Évanjil a Jan

9 Pannan Jézi té ka maché, i vwè on misyé ki fèt tou avèg. 2 Disip a-y mandé-y : « Anségnan*, boug-lasa fèt tou avèg. Kimoun ki péché pou i té fèt konsa ? Li oben fanmi a-y ? » 3 Jézi réponn : « Ni boug-lasa, ni fanmi a-y pa péché, men sa rivé pou moun vwè ka Bondyé kapab fè adan ka a boug-lasa. 4 Pannan jou wouvè, fò-nou fè sa Sila ki voyé-mwen la mandé-nou fè ; pas ni on lannuit ki ka vin, é ponmoun pé’é pé travay pannan lannuit-lasa. 5 Toutotan an adan mond-la, an sé limyè a mond-la. » 6 Apré i di sa, i kraché atè-la, i fè tibwen labou èvè kracha a-y, i mété-y si zyé a boug-la, 7 é i di-y : « Ay lavé zyé a-w adan pisin a Siloé » (mo-lasa vé di « voyé »). Misyé-la pati, i lavé zyé a-y, é lè i rètouné, i té ka vwè klè.

8 Alò sé vwazen-la é sé moun-la ki té abityé vwè-y ka mandyanné mèt-yo ka di : « A pa boug-lasa ki té toujou sizé ka mandyanné ? » 9 Ni sèwten moun ki té ka di : « Sé limenm. » Ni dòt ki té ka di : « Awa, sé on moun ki ka sanm-li. » Men boug-la pa té ka las di : « Sé mwenmenm. » 10 Alò yo mandé-y : « Kijanfè ou ka vwè klè konnyéla ? » 11 I réponn : « Misyé-la yo ka kriyé Jézi la fè tibwen labou é i mété-y anlè zyé an mwen. Aprésa i di-mwen : “Ay a Siloé é lavé zyé a-w.” Kifè an ay a Siloé, an lavé zyé an mwen é an mèt-mwen ka vwè klè. » 12 Alò yo di-y : « Ola boug-lasa yé ? » I réponn : « An pa sav. »

13 Yo menné-y owa sé farizyen-la. 14 Men jou-la Jézi té fè labou-la pou i té fè boug-la vwè klè, sé té on jou a saba. 15 A moman-lasa, sé farizyen-la osi mèt-yo ka mandé boug-la kijan i fè ka vwè klè. Boug-la di-yo : « I mèt labou anlè zyé an mwen, an lavé zyé an mwen, é mi, an ka vwè klè. » 16 Alò ni déotwa farizyen ki mèt-yo ka di : « A pa Bondyé ki voyé boug-lasa, pas i pa’a suiv lwa a saba-la. » Men ni dòt ki di : « Si boug-lasa sé on péchè, kijan i ka rivé fè sé kalté mirak-lasa ? » Kifè, yonn pa té dakò èvè lòt. 17 Lèwgadé, yo woupalé ba boug-la ankò. Yo di-y : « É vou, ka ou ka di dè misyé, piskè sé zyé a-w i géri* ? » Boug-la réponn : « Sé on pwofèt. »

18 Men sé Juif-la pa té ka kwè kè boug-la té avèg avan é kè i té ka vwè klè konnyéla. Kifè yo kriyé fanmi a-y, 19 é yo mandé-yo : « Sé gason a zòt ? I fèt avèg ? Alò kijanfè i ka vwè klè konnyéla la ? » 20 Fanmi a-y réponn : « Nou sav sé gason an nou é i fèt avèg. 21 Men nou pa sav kijan i fè ka vwè konnyéla la é nou pa sav kimoun ki fè-y vwè klè nonplis. Mandé-y. I ja majè. I pé réponn limenm a-y. » 22 Fanmi a-y di sé biten-lasa pas yo té pè sé Juif-la, davwa sé Juif-la té ja mèt-yo dakò ; yo té désidé kè si on moun té ka di kè Jézi sé Lèkris, yo té’é mèt moun-lasa déwò an sinagòg-la. 23 Sé pousa fanmi a-y di : « Mandé-y. I majè. »

24 Alò yo kriyé boug-la ki té avèg la on dézyèm fwa é yo di-y : « Ba Bondyé glwa ; nou sav kè boug-lasa sé on péchè. » 25 I réponn : « An pa konnèt si sé on péchè, men sèl biten an sav, sé kè an té avèg é konnyéla an ka vwè klè. » 26 Alò yo mandé-y : « Ka i fè ba-w ? Ka i fè pou ou té vwè klè ? » 27 I réponn-yo : « An ja di-zòt kijan sa pasé, men zò pa kouté. Poukwa zò vlé an répété-zòt sa ankò ? Pa di-mwen zò anvi vin disip a-y osi ? » 28 Lèwgadé, sé farizyen-la voyé mépri ba-y. Yo di-y : « Vou, ou sé disip a boug-lasa, men nou, nou sé disip a Moyiz. 29 Nou sav kè Bondyé palé ba Moyiz, men li boug-lasa, nou pa sav ola i sòti. » 30 Boug-la réponn-yo : « An pa’a konprann ! Magré i géri-mwen, zò pa sav ola i sòti ? 31 Nou sav Bondyé pa ka kouté moun ki ka péché, men si on moun ni onlo rèspé pou-y* é kè i ka fè volonté a-y, i ka kouté moun-lasa. 32 Nou po’o jen tann-di kè on moun géri* on moun ki fèt tou avèg. 33 Si a pa Bondyé ki té voyé boug-lasa, i pa té’é pé fè ayen. » 34 Yo réponn-li : « Dépi ou si tè ou ka péché kon péché fèt. É ou bizwen anségné-nou ? » Alò yo mété-y déwò !

35 Jézi vin sav kè yo té mété-y déwò, é lèwvwè i jwenn boug-la ondòt fwa ankò, i mandé-y : « Ès ou ni fwa adan Gason a lòm ? » 36 Boug-la réponn-li : « Ségnè, kimoun i yé pou an ni fwa adan-y ? » 37 Jézi di-y : « Men ou ja vwè-y ! Sé-y ki ka palé èvè-w. » 38 Boug-la di-y : « Wi Ségnè, an ni fwa adan-y. » É i mété-y ajounou douvan a-y. 39 Aprésa Jézi di : « An vin adan mond-lasa pou Bondyé jijé mond-la, kivédi, pou moun ki avèg vwè klè, é pou moun ki ka vwè klè vin avèg. » 40 Sé farizyen-la ki té èvè boug-la tann sé biten-lasa, é yo di Jézi : « Ou vlé di-nou kè nou avèg osi ? » 41 Jézi di-yo : « Si zò té avèg, Bondyé té’é pé padonné péché-la zò ka fè la. Men konm zò ka di : “Nou ka vwè klè”, Bondyé pé’é padonné péché-la zò ka fè la. »