Akt (sa sé apòt-la fè)

10 A Sézaré, té ni on boug non a-y sé té Kòwnèy. Sé té on ofisyé ki té chèf a 100 sòlda italyen. 2 I té ka krenn Bondyé, é i té ka adoré-y ansanm èvè tout sé moun-la ki té ka viv akaz a-y la. I té ka fè onlo bon biten pou moun ki maléré, é i té ka sipliyé Bondyé toutlè. 3 Koté twazè-d-laprémidi*, i vwè on vizyon. Adan vizyon-lasa, Kòwnèy vwè on zanj a Bondyé ka rantré andidan kaz a-y é i té ka vwè zanj-la byen menm. Zanj-la di : « Kòwnèy ! » 4 Kòwnèy pran pè, i gadé zanj-la fiks, é i di-y : « Wi Ségnè, an ka kouté-w. » I di-y : « Bondyé tann sé priyè-la ou fè la, é i vwè kantité bon biten ou fè ba sé maléré-la. I pa ka oubliyé sa. 5 Alò konnyéla, voyé déotwa boug a Jopé, é di-yo ay chèché on dénonmé Simon kè yo ka kriyé Pyè osi. 6 I aka on boug ki ka fè kui èvè po a bèt, é non a boug-lasa sé Simon osi ; kaz a boug-lasa owa lanmè-la. » 7 Lè zanj-la fin palé èvè Kòwnèy, i pati. Pati i pati, Kòwnèy kriyé 2 sèwvitè a-y é on sòlda pawmi séla ki té ka travay ba-y la. Sòlda-lasa té ka krenn Bondyé onlo. 8 Kòwnèy rakonté-yo tousa ki pasé, é aprésa i voyé-yo a Jopé.

9 Lèlandèmen-la, pannan sé boug-la té anchimen é kè yo té toupré rivé Jopé, Pyè monté anlè véranda-la ki anho a kaz-la pou priyé. I té midi apépré*. 10 Men i touvé-y fen toubònman, é i té anvi manjé. Pannan yo té ka préparé manjé-la, i vwè on vizyon. 11 I vwè syèl-la, é syèl-la té wouvè. On biten ki té ka sanm on gran twèl an len té ka désann asi latè konsi on moun té ka kenbé-y pa 4 bout a-y. 12 Té ni tout kalté bèt a 4 pat adan-y, tout kalté bèt ki ka ranpé é kè yo ka touvé asi latè, é tout kalté zozyo ki ka volé osi. 13 Alò on vwa di-y : « Pyè, lévé-w ! Tchouyé on bèt é manjé ! » 14 Men Pyè réponn : « Awa Ségnè, an pé pa fè sa, pas an po’o jen manjé on biten kè Lwa-la ka défann-nou manjé é kè Bondyé ka mèt an ran a biten ki sal. » 15 É vwa-la palé ba-y on dézyèm fwa ankò. I di-y : « Arété di kè sa Bondyé pwòpté sé biten ki sal. » 16 Sa fèt on twazyèm fwa, é tousuit apré, twèl-la viré monté an syèl-la.

17 Pannan Pyè té ka réfléchi toujou pou konprann ka vizyon-la i té sòti vwè la té vlé di, sé boug-la Kòwnèy té voyé la té ja mandé ola kaz a Simon té yé, é yo té ja doubout douvan pòt-la. 18 Yo kriyé mèt a kaz-la, é yo mandé si sé la Simon Pyè té yé. 19 Pannan Pyè té ka réfléchi asi vizyon-la toujou, lèspri sen di-y : « Gay sa ! Ni 3 boug ki ka mandé ba-w. 20 Alò désann, é ay èvè yo. Ou pa bizwen pè, pas sé mwen ki voyé-yo. » 21 Pyè désann owa sé boug-la, é i di-yo : « Mi mwen, sé mwen zò ka chèché. Ka an pé fè ba zòt ? » 22 Yo di Pyè : « Sé on ofisyé a lawmé non a-y sé Kòwnèy ki voyé-nou. Boug-lasa ka krenn Bondyé é pa ni ayen a rèpwoché-y. Anplisdisa, tout sé Juif-la ka palé dè-y anbyen. Bondyé voyé on zanj di-y kè fò i fè-w vin akaz a-y pou i tann sa ou ni a di. » 23 Alò Pyè fè-yo rantré an kaz-la, é i ba-yo on koté pou yo té dòmi.

Lèlandèmen-la, i lévé, é i pati èvè yo. Ni déotwa frè Jopé ki ay èvè-y osi. 24 I rivé a Sézaré on jou apré. Nou ka tou konprann kè Kòwnèy té ka atann-yo. I té ja sanblé moun ki an fanmi a-y é bon zanmi a-y. 25 Lè Pyè rivé, Kòwnèy vin jwenn-li. I mété-y ajounou douvan a-y, é i bésé tèt a-y pou i té ba-y lonnè. 26 Men Pyè fè Kòwnèy doubout, é pannan i té ka fè sa, i di-y : « Lévé-w ; an sé on nonm kon-w menm ! » 27 É toupannan Pyè té ka palé èvè Kòwnèy, i rantré, é i touvé onlo moun sanblé la. 28 I di-yo : « Zò sav byen kè on Juif pa ni dwa frékanté on moun ki pa Juif, é i pa menm ni dwa ay akaz a-y. É magrésa, Bondyé montré-mwen kè a pa paskè on moun pa’a viv dapré sa Lwa-la ka di, kè fò pa an frékanté-y. 29 Sé pousa, lè yo vin chèché-mwen, an pa diskité èvè yo. Men konnyéla, di-mwen pou ki biten zò fè-mwen vin. »

30 Alò Kòwnèy di : « Ni 4 jou dè sa, koté menm lè-la, an té ka priyé akaz an mwen. I té twazè-d-laprémidi apépré*, é on boug enn doubout douvan mwen ; lenj a-y té ka kléré. 31 I di-mwen : “Kòwnèy, Bondyé tann priyè a-w, é i pa ka oubliyé tout sé bon biten-la ou fè ba sé maléré-la. 32 Alò konnyéla, voyé moun a Jopé, é di-yo ay chèché on dénonmé Simon, kè yo ka kriyé Pyè osi. I aka on boug ki ka fè kui èvè po a bèt, é non a boug-lasa sé Simon osi. Boug-lasa ka rété owa lanmè-la.” 33 Kifè, an voyé moun chèché-w tousuit é nou ka di-w on bèl mèsi pas ou té dakò pou vin kotésit. Sé pousa konnyéla, noutout sanblé douvan Bondyé, pou nou tann tousa Jéova mandé-w di. »

34 Lèwgadé, Pyè pran lapawòl. I di : « Aprézan, si ni on biten an ka konprann byen menm, sé kè Bondyé pa ka fè préférans. 35 Men dépi on moun ka krenn-li é ka fè sa ki jis, sa ka fè-y plézi kèlkèswa nasyon-la i sòti adan-y la. 36 I voyé on mésaj pou anonsé sé Israélit-la on bon nouvèl ; on bon nouvèl konmkwa ké ni lapé grasa Jézikris, li ki sé Ségnè a toutmoun. 37 Zòmenm, zò sav dè ki biten sé moun-la té ka palé toupatou an Jidé. É avan yo té palé dè sa an Jidé, yo té ja ka palé dè sa an Galilé, apré batèm-la Jan té ka préché la. 38 Yo té ka palé dè Jézi, on boug Nazarèt. Yo té ka rakonté jan Bondyé sèvi èvè lèspri sen a-y pou chwazi-y é pou ba-y pouvwa. É yo té ka rakonté osi kè pannan i té ka travèsé péyi-la, i té ka fè moun dibyen, é i té ka géri tout moun Dyab-la té ka fè soufè, pas Bondyé té èvè-y. 39 Nou vwè tousa i fè a Jérizalèm é adan péyi a sé Juif-la ; men yo mété-y anlè on poto* pou tchouyé-y. 40 Bondyé résisité-y twazyèm jou-la pou moun té pé sa vwè-y. 41 Men a pa té pou toutmoun té vwè-y. Sé té pou bann an nou té vwè-y, nou ki manjé é ki bwè èvè-y apré i résisité. Bondyé té chwazi-nou dépi alavans pou nou té vwè-y é pou nou té palé dè-y. 42 Anplisdisa, i mandé-nou ay préché ba pèp-la, é èspliké-yo byen kè sé-y Bondyé chwazi pou jijé moun ki vivan é moun ki mò. 43 Tout sé pwofèt-la palé dè-y. Yotout di kè grasa non a-y, Bondyé ké padonné péché a tout moun ki ni fwa adan-y. »

44 Pyè kontinyé palé dè sé biten-lasa, é lèwgadé, lèspri sen vin anlè tout sé moun-la ki té ka kouté pawòl a Bondyé. 45 É sé disip-la* ki té vin èvè Pyè la touvé-yo étoné lè yo vwè kè Bondyé té ka voyé lèspri sen a-y (on kado ki gratui) asi moun ki pa Juif*. 46 Yo té ka tann-yo ka palé dòt lang é ka ba Bondyé louwanj. Alò Pyè di : 47 « Piskè Bondyé voyé lèspri sen asi sé moun-lasa kon i voyé-y asi nou, ès on moun pé di kè yo pé pa batizé èvè dlo ? » 48 É i bay lòd pou batizé-yo an non a Jézikris. Aprésa, yo mandé-y rété èvè yo déotwa jou.