Évanjil a Matyé

6 « Si lèwvwè zò ka fè bon biten, sé pou fè-moun vwè-zòt, tansyon a zòt ! Pas si sé sa zò ka fè, Pap’a zòt ki an syèl-la pé ké béni-zòt. 2 Donk lè ou ka fè on bon biten pou moun ki maléré, pa fè piblisité pou sa*, kon sé ipokrit-la ka fè lè yo adan sé sinagòg-la é lè yo an lari-la. Yo vé fè moun pòté-yo anlè. San manti ba zòt, yo ja ni rékonpans a yo é yo pé’é ni plis ki sa. 3 Men vou, lè ou ka fè on bon biten pou sé maléré-la, fè ansòt pou men gòch a-w pa sav sa men dwat a-w ka fè. 4 Lè ou ka fè on bon biten pou on moun ki maléré, fè ansòt pou ponmoun pa sav sa. É Pap’a-w ki ka vwè tout biten ké béni-w.

5 « Anplisdisa, lè zò ka priyé, pa fè kon sé ipokrit-la ki enmé priyé doubout adan sé sinagòg-la é adan sé katchimen-la* pou fè moun vwè-yo. San manti ba zòt, yo ja ni rékonpans a yo é yo pé’é ni plis ki sa. 6 Men lè ou vé priyé, rantré an chanm a-w, é apré ou fèmé pòt-la, priyé Pap’a-w ki an syèl-la*. Alò, Pap’a-w ki ka vwè tout biten ké béni-w. 7 Lè zò ka priyé, pa répété menm biten-la toutlè kon sé moun-la ka fè adan sélézòt nasyon-la, pas yo ka konpranndèdi Bondyé ké tann-yo davwa yo ka palé onlo. 8 Alò, pa fè kon yo, pas Pap’a zòt sav sa zò bizwen avan menm zò mandé-y li.

9 « Donk, mi sé konsa pou zò priyé :

« “Pap’an nou ki an syèl-la, fò non a-w vin sen*. 10 Fò wayòm a-w vini. Fò volonté a-w fèt asi latè, kon i ja ka fèt an syèl-la. 11 Ban-nou pen-la nou bizwen la pou jòdila. 12 Padonné péché an nou, kon nou osi nou ka padonné moun ki ka péché kont nou. 13 É édé-nou pou tantasyon-la pa pran lanmen asi nou, men woté-nou* anba men a méchan-la.”

14 « Pas si zò ka padonné lézòt lè yo fè on érè, Pap’a zòt ki an syèl-la ké padonné-zòt osi. 15 Men si zò pa’a padonné lézòt lè yo fè on érè, Pap’a zòt pé’é padonné-zòt nonplis lè zò ké fè on érè.

16 « Si zò désidé rété san manjé* pannan on moman, pa mèt on min ki tris an figi a zòt kon sé ipokrit-la ka fè, pas yo ka fè sa* pou montré toutmoun kè yo rété san manjé. Zò pé kwè-mwen, yo ja ni rékonpans a yo é yo pé’é ni plis ki sa. 17 Men vou, lè ou ka rété san manjé, pasé luil asi tèt a-w, é lavé figi a-w. 18 Konsa, ponmoun pé’é vwè kè ou ka rété san manjé, men sé yenki Pap’a-w ki an syèl-la ki ké vwè sa. É Pap’a-w ki ka vwè tout biten ké béni-w.

19 « Arété sanblé trézò asi latè, pas sé on koté mit é wouy ka détwi tout biten é sé on koté vòlè ka rantré pou yo volé. 20 Pisimé zò sanblé trézò an syèl-la, pas sé on koté pa ni mit é pa ni wouy pou détwi ayen, é sé on koté vòlè pa ka rantré pou yo volé. 21 Pas la trézò a-w yé, sé la tchè a-w ké yé osi.

22 « Zyé-la sé lanp a kò-la. Si zyé a-w ka gadé onsèl biten*, tout kò a-w ké ka kléré*. 23 Men si zyé a-w anvi sa lézòt tini*, tout kò a-w ké an nwèsè. Si an réyalité, limyè-la ki andidan a-w la sé nwèsè, sé kè andidan a-w, ka fè nwè toubònman menm !

24 « Ponmoun pé pa èsklav a 2 mèt anmenmtan : swa i ké hay yonn é i ké enmé lòt-la, oswa i ké vin bon bon zanmi èvè yonn é i ké méprizé lòt-la. Zò pé pa èsklav a Bondyé é èsklav a Lajan anmenmtan.

25 « Sé pousa mi sa an ka di-zòt : Arété pran tèt a zòt pou vi* a zòt. Pa di : “Ka an ké manjé é ka an ké bwè ?” É arété pran tèt a zòt parapòt a kò a zòt. Pa di : “Ka an ké mèt anlè mwen ?” Lavi* pa pi enpòwtan ki manjé alò ? É kò-la, i pa pi enpòwtan ki lenj-la alò ? 26 Pran tan gadé sé zozyo-la byen : yo pa ka simé, yo pa ka rékòlté é yo pa ka mèt ayen akoté ; magrésa, Pap’a zòt ki an syèl-la ka ba-yo manjé. Zò pa’a di zò ni plis valè ki yo ? 27 Kilès adan zòt ki pé di kè lè i ka chaléré kò a-y, i ka rivé mèt on jouné anplis asi longè a vi a-y* ? 28 É poukwa zò ka pran tèt a zòt anrapò èvè sa zò ké mèt asi zòt ? Pran tan réfléchi asi jan sé flè-la* ki an savann-la ka pousé : yo pa’a fòsé é yo pa’a fè lenj nonplis. 29 Men an ka di-zòt kè jous Salomon, adan tout glwa-la i té ni la, pa té sapé kon yo. 30 Si Bondyé ka abiyé sé plant-la ki an savann-la konsa, alòskè yo la jòdla é dèmen yo ké jété-yo an difé, zò pa bizwen mandé si i ké abiyé-zòt osi ! Kijanfè sé yenki tikrazi fwa-lasa zò ni ? 31 Alò pa jen tèwbolizé lèspri a zòt, é pa di : “Ka nou ké manjé ?” oben : “Ka nou ké bwè ?” oben : “Ka nou ké mèt asi nou ?” 32 Pas sé dèyè sé biten-lasa sélézòt nasyon-la ka kouri. Pap’a zòt ki an syèl-la sav kè zò bizwen tout sé biten-lasa.

33 « Alò kontinyé chèché wayòm a Bondyé é jistis a-y an prèmyé, é i ké ba-zòt tout sé rèstan biten-la. 34 É pa jen tèwbolizé lèspri a zòt parapòt a sa ki pé fèt dèmen, pas dèmen ké ni chaj a-y ki ta-y. Chakjou ni pwoblèm a-y ki ta-y.