Akt (sa sé apòt-la fè)
20 Lèwvwè tout biten vin kalm, Pòl fè sé disip-la vin, i ankourajé-yo, é i di-yo ovwa. Aprésa i pati pou ay an Masédwàn. 2 Pannan i té ka travèsé réjyon-lasa, i ankourajé sé disip-la ki té la la toubònman, é i ay an Grès. 3 I rété la 3 mwa, men lè i té k’ay pran bato pou ay an Siri, i vin sav kè sé Juif-la té monté konplo pou yo tchouyé-y. Kifè i désidé pasé pa Lamasédwàn pou i rètouné. 4 Mi non a sé moun-la ki vwayajé èvè-y la : Sopatèw (gason a Piris ki sé on Moun-Béré), Aristawk é Sèkindis (2 Moun-Tésalonik), Gayis (on Moun-Dèwbé), é Timoté. Té ni osi Tichik é Twofim ki sòti an téritwa a Lazi. 5 Sé boug-lasa pati douvan é yo atann-nou a Twoas. 6 Men nou aprézan, lè fèt a sé Pen san lèvi la fin, nou monté òbò on bato a Filip, é mwens ki 5 jou apré, nou jwenn-yo a Twoas. Nou rété la 7 jou.
7 Prèmyé jou a simenn-la, nou sanblé pou nou té manjé ansanm. Konm Pòl té pou pati lèlandèmen-la, i koumansé palé ba sé moun-la ki té la la, é i kontinyé palé jiska minui. 8 Té ni enpé lanp adan pyès-la nou té yé la ; sé on pyès ki té anho a kaz-la. 9 Té ni on jennboug sizé òbò finèt-la, é non a-y sé té Étich. Pannan Pòl té ka palé, sonmèy pati èvè-y ; i té ka dòmi fò toubònman. I té o dézyèm étaj é lèwgadé, i tonbé pa finèt-la. É lè yo vin owa a-y, i té mò. 10 Men Pòl désann, i panché-y anlè Étich é i pran-y an bra a-y. Aprésa i di : « Pa enkyèté-zòt, i vivan ! » 11 Alò Pòl rètouné anhola, i kasé pen-la é i koumansé manjé. I kontinyé ti kozé a-y pannan on bon moman joustan jou wouvè, é aprésa i pati. 12 Alò sé moun-la pati èvè jenngason-la é i té vivan. Yo té kontan toubònman.
13 Nou monté òbò on bato, é nou pati pou ay a Asòs. Sé la Pòl té mandé-nou vin jwenn-li pou i té monté adan bato-la, pas li, i té vlé ay adan vil-lasa apyé. 14 Lè i jwenn-nou a Asòs, nou fè-y monté òbò bato-la é nou ay a Mitilèn. 15 Lèlandèmen-la nou sòti Mitilèn, é nou rivé toupré lilèt a Kiyo. Dézyèm jou-la nou arété a Samòs on ti moman, é twazyèm jou-la nou rivé a Milé. 16 Pòl té désidé kè i pa té’é arété a Éfèz, pou i pa té rété lontan adan téritwa a Lazi. I té ka pòté mannèv pas i té vlé rivé a Jérizalèm jou a Lapannkòt, si i té pé.
17 Men pannan i té a Milé, i voyé on mésaj ba sé ansyen-la ki té adan lasanblé a Éfèz pou yo té vin jwenn-li. 18 Lè yo rivé owa a-y, i di-yo : « Zò sav byen kijan an té ka aji lè an té èvè zòt dépi jou-la an rivé adan téritwa a Lazi : 19 An travay kon èsklav pou Ségnè-la ; an fè sa èvè onlo imilité toubònman é an pléré onlo. É konm sé Juif-la té monté konplo pou yo té tchouyé-mwen, an jwenn onlo éprèv. 20 An menm balan-la, an toujou di-zòt tousa ki té’é pé fè-zòt dibyen. Anplisdisa, an toujou anségné-zòt douvan moun é lè an té ka préché dè kaz-an-kaz. 21 An di sé Juif-la é sé Grèk-la kè fò-yo rèpanti-yo, kè fò-yo adoré Bondyé é kè fò-yo ni lafwa adan Ségnè an nou, Jézi. An èspliké-yo sa byen menm. 22 É konnyéla, gadé ! An k’ay Jérizalèm : sé lèspri sen ki ka menné-mwen la é an pa menm sav ka ki ké rivé-mwen anbala. 23 Onsèl biten an sav, sé kè adan chak vil an pasé, lèspri sen toujou di-mwen kè sé lajòl é pèwsékisyon ki ka atann-mwen. 24 Men an pa’a ba vi* an mwen pon valè. Sa ki pi enpòwtan pou mwen, sé rivé an bout a kous-la an ka kouri la, é fin fè travay-la Jézi Ségnè-la ban-mwen fè la, kivédi préché bon nouvèl-la afon, on bon nouvèl ki anrapò èvè favè èstraòwdinè la Bondyé ka bay la.
25 « É konnyéla, gadé ! Zòtout ki la, an préché Wayòm-la ba zòt, men an sav kè zò ponyonn pé’é vwè-mwen ankò. 26 Alò mi sa an ka di douvan a zòt : an pa rèsponsab a mò a ponmoun, 27 pas an toujou fè-zòt sav tousa ki anrapò èvè volonté* a Bondyé. 28 Tansyon a zòt, é pran swen a tout twoupo-la, pas lèspri sen chwazi-zòt anmitan a-y pou pran swen a lasanblé a Bondyé, on lasanblé i achté èvè san a Gason a-y ki ta-y. 29 An sav kè lè an pé’é la ankò, ni moun ki ké vin pawmi zòt é yo ké kon lou anrajé ; yo ké britalizé twoupo-la. 30 Anplisdisa, anmitan a zòt ké ni moun ki ké tòd lavérité pou fè sé disip-la suiv-yo.
31 « Alò rété véyatif é sonjé kè pannan 3 an, lajouné kon lannuit, an pa jen arété avèti-zòchak. An jous pléré lèwvwè an té ka palé ba zòt. 32 É konnyéla, an ka swété kè Bondyé pwotéjé-zòt, é kè pawòl-la ki anrapò èvè favè èstraòwdinè la i ka bay la pwotéjé-zòt osi ! Pawòl-lasa ké fè-zòt vin solid é i ké pèwmèt-zòt ni éritaj-la Bondyé ka ba touséla i chwazi la. 33 An pa chèché a ni ni awjan, ni lò, ni lenj a ponmoun. 34 Zò sav byen kè an travay èvè 2 men an mwen pou an té ni sa an té bizwen, é pou an té ba séla ki té èvè mwen la sa yo té bizwen osi. 35 Adan tout kalté sitiyasyon, an montré-zòt kè fò-zò travay rèd kon mwen an fè-y, pou zò pé sa édé séla ki fèb la. Anplisdisa, fò-zò sonjé sa Jézi Ségnè-la limenm a-y di : “On moun ka pli kontan lè i ka bay ki lè i ka rèsèvwa.” »
36 Apré Pòl di sé biten-lasa, i mété-y ajounou èvè yotout é i priyé. 37 Alò yotout pléré onlo toubònman, yo pran Pòl an bra a yo é yo bo-y èvè onlo tandrès, 38 pas lèwvwè i di-yo kè yo pa té’é vwè-y ankò, yo té tris toubònman. Aprésa yo ay èvè-y pou i té pran bato-la.