankò, i ka pèwmèt nou vini zanmi Jéova. Lè ou ka étidié Labib, lavi’w ka vini pli bèl.
2. Poutji sé vérité biblik-la pou ni an gran lenpòwtans ba nou ?
Vérité Labib sé an vré trézò. Sé pou sa Labib ka di nou : « Achté lavérité-a épi pa jen vann-li » (Pwovèb 23:23). Lè nou ka katjilé asou valè trézò-tala, asiré nou paré pou kontinié étidié Labib-la, menm si nou ni bwa-koré (li Pwovèb 2:4, 5).
3. Ki manniè Jéova pé endé nou kontinié étidié ?
Jéova, li ki Kréyatè Tou-Puisan an é Zanmi’w, lé endé’w konnèt li. I pé ba’w « lanvi fè épi lafòs pou fè » (li Filipien 2:13). Kidonk, si délè ou pa anvi étidié ouben aplitjé sa ou ka aprann, ou pé apiyé asou’y. É si ou ni bizwen fòs pou étidié magré lopozision oben pwoblèm, i pé ba’w li. Prédié Jéova souvan pou mandé’y endé’w kontinié étidié (1 Tésalonisien 5:17).
ANNOU PLI LWEN
Annou wè ki manniè kontinié étidié Labib magré ou ni anlò bagay pou fè ouben magré ou ka jwenn lopozision. Apré annou gadé ki manniè Jéova ka ba’w an pal pou fè sa.
4. Fè létid Labib-ou vini an priorité
Délè, balan nou ni bagay pou fè, nou pé di kònou : « Man pa ni tan étidié Labib ». Alò ki manniè pou fè sa ? Li Filipien 1:10, épi diskité sé kèsion-tala :
Dapré’w, kisa « ki pli enpòwtan » adan lavi-a ?
Ki manniè ou pé fè létid Labib-ou vini an priorité ?
Si nou mété sab-la avan, i pé kèy ni asé plas pou tout sé wòch-la.
Si nou mété wòch-la avan, kèy ni asé plas pou près tout sab-la. Si adan lavi-nou nou ka mété douvan sa « ki pli enpòwtan », nou kay ni tan fè sé bagay-tala, é kay rété nou tan pou fè dòt bagay ankò.
Nou bizwen Bondié, é lè nou ka étidié Labib, nou ka kontanté an bizwen nou tout ni di konnèt épi adoré Bondié. Li Matié 5:3, épi diskité kèsion-tala :
Ki bénéfis ou pé ni lè létid Labib-ou ka vini an priorité ba’w ?
5. Tjenbé rèd magré lopozision
Délè, ni moun ki pé éséyé fè’w ladjé létid Labib-la. Gadé sa ki rivé Francesco. Gadé VIDÉWO-a, épi diskité sé kèsion-an ka vini an.
Lè Francesco palé ba manman’y épi zanmi’y di sa i té ka aprann, ki manniè yo réyaji ?
Ki manniè i wè landirans-li rékonpansé ?
Li 2 Timoté 2:24, 25, épi diskité sé kèsion-tala :
Kisa zanmi épi lafanmi ka pansé di sa ou ka aprann ?
Dapré sé vèsé-tala, koumanniè ou pou réyaji lè an moun kontrayé pas ou ka étidié Labib ? Poutji ?
6. Apiyé anlè Jéova
Pli nou toupré Jéova, pli nou ni lanvi fè’y plézi. Magré sa, nou pé touvé sa rèd fè yonn-dé chanjman pou viv manniè-a Jéova lé. Si’w adan ka-tala pa dékourajé. Jéova la pou endé’w. Gadé VIDÉWO-a, épi diskité sé kèsion-tala :
Ki chanjman Jim fè pou fè Jéova plézi ?
Kisa ki matjé’w adan listwa Jim ?
Li Ébré 11:6, épi diskité sé kèsion-tala :
Kisa Jéova ka fè ba « moun ki ka chèché’y épi tout tjè-yo », sa ki ka fè éfò pou konnèt li é fè’y plézi ?
Dapré vèsé-a, kisa Jéova ka risanti lè’y ka wè éfò ou ka fè pou étidié Labib ?
AN MOUN SÉ PÉ MANDÉ’W : « Poutji ou ka étidié Labib épi Témwen Jéova ? »
Sa’w té kèy réponn ?
SA’W APRANN
Étidié Labib pé fè’w ni lavi étèrnèl. Sa vré sa ka mandé travay, men ou pé apiyé anlè Jéova, é i kay rékonpansé’w.
An ti viré gadé
Poutji sé vérité Labib-la ni valè ba’w ?
Ki manniè ou pé montré létid Labib-ou ni anpil valè ba’w ?
Poutji fòk ou mandé Jéova endé’w kontinié étidié Labib ?
TIBREN PLIS ANKÒ
Kat prensip ki ka endé anpil moun bien jéré tan-yo.
« Comment bien gérer son temps » (Réveillez-vous !, févriyé 2014)
An madanm té lé fè Bondié plézi, men mari’y pa té anlè sa. Ki manniè Jéova endé’y ?
Manniè an nonm vini zanmi Bondié, gras a landirans madanm-li.
Délè, yo ka di Témwen Jéova ka séparé lafanmi. Ès sa vré poubon ?
« Ès Témwen Jéova ka séparé sé fanmi-an oben ka endé yo vini pli fò ? » (awtik jw.org)
-
-
Koumanniè pran bon désizion ?Viv an bèl lavi pou toujou ! (An létid Labib ki pé pwofité’w)
-
-
LISON 35
Koumanniè pran bon désizion ?
Nou tout ni désizion pou pran. I ni désizion kontèl, chwazi an konjwen, an travay oben koté nou ké abité ki pé ni konsékans ki enpòwtan adan lavi-nou. Désizion-nou tou, pé ni konsékans asou lanmitié-nou épi Jéova. Si nou ka pran bon désizion, nou ké ni tjè kontan épi Jéova ké fiè di nou.
1. Ki manniè Labib ka endé nou pran bon désizion ?
Avan ou pran an désizion, mandé Jéova djidé’w épi sèvi Labib-la pou sav koumanniè i ka wè bagay-la (li Pwovèb 2:3-6). Délè, ou ké touvé an lwa prési. Adan ka-tala, méyè désizion ou pé pran sé obéyi lwa-tala.
É si Labib pa ka di’w ègzaktiman sa ou dwé fè ? Jéova ké djidé’w kanmenm « asou chimen-an ou pou maché » (Izayi 48:17). Poutoudi, andidan Labib-la i ni sa yo ka kriyé dé prensip ki pé endé’w. An prensip Labib, sé an vérité kapital ki ka endé nou sav sa Bondié ka pansé oben risanti. Lè nou ka li listwa adan Labib, souvan nou ka dékouvè manniè wè’y asou tout kalté sijé. É an fwa nou konnèt manniè wè’y, nou pé pran désizion ki ka fè’y plézi.
2. Avan ou pran an désizion kisa fòk sonjé ?
Labib-la ka di : « An nonm ka pran pokosion ka gadé koté i ka mété pié’y » (Pwovèb 14:15). Sa lé di, avan ou pran an désizion, sa enpòwtan réfléchi. Toupandan ou ka réfléchi asou désizion ou pou pran, sonjé avantaj épi enkonvénian ou ké ni. Pozé kòw sé kèsion-tala : « Ki prensip biblik ki pé endé mwen adan ka-tala ? Si man pran désizion-tala ès man ké ni lèspri trantjil ? Ki konsékans désizion-mwen pé ni anlè lézòt ? É sirtou, ès i ké fè Jéova plézi ? » (Détéwonòm 32:29).
Jéova ni dwa désidé sa ki bien épi sa ki mal. Si nou ka aprann konnèt lwa’y épi prensip-li épi nou ka rèspèkté yo, nou ké ba konsians-nou bon larèl-la. Konsians-lan sé lè ou ka santi si an bagay bien oben mal (Women 2:14, 15). An konsians ki ni labitid fè sa ki bien ké endé nou pran bon désizion.
ANNOU PLI LWEN
Annou pli lwen pou wè lenpòwtans sé prensip biblik-la. Annou wè koummaniè sé prensip biblik-la épi konsians-nou pé endé nou pran bon désizion.
3. Kité Labib djidé’w
Koumanniè sé prensip Labib-la pé endé nou pran bon désizion ? Gadé VIDÉWO-a épi diskité sé késion-an ka vini an.
Ki kado Jéova ba nou ?
Poutji Jéova ba tout moun libèté chwazi ?
Kisa Jéova ba nou pou endé nou bien sèvi libèté-nou di chwazi ?
Li Éfézien 5:15, 16. Prensip-la sé : « Sèvi tan-an zòt ni méyè manniè zòt pé. » Ki manniè ou pé aplitjé’y...
pou li Labib touléjou ?
pou ba konjwen’w, yich-ou oben paran’w sifizanman tan ?
pou asisté réyinion sanblé-a ?
4. Ba konsians-ou bon larèl-la pou pran bon désizion
Souvan, sa pli fasil fè bon chwa-a lè Labib ka ba’w an koumandman prési. Men kisa pou fè si pa ni ? Gadé VIDÉWO-a épi diskité sé késion-an ka vini an.
Kisa Emma fè pou ba konsians-li bon larèl-la épi pran an désizion ka fè Jéova plézi ?
Poutji fo pa mandé lézòt pran an désizion a laplas-nou ? Li Ébré 5:14 épi diskité sé kèsion-tala :
Sa vré, sa pli fasil mandé lézòt sa yo té ké fè a laplas-nou. Men kisa nou pou kapab fè ?
Ki zouti ki pé endé’w fè richèch, pou ba konsians-ou bon dirèksion-an, pou pé sa pran bon désizion ?
Kon an kat, konsians-nou ka endé nou wè ki dirèksion pou pran adan lavi-a.
5. Pa bliyé konsians lézòt
Nou tout pa ka pran sé menm désizion-an. Koumanniè nou pé montré konsians lézòt sé pwoblèm-nou tou ? Annou wè 2 lègzanp :
Sitiyasion 1 : An sè ka rivé adan an sanblé éti an patjé sè jennen palakòz an manniè abiyé i enmen.
Li Women 15:1 épi 1 Korentjen 10:23, 24, épi diskité sé kèsion-tala :
Ki désizion sè-a pétèt ké pran si i kité sé vèsé-tala djidé’y ? Imajinen ou épi an moun éti konsians-li ka entèwdi’y fè an bagay, alòs ki konsians-ou ka pèwmèt ou fè’y. Sa’w ké fè ?
Sitiyasion 2 : Sa vré, Labib pa ka entèwdi brè alkòl. Men an frè pran désizion pa brè piès. Mi-anvwala, yo envité’y adan an swaré éti i ka wè dòt Témwen ka brè alkòl.
Li Éklézias 7:16 épi Women 14:1, 10, épi diskité sé kèsion-tala :
Si i ka suiv larèl sé vèsé-tala, asiré, ki atitid frè-a ké ni ? Si an jou ou ka wè an moun fè an bagay konsians-ou ka entèwdi’w fè, koumanniè ou ké réyaji ?
Pou pé sa pran an bon désizion
1. Mandé Jéova endé’w (Jak 1:5).
2. Fè richèch adan Labib-la épi piblikasion-nou pou sav ki prensip ki bon adan sitiyasion’w. Ou pé mandé krétjen ki ni lèspérians endé’w osi.
3. Réfléchi asou konsékans désizion’w anlè konsians-ou épi konsians lézòt.
NI MOUN KA DI : « Sa lézòt ka pansé pa ka gadé mwen. Chak moun ka fè silon gou épi lidé’y ! »
Poutji fòk nou chèché sav manniè Bondié épi lézòt ka wè bagay-la ?
SA’W APRANN
Pou pran bon désizion, fòk nou chèché sav sa Jéova ka pansé épi réfléchi anlè rézilta chwa-nou anlè lézòt.
An ti viré gadé
Koumanniè ou pé pran désizion ka fè Jéova plézi ?
Koumanniè ou pé ba konsians-ou bon larèl-la ?
Koumanniè ou ka montré ou ka rèspèkté konsians lézòt ?
TIBREN PLIS ANKÒ
Ki manniè ou pé pran désizion ki ka lianné’w ankò plis épi Bondié ?
« Prenons des décisions qui honorent Dieu » (La Tour de Garde, 15 avril 2011)
Jéova ka konséyé nou diféran manniè. Kilès ?
Sa ki endé an jenn nonm pran an désizion difisil.
Koumanniè ou pé pran désizion ka fè Jéova plézi, alòs ki Labib-la pa ka ba lwa prési ?
« Vous faut-il un commandement pour tout ? » (La Tour de Garde, 1ié désanm 2003)
-