3. Pran swen di santé’w

Lè an krétjen ka ba Jéova lavi’y, i ka ba’y tout lavi’y. Sé konsi i té ka ba tout kò’y an sakrifis. Kidonk i pou pran swen di’y. Li Women 12:1, 2 épi diskité sé kèsion-tala :

• Kisa ki pou ba’w lanvi pran swen di santé’w ?

• Ou pé pran swen di santé’w pliziè manniè. Kilès ?

Gras a létid-ou, ou aprann an patjé bagay anlè Jéova. É asiré, ou dwèt fè chanjman an lavi’w pou fè’y plézi. Men pétèt, i ni an ti bagay ankò ki ka anpéché’w ba Jéova lavi’w épi fè kòw batizé. Lison-tala ka palé di bwa-koré anpil moun jwenn pou pran batenm, é i ka èsplitjé koumanniè pou janbé yo.

1. Ès fòk konnèt tout bagay anlè Labib pou pran batenm ?

Pou pran batenm, fòk ou ni « an konésans ègzak lavérité » (1 Timoté 2:4). Men sa pa lé di ou pou ni répons tout kèsion yo sé pé pozé’w anlè Labib. Menm sé krétjen-an ki batizé dépi nanni-nannan ka kontinié aprann bagay anlè Labib (Kolosien 1:9, 10). Men fòk ou konprann ansèyman biblik kapital. Sé ansien lasanblé-a kèy endé’w katjilé pou wè si ou ni asé konésans.

2. Ki étap fòk ou pasé avan pran batenm ?

Avan pran batenm, fòk ou ‘ripanti kòw épi viré obò Bondié’ (li Akt 3:19). Kivédi, ou ka rigrété épi tout tjè’w péché ou fè é ou ka mandé Jéova padonnen’w. Sa lé di osi, ou ka mété dèyè do’w poubon tout vié mové konduit é ou vréman désidé pou viv an manniè ki ka fè Bondié plézi. Anplis di sa, fòk ou partisipé adan aktivité lasanblé-a, kontèl alé réyinion épi vini pwoklamatè pou préché.

3. Poutji fòk pa kité lapè anpéché’w vansé ?

I ni moun ki pè pa rivé tjenbé pwonmès-la yo fè Jéova. Sa vré, délè, ou kèy fè lérè ; menm manniè sa rivé nonm épi fanm fidèl ki adan Labib-la. Men sonjé, Jéova sav nou pa pawfé (li Sòm 103:13, 14). Sa ki pli enpòwtan ba’y, sé wè’w fè tousa ou pé pou fè’y plézi ! É i kèy endé’w. Labib ka pwonmèt, ayen pé « ké pé séparé nou épi lanmou Bondié ni ba nou » (li Women 8:38, 39).

ANNOU PLI LWEN

4. Aprann konnèt Jéova pli bien

Ki kantité bagay ou pou konnèt anlè Jéova pou pran batenm ? Asé bagay pou enmen’y épi ni volonté fè’y plézi. Gadé VIDÉWO-a pou wè ki manniè moun ki étidié Labib dan lèmonn antié rivé fè sa. Apré diskité kèsion-tala.

VIDÉWO : Chimen-an pou pran batenm (3:56)

• Ki manniè yonn-dé frè é sè préparé kòyo pou pran batenm ?

Li Women 12:2 épi diskité sé kèsion-tala :

• Ès ou ni dout asou sa Labib-la ka ansénié ? Oben ès ou ka mandé kòw si Témwen Jéova ka ansénié lavérité ?

• Si sé wi, kisa ou pé fè ?

5. Janbé sé bwa-koré a

Lè nou ka pran désizion ba Jéova lavi-nou épi pran batenm, souvan nou ka trapé difikilté. Pou wè an lègzanp, gadé VIDÉWO-a. Apré diskité sé kèsion-an ka vini an.

VIDÉWO : Lanmou pou Jéova ka krazé tout òstak (5:22)

• Ki òstak Narangerel janbé pou sèvi Jéova ?

• Ki manniè lanmou i ni ba Jéova, endé’y janbé sé bwa-koré tala ?

Li Pwovèb 29:25 épi 2 Timoté 1:7, épi diskité kèsion-tala :

• Kisa ka ba nou kouraj janbé bwa-koré ?

6. Apiyé kòw anlè Jéova

Jéova ké endé’w fè sa ka fè’y plézi. Gadé VIDÉWO-a épi diskité sé kèsion-an ka vini an.

VIDÉWO : Jéova kay endé’w (2:50)

• Kisa ki té ka anpéché étidian-tala pran batenm ?

• Kisa ki endé’y rann konfians-li an Jéova pli fò ?

Li Izayi 41:10, 13 épi diskité kèsion-tala :

• Poutji ou pé ni lasirans ou kèy tjenbé pwonmès-la ou ké fè pandan batenm-ou ?

7. Fè rikonésans-ou pou lanmou Jéova vini pli gran

Pli ou ka katjilé anlè lanmou Jéova ni ba’w, sé pli ou ké ni rikonésans, é sé pli ou kèy lé sèvi’y pou toujou. Li Sòm 40:5 épi diskité kèsion-tala :

• Ki bénédision Jéova ou pli enmen ?

Pwofèt Jérémi té enmen Jéova épi pawòl-li, é i té bien kontan ni lonnè sèvi Jéova. I di : « Pawòl-ou plen tjè-mwen épi bonè èk lajwa, pas sé non’w man ka pòté, o Jéova Bondié » (Jérémi 15:16). Diskité sé kèsion-tala :

• Poutji lè ou Témwen Jéova sé an lonnè ba’w ?

• Ès ou anvi batizé Témwen Jéova ?

• Ès ni an bagay ka anpéché’w fè sa ?

• Daprè’w, kisa fòk ou fè pou rivé pran batenm ?

SA’W APRANN

Gras a Jéova ou pé janbé tout bwa-koré ki pé anpéché’w pran batenm.

An ti viré gadé

• Ki kantité bagay asou Labib fòk ou konnèt avan ou pran batenm ?

• Ki chanjman pétèt fòk ou fè avan ou pran batenm ?

• Poutji fòk pa ou kité lapè anpéché’w vansé ?

TIBREN PLIS ANKÒ

Poutji ou lé pran batenm ?

« Es-tu prêt pour le baptême ? » (La Tour de Garde, maws 2020)

Ki manniè janbé bwa-koré ki ka anpéché’w pran batenm ?

« Qu’est-ce qui m’empêche de me faire baptiser ? » (La Tour de Garde, maws 2019)

Ki bidim òstak an nonm rivé pasé pou pran batenm ?

« Poutji ou ka tadé pran batenm ? » (1:10)

Kisa ki asiré an nonm i pa té ni piès rézon pou pa pran batenm.

Ès man vréman mérité tousa ? (7:21)