Évanjil a Jan

10 « Zò pé kwè-mwen : Si on moun ka rantré adan pak a sé mouton-la san pasé pa pòt-la, men i ka janmbé ondòt koté pou i rantré, moun-lasa sé on vòlè. 2 Men sila ki ka pasé pa pòt-la pou i rantré, sé-y ki sé bèwjé a sé mouton-la. 3 Moun-la ki ka véyé pòt-la ka wouvè pòt-la ba-y, é sé mouton-la ka kouté vwa a bèwjé-la. I ka kriyé mouton a-y ki ta-y pa non a yo, é i ka fè-yo sòti déwò la. 4 Lè i fè tout mouton a-y sòti, i ka maché douvan a yo, é sé mouton-la ka suiv-li, pas yo konnèt vwa a-y. 5 Yo pé ké suiv on étranjé anponjan, men yo ké pran pyé a kouri a yo, pas yo pa konnèt vwa a sé étranjé-la. » 6 Jézi ba-yo ègzanp-lasa, men yo pa konprann sa i té ka di-yo.

7 Jézi woupalé ba yo. I di-yo : « Zò pé kwè-mwen : an sé pòt-la, é sé la pou sé mouton-la pasé. 8 Tout sé moun-la ki vin an plas an mwen la, sé dé vòlè ; men sé mouton-la pa kouté-yo. 9 Sé mwen ki pòt-la ; si on moun pasé pa mwen pou rantré an pak-la, i ké sové. I ké rantré, i ké sòti, é i ké touvé manjé pou i manjé. 10 Lè on vòlè ka vin, sé pou i volé, tchouyé, é détwi sé mouton-la. Mwen, an vin pou sé mouton-la ni lavi, é pou yo ni-y pou touttan. 11 An sé bon bèwjé-la ; bon bèwjé-la ka bay vi a-y pou sé mouton-la. 12 Si yo ka péyé on boug ki pa bèwjé pou véyé mouton, é sé mouton-la pa ta-y, lè i ka vwè lou-la ka vin, i ka lésé sé mouton-la la, é i ka chapé kò a-y. Lèwgadé, lou-la ka kenbé déotwa, é rèstan-la ka payé, 13 pas sé péyé yo ka péyé boug-lasa pou i okipé dè sé mouton-la, men i pa’a sousyé-y dè yo. 14 An sé bon bèwjé-la. An konnèt mouton an mwen, é mouton an mwen konnèt-mwen, 15 menmjan Papa-la konnèt-mwen, é menmjan an konnèt Papa-la. É an ka bay vi an mwen pou sé mouton-la.

16 « É an ni dòt mouton ki pa adan pak-lasa. Yo osi, fò an fè-yo rantré, é yo ké kouté vwa an mwen. Yotout ké fè onsèl twoupo, é ké ni onsèl bèwjé. 17 Mi pou ki rézon Papa-la enmé-mwen : sé pas an ka sakrifyé vi an mwen pou an pé sa wouni-y ankò. 18 A pa pon nonm ki ka woté vi an mwen, men sé mwenmenm an mwen ki désidé sakrifyé vi an mwen. An ni dwa sakrifyé-y, é an ni dwa wouni-y ankò. Sé komandman-lasa Pap’an mwen ban-mwen. »

19 Akòz dè sé pawòl-lasa, sé Juif-la pa té ka tonbé dakò yonn èvè lòt. 20 Onlo adan yo té ka di : « I ni on démon anlè-y, é i fou ! Poukwa zò ka kouté-y ? » 21 Ni dòt ki té ka di : « A pa pawòl a on boug ki ni on démon anlè-y sa ! On démon pé pa géri* moun ki avèg ! »

22 A moman-lasa, té ni on fèt a Jérizalèm. Sé té fèt a Inogirasyon-la. Sé té livè, 23 é Jézi té ka maché an Tanp-la, anba on galri* ki té kouvè. 24 Alò sé Juif-la lantouré-y, é yo mèt-yo ka di-y : « Poukwa ou pa’a di-nou kimoun ou yé menm ? Si ou sé Lèkris, di-nou sa franchman. » 25 Jézi réponn-yo : « An di-zòt kimoun an yé, men zò pa kwè sa. Sé biten-la an ka fè la an non a Pap’an mwen, sé yo ki ka montré kimoun an yé. 26 Men zòt, zò pa’a kwè sa, pas zò pa mouton an mwen. 27 Mouton an mwen ka kouté vwa an mwen. An konnèt-yo, é yo ka suiv-mwen. 28 An ka ba-yo lavi étèwnèl, é yo pé’é détwi anponjan. Ponmoun pé’é vin raché-yo an men an mwen. 29 Sa Pap’an mwen ban-mwen ni plis valè ki tout sélézòt biten-la, é ponmoun pé pa raché sé mouton-la an men a Papa-la. 30 Mwen é Papa-la, nou ka fè yonn. »

31 Sé Juif-la ranmasé wòch ankò pou yo té lapidé-y. 32 Alò Jézi di-yo : « Papa-la ban-mwen fè onlo bèl biten, é an montré-zòt sé biten-lasa. Pou kilès adan yo zò ka lapidé-mwen ? » 33 Sé Juif-la réponn-li : « Si nou ka lapidé-w, a pa parapòt a sé bèl biten-la ou fè la, men sé pas ou montré kè ou pa ni pon rèspé pou Bondyé. Pas vou, magré ou sé on nonm, ou bizwen fè moun konprann kè ou sé on bondyé. » 34 Jézi réponn-yo : « Mi sa ki maké adan Lwa a zòt : “Bondyé di : ‘Zò sé dé bondyé’”. 35 É nou sav kè pa ni mwayen chanjé sa ki maké adan Lézékriti. Alò si adan pawòl a-y, Bondyé ka di kè moun ki kondanné sé dé bondyé, 36 kijanfè zò ka di-mwen : “Ou pa ni pon rèspé pou Bondyé” lèwvwè an ka di : “An sé Gason a Bondyé” ? É poutan, sé Papa-la limenm ki fè-mwen vin sen é ki voyé-mwen an mond-la. 37 Si an pa’a fè sé biten-la Pap’an mwen voyé-mwen fè la, zò pa bizwen kwè-mwen. 38 Men si an ka fè-yo, menmsi zò pa’a kwè adan sa an ka di, kwè adan mwen parapòt a sé biten-la an ka fè la. Konsa zò ké pé admèt é zò ké pé konprann pibyen ankò kè Papa-la soudé èvè mwen é kè an soudé èvè Papa-la. » 39 Alò yo wouéséyé kenbé Jézi ankò, men i rivé chapé kò a-y.

40 I woupati lòt koté a Jouden-la ankò, la Jan té ka batizé moun odépa, é i rété la. 41 Onlo moun té ka vin vwè-y, é yo té ka di : « Jan pa fè pon mirak, men tousa i di anrapò èvè boug-lasa, sé té lavérité. » 42 É onlo moun vin ni fwa adan-y koté-lasa.