Talè, Jéova kèy sèvi wayòm-li pou rézoud tout pwoblèm-nou. Mésié, sa sé an bon nouvèl ! Nou pé pa gadé’y ba nou ! Jézi mandé sé disip-li a partajé nouvèl-tala épi tout moun (Matié 28:19, 20). Ki manniè Témwen Jéova ka obéyi koumandman-tala ?

1. Ki manniè Matié 24:14 ka réyalizé jòdi-a ?

Jézi té anonsé : « Bon nouvèl Wayòm-lan, yo kèy préché’y toupatou anlè latè » (Matié 24:14). Sé Témwen Jéova-a bien kontan pran pa adan aktivité enpòwtan-tala. Nou ka préché bon nouvèl-la toupatou anlè latè an plis ki 1 000 lang ! Bidim travay-tala ka mandé anpil éfò épi òwganizasion. Men, si sa posib, sé pas Jéova ka endé nou.

2. Ki éfò nou ka fè pou préché ?

Nou ka préché tout koté ni moun. Kon sé krétjen 1^ié sièk-la té ka fè, nou ka préché « kay-an-kay » (Akt 5:42). Sé pas nou ka sèvi métòd-tala, nou ka rivé jwenn milion moun chak lanné. Kon sé moun-lan pa toujou lakay-yo, nou ka préché osi koté ki ni plas piblik. Nou toujou ka chèché an lòkazion palé di Jéova épi di pwojé’y.

3. Ki moun ki pou préché bon nouvèl-la ?

Tout vré krétjen ni rèsponsabilité fè konnèt bon nouvèl-la. Ba nou, sé an rèsponsabilité ki enpòwtan menm. Nou ka préché tout tan nou pé, pas nou sav sa pé sové lavi moun (li 1 Timoté 4:16). Nou pa ka risivwè piès lajan pou préché, pas Labib ka di : « Yo ba zòt pou ayen, zòt pou ba pou ayen » (Matié 10:7, 8). Sé pa tout moun ki ka kouté, men nou ka kontinié préché pas nou sav, lè nou ka fè sa, sa ka fè pati di ladorasion-nou épi nou ka ba Jéova tjè kontan.

ANNOU PLI LWEN

4. Nou ka fè tousa nou pé pou préché ba tout moun

VIDÉWO : Yo ka préché « koté-a ki pli lwen anlè latè » (7:33)

• Kisa ka kité’w abazoudi adan tout éfò Témwen Jéova ka fè pou préché ?

Li Matié 22:39 épi Women 10:13-15, épi diskité sé kèsion-tala :

• Ki manniè prédikasion-nou ka montré nou enmen lézòt ?

• Ki manniè Jéova ka wè sé moun-lan ki ka préché bon nouvèl-la ? (gadé vèsé 15-lan).

5. Nou ka travay kantékant épi Bondié

Ni anpil témwayaj ki ka montré sé Jéova ki ka mennen aktivité-nou an. Annou pran an èkzanp. Pa koté Nouvèl-Zélann, frè-nou Pòl té ka alé kay-an-kay, épi, an aprémidi i jwenn an madanm. Mi-anvwala, bonmaten-an menm, madanm-tala té fini prédié Bondié épi non’y, Jéova. I té prédié pou an moun vini wè’y. Pòl di konsa « twazèdtan apré, man té ka kwenyen lapòt-li. »

Li 1 Korentjen 3:9 épi diskité kèsion-tala :

• Ki manniè témwayaj, kon ta frè-nou pa koté Nouvèl-Zélann, ka montré sé Jéova ki ka dirijé travay prédikasion-an ?

Li Akt 1:8 épi diskité kèsion-tala :

• Poutji nou bizwen Jéova endé nou pou fè travay-tala ?

Ès ou té sav sa ?

Adan réyinion lasimenn-lan, nou ka risivrè an fòwmasion pou préché. Si ou ja vini adan sé réyinion-tala, kisa ou ka pansé di fòwmasion-tala ?

6. Nou ka kouté lòd-la Bondié ba nou

O 1^ié sièk, té ni moun ki té lé anpéché sé disip Jézi-a préché. Kidonk, sé krétjen-an défann dwa-yo di préché lè yo « défann bon nouvèl-la épi fè’y rikonnèt douvan lajistis » (Filipien 1:7). Sé Témwen Jéova-a ka fè menm bagay-la jòdia.

VIDÉWO : Yo ka défann bon nouvèl-la douvan lajistis (2:28)

Li Akt 5:27-42 épi diskité kèsion-tala :

• Poutji nou pé ké janmen sispann préché ? (gadé vèsé 29, 38 épi 39).

SA’W APRANN

Jézi mandé sé disip-li a préché bon nouvèl-la toupatou asou latè. Jéova ka endé sé fidèl-li a fè travay-tala.

An ti viré gadé

• Ki manniè bon nouvèl-la préché dan lèmonn antié ?

• Ki manniè laprédikasion ka montré nou enmen lézòt ?

• Dapré’w, ès préché pé ba an moun tjè kontan ? Poutji ?

TIBREN PLIS ANKÒ

Ki manniè sé Témwen Jéova-a ka préché adan gran lavil ?

Pari : Témwayaj piblik èspésial adan sé gran vil-la (5:11)

Ki éfò sé Témwen Jéova-a ka fè pou préché ba moun ki pati kité péyi-yo ?

Yo ka rasazié sé bizwen èspiritièl nonm épi fanm réfijié (5:59)

Tann an moun èsplitjé poutji i té kontan menm sèvi tan’y pou préché pandan tout lavi’y.

Mwen kontan davwè man ba lavi-mwen larèl-tala (6:29)

Pwosé Témwen Jéova genyen ki matjé listwa prédikasion bon nouvèl-la.

« Les prédicateurs se défendent devant les tribunaux » (Le Royaume de Dieu en action !, chapit 13)

Jézi ansénié ki tout disip-li pou pran batenm (li Matié 28:19, 20). Men pran batenm sé kisa ? Kisa an moun pou fè avan i batizé ?

1. Ki manniè pou batizé ?

Mo grèk-la pou « batizé » lé di « plonjé ». Lè Jan batizé Jézi, i plonjé’y adan dlo Jouden-an, apré Jézi « sòti an dlo-a » (Mak 1:9, 10). Kon Jézi, an vré krétjen pé di i batizé, lè tout kò’y plonjé adan dlo.

2. Kisa an moun ka montré lè i ka pran batenm ?

Lè an moun ka pran batenm, i ka montré i ka ba Jéova lavi’y. Koumanniè ou ka ba Jéova lavi’w ? Avan ou batizé, ou ka mété kòw tou sèl an koté pou prédié Jéova, pou di’y ou lé sèvi’y pou toujou. A moman-tala, ou ka pwonmèt li sé li sèl ou kèy adoré, épi fè volonté’y kèy vini bagay-la ki pli enpòwtan adan lavi’w. Ou ka pran désizion ‘mété pwòp kòw asou koté épi suiv tout lè’ lansèyman épi lègzanp Jézi (Matié 16:24). Lè an moun ka ba Bondié lavi’y épi ka pran batenm, i ka vini pli bon zanmi épi Jéova, épi osi, i ka vini pli bon zanmi épi moun ki ka adoré’y.

3. Kisa pou fè avan ou batizé ?

Avan ou batizé, fòk ou aprann konnèt Jéova épi fòk ou dévlopé an lafwa ki fò an li (li Ébré 11:6). Plis konésans-ou épi lafwa’w kèy vini gran, sé plis lanmou’w ba Jéova kèy vini gran tou. Apré, asiré, ou kèy anvi préché épi suiv koumandman’y adan lavi’w (2 Timoté 4:2 ; 1 Jan 5:3) É sa vré, lè an moun ka viv ‘an manniè ka onoré Jéova, pou Jéova kontan’y menm’ i ka ni lanvi ba Jéova lavi’y épi pran batenma (Kolosien 1:9, 10).

ANNOU PLI LWEN

4. Kisa batenm Jézi ka aprann nou

Li Matié 3:13-17 pou wè koumanniè batenm Jézi pasé. Apré diskité sé kèsion-tala :

• Ès yo batizé Jézi lè i té ti-bébé ?

• Koumanniè yo batizé Jézi ? Ès yo anni mété tibren dlo anlè tèt-li ?

An fwa i batizé, Jézi koumansé fè travay-la Bondié té ba’y la. Li Lik 3:21-23 épi Jan 6:38, épi diskité kèsion-tala :

• Apré batenm-li, ki aktivité Jézi mété an prèmié adan lavi’y ?

5. Ou pé rivé pran batenm

O dépa, lidé-a di ba Bondié lavi’w épi pran batenm pé fè’w pè. Men piti a piti, ou kèy fè pwogré, épi an jou, ou kèy paré. Pou wè ki manniè yonn-dé moun réyisi pran désizion enpòwtan-tala, gadé VIDÉWO-a.

VIDÉWO : Koumanniè konstwi rilasion’w épi Jéova (1:11)

Li Jan 17:3 épi Jak 1:5, épi diskité kèsion-tala :

• Koumanniè ou pé préparé kòw pou batizé ?

1. Lè ou ka ba Jéova lavi’w, ou ka di’y ou lé sèvi’y pou toujou.

2. Batenm-lan ka montré tout moun ou ba Bondié lavi’w.

6. Batenm-lan ka fè nou antré adan fanmi Jéova

Lè nou ka pran batenm, a moman-tala, nou ka fè pati di an fanmi ki ini asou tout latè. Kisiswa ras-nou, nou ni menm kwayans-lan, épi nou ka rèspèkté sé menm lwa moral-la. Li Sòm 25:14 épi 1 Piè 2:17, épi diskité kèsion-tala :

• Apré i pran batenm, ki kalté rilasion moun-lan kèy ni, ki épi Jéova, ki épi moun ka adoré Jéova ?

SA’W APRANN

Jézi di ki tout disip-li pou pran batenm. Pou atenn lòbjèktif-tala, fòk moun-lan ni an lafwa ki fò an Jéova, fòk i suiv koumandman’y épi ba Jéova lavi’y.

An ti viré gadé

• Ki manniè an moun pou batizé ? Poutji sa enpòwtan pran batenm ?

• Ki liannaj ki ni ant ba Jéova lavi’w épi pran batenm ?

• Kisa an moun pou fè avan i ba Bondié lavi’y épi pran batenm ?

TIBREN PLIS ANKÒ

Sa ou pé aprann ankò asou batenm-lan.

« Batenm-lan sé kisa ? » (awtik jw.org)

Yonn-dé konsèy itil pou rivé pran batenm.

« L’amour et la reconnaissance pour Jéhovah mènent au baptême » (La Tour de Garde, maws 2020)

Gadé sa ki endé an misié pran batenm.

« Ils voulaient que je découvre la vérité par moi-même » (La Tour de Garde, 1^ié févriyé 2013)

Poutji pran batenm sé an bon lòbjèktif pou atenn ? Ki manniè ou pé paré kòw ?

« Devrais-je me faire baptiser ? » (Les jeunes s’interrogent. Réponses pratiques [volim 2], chapit 37)