Évanjil a Jan
2 2 jou apré, ni on gran rèpa a mayé ki fèt a Kana, an Galilé, é manman Jézi té la. 2 Jézi é disip a-y té envité an mayé-la osi.
3 Lè diven-la té prèskè fin, manman Jézi di-y : « Yo pa ni diven ankò. » 4 Men Jézi di-y : « Madanm, ka vou é mwen ni a vwè adan sa* ? Lè-la po’o rivé pou an fè moun konnèt-mwen. » 5 Manman Jézi di sé moun-la ki té ka sèvi la : « Fè tousa i ké di-zòt. » 6 Lèwgadé té ni 6 ja kè yo té dépozé la, kon lwa a sé Juif-la té ka mandé, pou yo té lavé men a yo avan yo té manjé. Sé ja-la té fèt an wòch é yochak té pé pran 44 oben 66 lit apépré*. 7 Jézi di-yo : « Plen sé ja-la èvè dlo. » Alò yo plen sé ja-la owa bò. 8 Aprésa i di-yo : « Konnyéla, pran tibwen adan é menné-y ba moun-la ki òwganizé rèpa-la. » Alò yo pòté-y ba-y. 9 Moun-la ki té òwganizé rèpa-la gouté dlo-la Jézi té sòti chanjé an diven. I pa té sav ola diven-lasa té sòti men sé sèwvitè-la ki té pran dlo-la té sav. I kriyé misyé-la ki mayé la, 10 é i di-y : « Nenpòt ki dòt moun ka koumansé pa sèvi méyè diven-la é lè sé moun-la ja sou, i ka mèt diven-la ki mwen bon la déwò. Men vou, sé konnyéla la ou ka sèvi bon diven-la. » 11 Jézi fè sa a Kana, an Galilé. Sé té prèmyé mirak a-y. I montré pouvwa-la i té ni la, é disip a-y koumansé ni fwa adan-y.
12 Aprésa Jézi désann Kafawnaòm èvè manman-y, frè a-y é disip a-y, men yo rété la déotwa jou tousèl.
13 Sé Juif-la té toupré fété Lapak. Alò Jézi monté Jérizalèm. 14 I touvé moun ka vann bèf, mouton é kolonb an Tanp-la é té ni déotwa moun osi ki té sizé ka chanjé lajan. 15 Alò i fè on fwèt èvè déotwa kòd, é aprésa i fè tout moun ki té ni mouton é bèf sòti an Tanp-la. I jété pyès-monné a sé moun-la ki té ka chanjé lajan la. I jété sa atè-la é i chalviré tab a yo. 16 É mi sa i di sé moun-la ki té ka vann sé kolonb-la : « Woté sé biten-lasa isidan ! Arété fè konmès a lajan akaz a Pap’an mwen* ! » 17 Lè sa fèt, sé disip-la sonjé sa ki maké : « Tèlman an ké enmé kaz a-w, lanmou-lasa ké kon on gwo difé andidan tchè an mwen. »
18 Alò sé Juif-la di Jézi : « Ki mirak ou ka fè ban nou pou montré-nou kè ou andwa fè sé biten-lasa ? » 19 Jézi di-yo : « Krazé tanp-lasa, é an 3 jou, an ké woumété-y doubout. » 20 Alò sé Juif-la di-y : « Yo pran 46 an pou yo té konstwi tanp-lasa, é vou, ou ké woumété-y doubout an 3 jou ? » 21 Men lè i té ka palé dè tanp, sé dè kò a-y i té ka palé. 22 Alò lèwvwè i résisité*, disip a-y sonjé kè i té ka di sa toutlè. Kifè, yo mèt-yo ka kwè adan Lézékriti é adan sa Jézi té di.
23 É pannan i té Jérizalèm pou fèt a Lapak, onlo moun koumansé ni fwa adan-y lè yo vwè tout sé mirak-la i té ka fè la. 24 Men Jézi pa té ka fè-yo konfyans pas i té konnèt-yotout, 25 é pas i pa té bizwen ponmoun di-y kijan lézimen ka pansé ; i té sav sa ki té andidan tchè a moun.