Évanjil a Lik

3 Lèwvwè Tibè Séza té wa é kè sé té 15^èm lanné a-y antèt a wayòm a-y, Pons Pilat té ka gouvèné Lajidé. Éwòd* té ka gouvèné Lagalilé, Filip frè a-y té ka gouvèné réjyon a Itiré é a Trakonitid, é Lizanyas té ka gouvèné Abilèn. 2 An tan-lasa, Àn sé té yonn adan sé prèt pi enpòwtan la é Kayif té gran prèt. É sé a épòk-lasa Bondyé palé ba Jan, gason a Zakari, an dézè-la.

3 Alò, Jan ay adan tout sé vilaj-la ki té alantou a Jouden-la é i té ka di sé moun-la : « Pran lèbatèm, konsa zò ké montré kè zò rèpanti-zòt, é Bondyé ké padonné péché a zòt. » 4 Sa fèt kon sa té maké adan liv a pwofèt Izayi. Mi sa i té di : « Ni on moun ka hélé adan dézè-la : “Préparé chimen-la pou Jéova ! Ranjé chimen-la pou-y ! 5 Fò-yo ké konblé tout sé ravin-la é fò-yo ké mèt tout sé montangn-la é tout sé mòn-la anivo. Fò chimen ki plen viraj vin dwèt é fò chimen ki pa bon vin bèl. 6 É tout limanité ké vwè kijan Bondyé ké sové* moun.” »

7 Alò, lè sé foul-la té ka vin owa a-y pou i té batizé-yo, i té ka di-yo : « Pitit a vipè, kimoun ki di-zòt kè zò ké pé chapé kò a zòt jou-la Bondyé ké fè kòlè la ? 8 Alò, montré kè zò ka rèpanti-zòt* ! Pa mèt an tèt a zòt kè Bondyé pé’é ba-zòt sa zò mérité, davwa zò ka di zò sé timoun a Abraam ! Pas mi sa an ka di-zòt : “Bondyé pé sèvi èvè sé wòch-lasa pou fè Abraam ni timoun.” 9 An réyalité, hach-la ja tou paré pou koupé rasin a sé pyébwa-la. Tout pyébwa ki pa ka bay bèl fwi, yo ké koupé-y é yo ké jété-y an difé. »

10 É foulmoun-la ki té la la té ka mandé-y : « Alò, ka pou nou fè ? » 11 I réponn-yo : « Si on moun ni 2 lenj*, é ondòt pa ni, fò i ba-y yonn. É si on moun ni on biten pou i manjé, fò i fè menm biten-la. » 12 Jous ni moun ki té ka ranmasé lajan a enpo ki vin owa-y pou i té batizé-yo. É yo té ka mandé-y : « Anségnan, ka pou nou fè ? » 13 I réponn-yo : « Pa fè* sé moun-la péyé plis enpo ki sa yo dwètèt péyé. » 14 Ni déotwa sòlda ki mandé-y : « Ka pou nou fè ? » é i di-yo : « Pa fòsé ponmoun ba-zòt lajan é pa manti asi ponmoun pou akizé-y, men kontanté-zòt dè sa zò ka gangné. »

15 Men konm pèp-la té ka atann Lèkris, yo té ka mandé-yo si a pa Jan ki té Lèkris. 16 Jan réponn-yo. I di-yotout : « Mwen, an ka batizé-zòt èvè dlo, men ni on moun ki ka vin é ki pi fò ki mwen. An pa menm mérité démaré soulyé a-y. I ké batizé-zòt èvè lèspri sen é èvè difé. 17 An men a-y, i ni on zouti pou woté pach, pou i pé sa nétwayé koté-la i ka bat gren-la byen pwòp é pou i pé sa mèt blé-la an dépo-la. Men i ké brilé pach-la adan on difé pa ni mwayen étenn. »

18 Anplisdisa, Jan té ka di onlo dòt biten pou ankourajé sé moun-la é i té ka anonsé-yo bon nouvèl-la. 19 Men i tonbé an zo a Éwòd pannan Éwòd té ka gouvèné Lagalilé pas Éwòd té fè onlo biten ki pa bon. I tonbé an zo a-y osi akòz dè Éwodyad, madanm a frè a-y. 20 É anplis dè tout sé mové biten-la Éwòd té ja fè la, i fè ondòt biten ki pa bon ankò : i mèt Jan lajòl.

21 Lè tout pèp-la pran lèbatèm, Jézi pran lèbatèm osi. Pannan i té ka priyé, syèl-la wouvè, 22 lèspri sen parèt kon on kolonb é i désann asi-y. É on vwa ki sòti an syèl-la di : « Ou sé Gason an mwen, sila an enmé onlo la ; ou ka mèt jwa an tchè an mwen. »