Évanjil a Jan
21 Aprésa, Jézi parèt douvan disip a-y ondòt fwa ankò. Sa fèt owa lanmè Tibéryad. Mi kijan sa pasé : 2 Té ni Simon Pyè, Toma (kè yo té ka kriyé Jimo-la), é Natanaèl (on boug ki té lévé a Kana, on vil ki ka touvé-y an Galilé). Anplisdisa, sé gason a Zébédé la té la osi, é té ni dézòt disip ankò. 3 Simon Pyè di-yo : « An k’ay fè on koud-pèch. » Yo di-y : « Nou k’ay èvè-w. » Yo pati é yo monté òbò bato-la. Men lannuit-lasa, yo pa pran ayen.
4 Lèwgadé, pannan jou té ka wouvè, Jézi té doubout anlè plaj-la, men disip a-y pa rann-yo kont kè sé li ki té la. 5 Alò Jézi di-yo : « Pitit an mwen, zò pa ni ayen* pou zò manjé, pa vré ? » Yo réponn-li : « Non, nou pa ni ayen. » 6 I di-yo : « Jété filèt-la adwat a bato-la, é zò ké pran on biten. » Alò yo jété-y, men yo pa té annéta halé-y monté òbò bato-la, pas té ni bon enpé pwason adan. 7 Alò disip-la Jézi té enmé la di Pyè konsa : « Sé Ségnè-la ! » Lè Simon Pyè tann kè sé té Ségnè-la, i mèt on lenj asi-y, pas i té près toutouni*, é i plonjé an dlo-la. 8 Men sélézòt disip-la vin òbò ti bato-la, é yo mèt-yo ka halé filèt-la èvè tout pakèt pwason-la adan, pas yo pa té lwen plaj-la. Yo té enki a 90 mèt apépré*.
9 Lè yo rivé atè, yo vwè on foyé-difé limé. Foyé-difé-lasa té fèt èvè chabon, é té ni pwason é pen anlè-y. 10 Jézi di-yo : « Pran déotwa pwason adan séla zò sòti kenbé la, é menné-yo ban mwen. » 11 Alò Simon Pyè monté òbò bato-la é i halé filèt-la òbò plaj-la. Filèt-la té plen ; té ni 153 gwo pwason adan. Magrésa, i pa jen chiré. 12 Jézi di-yo : « Vin manjé. » Ponyonn adan sé disip-la pa té ni asé kouraj pou mandé-y : « Kimoun ou yé ? », pas yo té sav kè sé té Ségnè-la. 13 Jézi pran pen-la, é i ba-yo-y. É i fè menm biten èvè pwason-la. 14 Sé twazyèm fwa Jézi té ka parèt douvan sé disip-la apré i té résisité.
15 Lè yo fin manjé, Jézi di Simon Pyè : « Simon, gason a Jan, ès ou enmé-mwen plis ki sé biten-lasa ? » Pyè réponn-li : « Wi Ségnè, ou sav an enmé-w onlo. » I réponn-li : « Ba ti mouton an mwen manjé. » 16 I woumandé-y on dézyèm fwa : « Simon, gason a Jan, ès ou enmé-mwen ? » Pyè réponn : « Wi Ségnè, ou sav an enmé-w onlo ! » Jézi di-y : « Pran swen a ti mouton an mwen kon on bèwjé té’é fè-y. » 17 I di-y on twazyèm fwa : « Simon, gason a Jan, ès ou enmé-mwen fò ? » Pyè touvé-y tris piskè Jézi mandé-y on twazyèm fwa si i té enmé-y fò. Alò i di-y : « Ségnè, ou konnèt tout biten, ou sav an enmé-w fò. » Jézi di-y : « Ba ti mouton an mwen manjé. 18 Ou pé kwè-mwen, lèwvwè ou té pi jenn, ou té ka abiyé tousèl a-w, é ou té k’ay la ou té vlé. Men lè ou ké pran on laj, ou ké lonji 2 men a-w é sé ondòt moun ki ké abiyé-w, é i ké menné-w la ou pa anvi ay. » 19 Jézi di sa pou montré kè jan-la Pyè té’é mò la, sa té’é ba Bondyé glwa. Aprésa i di-y : « Kontinyé suiv-mwen. »
20 Pyè gadé dèyè, é i vwè kè disip-la Jézi té enmé la té ka suiv-yo. Sé disip-lasa ki té panché-y pa dèyè, asi lèstonmak a Jézi, é ki té mandé : « Ségnè, kimoun ki kay trayi-w ? » Sa fèt on jouswa pannan yo té ka manjé. 21 Alò lè Pyè vwè-y, i di Jézi : « Ségnè, é boug-lasa, ka i ké divini ? » 22 Jézi di-y : « Si an vlé i rété la jiskatan an vin, ka ou ni a vwè adan sa ? Vou, kontinyé suiv-mwen. » 23 Alò ni on bri ki té ka kouri pawmi sé frè-la konmkwa disip-lasa pa té’é mò. Men a pa sa Jézi té di Pyè. An réyalité, mi sa i té di : « Si an vlé i rété la jiskatan an vin, ka ou ni a vwè adan sa ? »
24 Jistèman, sé disip-lasa ki ka palé dè sé biten-lasa, é ki maké sé biten-lasa, é nou sav kè sa i di sé lavérité.
25 Anplisdisa, Jézi fè onlo dòt biten ankò. É si sé té pou maké tout sé biten-la i fè la yonn pa yonn, an ni lidé pa té’é ni asé plas asi latè pou mèt tout sé woulo-la.