Lèt a Jid

1 An sé Jid, on èsklav a Jézikris, é an sé frè a Jak. An ka maké lèt-lasa pou séla Bondyé* chwazi la ; i enmé sé moun-lasa é i ka pran swen a yo pou yo ansanm èvè Jézikris :

2 An ka priyé Bondyé pou i pé sa aji èvè onpakèt mizérikòd é onpakèt lanmou épi zòt, é pou i ba-zòt lapé adébòdé.

3 Frè an mwen kè an enmé, an té ja k’ay maké on lèt pou palé-zòt dè jan-la Bondyé ké sové-nou la. Men an rann-mwen kont kè fò-mwen té ékri-zòt pou ankourajé-zòt a goumé rèd pou zò toujou ni fwa adan Bondyé. É yo ba sé sen-la fwa-lasa onfwa pou tout. 4 Si an ka maké lèt-lasa ba zòt, sé pas ni sèwten boug ki rantré pawmi zòt san zò rann-zòt kont, é Lézékriti té ja ka kondanné sé boug-lasa dépi lontan. Sé boug-lasa pa ni pon rèspé pou Bondyé, yo ni on mové konduit é yo pa menm wont sa yo ka fè*. Yo ka konprann yo ni dwa aji konsa pas Bondyé ka aji épi nou èvè on bonté ki èstraòwdinè. Anplisdisa, sé boug-lasa ka trayi sèl mèt* é sèl Ségnè nou ni, kivédi Jézikris.

5 Menmsi zò ja konnèt tout sé biten-la an kay di-zòt la byen menm, an vé fè-zòt sonjé kè Jéova fè on pèp sòti an Éjipt pou sové pèp-lasa, é kè aprésa, i détwi séla ki pa té ni fwa. 6 Anplisdisa, sé zanj-la ki pa rété an ran-la Bondyé té mèt-yo la odépa, é ki pa rété koté-la pou yo té rété la, Bondyé maré-yo pou touttan, é yo adan on gwo nwèsè toubònman. Konsa, lèwvwè jou-la ké rivé pou i pé sa jijé-yo, i ké détwi-yo. 7 Menmjan-la, Sodòm é Gomò, é sé vil-la ki té alantou a yo la mèt-yo ka fè péché sèksyèl ki ka ba moun malotchè. Anplisdisa, yo té anvi fè biten ki pa natirèl* é sé sa yo fè. Kifè, Bondyé sèvi èvè on difé ki pé’é jen étenn pou pini sé vil-lasa, é yo ka sèvi-nou ègzanp pou avèti-nou.

8 Magrésa, sé boug-lasa ka kontinyé mèt vyé lidé an tèt a yo, yo ka fè péché sèksyèl*, yo pa ka rèspèkté séla ki ka dirijé la, é yo ka malpalé moun kè Bondyé ka onoré. 9 Men lèwvwè Michèl, chèf a sé zanj-la, trapé bab èvè Dyab-la pannan yo té ka palé dè kò a Moyiz, i pa jijé Dyab-la limenm a-y, é i pa di-y bétiz. Men i di-y konsa : « Sé Jéova ki ké okipé dè ka a-w ! » 10 Pawkont, dépi sé boug-lasa pa’a konprann on biten, yo ka mèt-yo ka kritiké. Men ni sèwten biten yo ka konprann tou natirèlman san réfléchi, menmjan ki sé zannimo-la, é afòs yo fè tout sé biten-lasa, yo ka vin pi mové ki yo té ja yé.

11 Tanpi pou yo ! Pas yo suiv menm chimen ki Kayen, é yo kouri ay pran menm mové chimen ki Balaam pou yo té ni on rékonpans. Anplisdisa, yo pèd vi a yo, pas yo fè menm biten ki Koré : yo mèt-yo ka di bétiz asi sé boug-la ki té ka dirijé-yo la. 12 Lè zò ka fè banké pou montré frè a zòt kè zò enmé-yo, sé boug-lasa ka manjé ansanm èvè zòt, men yo ka touvé-yo kon wòch ki kaché anba dlo. Yo kon bèwjé ki ka sonjé enki lèstonmak a yo*. Yo kon niyaj ki pa’a bay lapli é kè van-la ka chayé nenpòt kikoté. Yo kon pyébwa ki pa ni pon fwi alòskè sé sézon a yo, pyébwa ki mò poudèbon é kè yo raché an tè-la. 13 Yo kon vag a lanmè-la lèwvwè i mové. Yo ni on vyé konpòwtèman, é vyé konpòwtèman-lasa ka touvé-y kon kim-la sé vag-la ka voyé la. Yo kon zétwal ki ka déplasé adan nenpòt ki dirèksyon. Bondyé mèt-yo adan on gwo nwèsè menm, é yo ké rété adan nwèsè-lasa pou touttan.

14 Énòk, ki ka fè pawti a sétyèm jénérasyon ki ègzisté dépi jénérasyon a Adan, ni lokazyon palé dè sé boug-lasa osi adan on pwofési. Mi sa i té anonsé : « Jéova vin èvè zanj a-y. Té ni plizyè milyé* zanj, é yotout té sen. 15 I vin èvè yo pou jijé toutmoun é pou kondanné tout moun ki pa ni pon rèspé pou Bondyé, pas sé moun méchan lasa* fè onlo biten ki pa bon é paskè yo di onpakèt vyé pawòl asi Bondyé pou méprizé-y. »

16 Sé boug-lasa toujou ka bougonné, lavi pa jen asé bèl ba yo, é sa yo anvi fè, sé sa yo ka fè ; anplisdisa yo blagè kon pa tini, é anmenmditan yo ka flaté moun lè yo sav kè sa ké rapòté-yo on biten.

17 Men zòt, frè an mwen kè an enmé, pa jen oubliyé sa sé apòt-la* té anonsé*. 18 Mi sa yo té abityé di-zòt : « Pannan sé dènyé jou-la, ké ni moun ki ké fè jé èvè sa ki bon, é konm yo pa ni pon rèspé pou Bondyé, yo ké anvi fè sa ki pa bon* é yo ké fè-y. » 19 Sé yo ki ka mèt dézòd adan lasanblé-la, yo ka aji kon bèt é yo pa ni lèspri a Bondyé. 20 Men zòt, frè an mwen kè an enmé, fè ansòt pou zò vin pi fò grasa fwa-la Bondyé ba-zòt la, kivédi vré fwa-la. É lésé lèspri sen gidé-zòt lè zò ka priyé. 21 Konsa, Bondyé ké pé kontinyé enmé-zòt, toupannan zò ka atann mizérikòd a Jézikris Ségnè an nou, on mizérikòd ki ka menné a lavi étèwnèl. 22 Anplisdisa, kontinyé aji épi mizérikòd èvè moun ki ni dout ; 23 raché-yo an difé-la pou zò pé sa sové-yo. Kontinyé aji èvè mizérikòd épi dòt moun, men sèlman, tansyon a zòt pou péché a yo pa détenn asi zòt. Fò-zò hay sé péché-la yo fè la.

24 Bondyé an nou èstraòwdinè é i kapab pwotéjé-zòt pou zò pa tribiché. I pé édé-zòt pou zò ni tchè-kontan toubònman é pou zò rété pwòp douvan a-y. 25 Sèl Bondyé-la ki ni la, sé-y ki ka sové-nou grasa Jézikris Ségnè an nou. Sé-y ki ni glwa, sé-y ki wa, sé-y ki ni puisans, é sé-y ki ni pouvwa dépi nanni-nannan, konnyéla, é pou touttan ! Amèn !