Pou Filémon

1 Mwen Pòl, an lajòl pas an ni fwa an Kris Jézi, é an ka maké lèt-lasa ansanm èvè Timoté. Lèt-lasa sé pou-w Filémon. Ou ka travay èvè nou, ou sé zanmi an nou, é nou enmé-w. 2 Lèt-lasa sé pou sè an nou Apfya osi, pou Awchip on sòlda a Kris kon noumenm, é pou lasanblé-la ki ka réini akaz a-w la.

3 Adan priyè an mwen, an ka mandé pou Pap’an nou Bondyé, é pou Jézikris Ségnè-la, aji épi zòt èvè on bonté ki èstraòwdinè, é an ka mandé pou yo ba-zòt lapé osi !

4 An toujou ka di Bondyé mèsi lè an ka palé dè-w adan priyè an mwen, 5 pas toutlè, an ka tann palé dè fwa a-w, an ka tann palé dè jan ou enmé Jézi Ségnè an nou é dè jan ou enmé tout sé sen-la. 6 An ka priyé pou fwa-la noutout ni la édé-w rann-vou kont kè nou ja rèsèvwa onpakèt bon biten grasa Jézikris. 7 Pas lè an tann palé dè lanmou a-w, an té kontan toubònman é sa konsolé-mwen onlo menm ! Wi frè an mwen, ou ankourajé sé sen-la !

8 Sé pousa menmsi antankè apòt a Kris, an ni dwa ba-w lòd fè sa ki fo, 9 an pisimé sipliyé-w pas an sav ou plen lanmou. An ka fè sa, piskè mwen Pòl, an ja ni on bèl laj, é anplisdisa an lajòl alèla davwa an ni fwa an Jézikris. 10 An ka mandé-w on favè pou Onézim, timoun an mwen. An vin on papa pou-y toupannan an lajòl*. 11 Avan sa i pa té itil pou-w, men aprézan i itil ki pou vou, ki pou mwen. 12 An ka fè-y viré owa a-w ; sé on tiboug an enmé èvè tout tchè an mwen.

13 An té’é byen anvi i rété la èvè mwen pou i pé sa édé-mwen. Dayè si ou té la, sé-w ki té’é édé-mwen an plas a-y. Yo maré-mwen pas an té ka préché bon nouvèl-la, é i té’é pé édé-mwen pannan mwen andidan la. 14 Men an vé pa fè ayen si ou pa dakò. Konsa ou ké pé fè bèl jès-lasa dè bonkè olyé ou fè-y pas ou ka santi-w oblijé. 15 Sé vré, i chapé kò a-y pannan on ti moman*, men pétèt sé té on bon biten, piskè grasa sa, i ké pé viré owa a-w pou touttan. 16 I pé’é viré antankè èsklav ankò, pas konnyéla i ni plis valè ki on èsklav. Sé frè an nou ! An enmé-y onlo toubònman, men ou ké enmé-y plis ki mwen ankò. Ou pé’é enmé-y yenki paskè sé on èsklav, men ou ké enmé-y paskè sé on frè osi. 17 Alò si ou ka konsidéré kè an sé zanmi a-w, akéyi-y byen konsi sé mwen ou té ka akéyi. 18 Anplisdisa, siwvwè i fè-w on biten ki pa bon oben si i ka doué-w on biten, mèt sa asi kont an mwen. 19 Sé mwenmenm Pòl ki ka maké sa pou-w : an ké ranbousé-w... é an pa bizwen fè-w sonjé kè ou jous ka doué-mwen vi a-w. 20 Wi, frè an mwen, an ka èspéré ou ké soutyenn-mwen, pas nou toulédé, nou sé disip a Ségnè-la. Soulajé tchè an mwen, pas ou sé on disip a Kris.

21 An sèten ou ké fè sa an mandé-w. Sé pousa an ka ékri-w, menmsi an ja sav ou ké fè lontan plis ki sa an ka di-w. 22 É an menm balan-la, préparé on ti koté pou mwen rété, pas an ka èspéré kè grasa priyè a zòt, yo ké lagé-mwen*.

23 Épafras ki lajòl kon mwenmenm pas i ni fwa adan Jézikris, ka voyé bonjou ba-w. 24 Mawk, Aristawk, Démas é Lik ka travay èvè mwen, é yo ka voyé bonjou ba-w osi.

25 An ka swété kè Jézikris Ségnè an nou, aji èvè onlo bonté èvè zòt, pas zò ni on bèl mantalité.