Évanjil a Matyé
14 An tan-lasa, Éwòd, gouvènè a Lagalilé, tann palé dè sa Jézi té ka fè. 2 I di sèwvitè a-y : « Sé Jan Lèbatis. I résisité ; mi sé pousa i ka rivé fè mirak. » 3 Éwòd* té mayé èvè Éwodyad, madanm a Filip, frè a-y. Pou Éwòd té fè Éwodyad plézi, i fè-yo arété Jan, i fè-yo maré-y é i fè-yo mété-y lajòl, 4 pas Jan té ka di-y : « Ou pa ni dwa mayé èvè madanm-lasa. » 5 I té anvi tchouyé Jan men anmenmtan, i té pè pèp-la pas pou yo, Jan sé té on pwofèt. 6 Men on jou, pannan yo té ka fété anivèwsè a Éwòd, fi a Éwodyad dansé douvan sé envité-la. É tèlman ti dansé-la té agou a Éwòd, 7 i fè on pwomès : i di fi-la i ké ba-y tousa i ké mandé-y. 8 Alò, manman fi-la di-y ka pou i mandé. Kifè, fi-la di Éwòd : « Ban-mwen tèt a Jan Lèbatis, lamenmla, asi on plato. » 9 Sa fè wa-la lapenn, men konm i té fè on pwomès douvan sé moun-la ki té ka manjé èvè-y la, i mandé pou yo pòté tèt a Jan ba fi-la. 10 I voyé on moun koupé tèt a Jan an lajòl-la. 11 Yo pòté tèt a-y asi on plato é yo ba fi-la li. É fi-la pòté-y ba manman-y. 12 Plita, disip a Jan vin pran kò a-y é yo ay téré-y. Aprésa, yo ay di Jézi sa ki rivé. 13 Lè Jézi tann sa, i monté òbò on bato é i pati. I ay on ti koté apa pou i té rété tousèl a-y. Men ni on foulmoun ki vin sav sa. Kifè yo sòti adan plizyè vil diféran, é yo mèt-yo ka suiv-li apyé.
14 Lè i désann òbò bato-la, i vwè on gran foulmoun. Sa fè-y lapenn pou yo, é i géri tout sé moun-la ki té malad la. 15 Lè solèy kouché, disip a-y vin owa a-y, é yo di-y konsa : « I ja ta, é pa ni ponmoun ka rété kotésit. Di sé moun-la ay adan sé vilaj-la pou yo achté manjé. » 16 Men Jézi di-yo : « Yo pa bizwen déplasé. Zò pé ba-yo manjé zòmenm a zòt. » 17 Yo réponn-li : « Sé yenki 5 pen é 2 pwason nou ni la. » 18 Alò i di : « Pòté-yo ban mwen. » 19 Aprésa, i mandé foul-la sizé an zèb-la. I pran sé 5 pen-la é sé 2 pwason-la, i lévé zyé a-y an syèl, é i fè on priyè. I kasé sé pen-la, i ba sé disip-la sé mòso pen la, é sé disip-la ba foul-la manjé. 20 Kifè yotout manjé vant a yo plen. Sé disip-la ranmasé sé mòso pen la ki té ka rété la : yo plen 12 pannyé. 21 Ni apépré 5000 nonm ki manjé, é yo pa menm konté sé madanm-la é sé timoun-la. 22 Tousuit apré, i di disip a-y monté òbò bato-la é ay lòt bò a lanmè-la toupannan i té ka fè sé moun-la pati.
23 Apré i fè foulmoun-la pati, i monté an montangn-la tousèl a-y pou i priyé. Lè lannuit rivé, i té la, tousèl a-y. 24 Bato-la té ja lwen* an lanmè-la ; sé vag-la té ka malmenné bato-la toubònman, pas van-la té ka vin an lòt sans-la. 25 Men lè jou té k’ay wouvè*, Jézi mété-y ka maché asi lanmè-la pou i té ay jwenn sé disip-la. 26 Lè sé disip-la vwè-y ka maché asi lanmè-la, yo manké pèd lakat. Mi sa yo di : « Sé on vizyon nou ka vwè la ! » É tèlman yo té pè, yo mèt-yo ka hélé. 27 Men onfwamenm, Jézi di-yo : « Pran kouraj, sé mwen ki la. Zò pa bizwen pè. » 28 Pyè réponn-li : « Ségnè, si sé vou, di-mwen vin jwenn-vou anlè dlo-la. » 29 I di-y : « Vini-w ! » Alò Pyè désann an bato-la é i koumansé maché anlè dlo-la pou ay jwenn Jézi. 30 Men lè i vwè jan van-la té ka souflé fò, i pran pè. É konm i koumansé koulé, i mété-y ka hélé : « Ségnè, sové-mwen ! » 31 Jézi lonji men a-y tousuit ; i kenbé Pyè é i di-y : « Poukwa sé yenki tikrazi fwa-lasa ou ni ? Poukwa ou lésé dout pran lanmen asi-w ? » 32 Aprésa yo monté an bato-la, é van-la enn arété souflé. 33 Alò sé moun-la ki té an bato-la mèt-yo ajounou douvan Jézi* é yo di-y : « Ou sé gason a Bondyé menm ! » 34 Lèwgadé, yo fin travèsé lanmè-la é yo rivé Jénézarèt.
35 Sé moun-la ki té ka rété koté-lasa rèkonnèt-li é yo fè toutmoun an réjyon-la sav kè Jézi la. Alò yo menné tout sé moun-la ki té malad la ba-y. 36 É yo té ka sipliyé-y pou i té lésé-yo mannyé jis on ti bout a lenj a-y, é tout moun ki té ka touché bout a lenj a-y té ka géri.