Évanjil a Jan
14 « Pa enkyété-zòt. Montré kè zò ni fwa adan Bondyé ; montré kè zò ni fwa adan mwen osi. 2 Akaz a Pap’an mwen ni onlo koté pou moun rété. Si pa té ni onlo koté, an té’é di-zòt sa. Jistèman, an ka pati pou préparé on plas pou zòt. 3 Anplisdisa, lèwvwè an ké pati é lèwvwè an ké préparé on plas ba zòt, an ké rètouné, é an ké rèsèvwa-zòt akaz an mwen. Konsa, la an ké yé la, sé la zò ké yé osi. 4 É zò konnèt chimen-la pou ay la an k’ay la. »
5 Toma di-y : « Ségnè, nou pa sav ola ou k’ay. Kijan nou pé fè pou konnèt chimen-la ? »
6 Jézi réponn-li : « An sé chimen-la, vérité-la é lavi. Ponmoun pé pa vin owa Papa-la si i pa pasé pa mwen. 7 Si zò té konnèt-mwen, zò té’é konnèt Pap’an mwen osi ; konnyéla, zò konnèt-li é zò vwè-y. »
8 Filip di Jézi : « Ségnè, montré-nou Papa-la, é nou pa bizwen plis ki sa. »
9 Jézi di-y : « Alò Filip, magré tout tan-la an pasé èvè zòt la, ou pò’ò jen rivé a konnèt-mwen ? Dépi on moun vwè-mwen, i vwè Papa-la osi. Kijanfè ou ka di : “Montré-nou Papa-la” ? 10 Ou konsa ou pa’a kwè kè an soudé èvè Papa-la é kè Papa-la soudé èvè mwen ? An pa’a pran si kont an mwen pou di-zòt sé biten-la an ka di-zòt la, men Papa-la, li ki soudé èvè mwen, ka sèvi èvè mwen pou fè volonté a-y. 11 Zò pé kwè-mwen lè an ka di-zòt kè an soudé èvè Papa-la é kè Papa-la soudé èvè mwen ; si zò pa’a kwè parapòt a sa an ka di, kwè parapòt a sé biten-la an ka fè la. 12 Zò pé kwè-mwen : si on moun ka montré i ni fwa adan mwen, i ké fè sé biten-la an ka fè la osi ; é i ké fè biten ki pi gran ki sa ankò, pas an k’ay owa Papa-la. 13 Anplisdisa, tousa zò ké mandé an non an mwen, an ké fè-y. An ké fè-y, pou Gason-la ba Papa-la glwa. 14 Si zò mandé on biten an non an mwen, an ké fè-y.
15 « Si zò enmé-mwen, zò ké fè sa an ka mandé-zòt. 16 An ké mandé Papa-la ba-zòt ondòt èd* pou i rété èvè zòt toutlè. 17 I ké ba-zòt lèspri a lavérité. Sé on lèspri mond-lasa pé pa rèsèvwa, pas yo pa’a vwè-y é yo pa konnèt-li. Zòt, zò konnèt-li, pas i adan zòt é i toujou èvè zòt. 18 An pé’é lésé-zòt tousèl*. An ké viré owa a zòt. 19 Adan on ti moman, mond-la pé’é vwè-mwen ankò. Men zò ké vwè-mwen, pas an ké kontinyé viv é zòt osi zò ké viv. 20 Jou-lasa zò ké sav kè an soudé èvè Pap’an mwen, kè zò soudé èvè mwen, é kè an soudé èvè zòt. 21 Sila ki ka aksèpté komandman an mwen é ki ka fè sa an ka mandé, sé moun-lasa ki enmé-mwen. Menmjan-la, si on moun enmé-mwen, Pap’an mwen ké enmé-y, é mwen an ké enmé moun-lasa. Anplis, an ké fè-y konnèt kimoun an yé on mannyè ki klè. »
22 Jida (a pa Jida Iskaryòt) di Jézi konsa : « Ségnè, poukwa ou vlé nou konnèt-vou byen konm i fo, é ou vé pa sé moun-la ki an mond-la konnèt-vou byen konsa ? »
23 Jézi réponn-li : « Si on moun enmé-mwen, i ké fè sa an ka di, é Pap’an mwen ké enmé-y. Anplisdisa, mwen é Pap’an mwen nou ké vin owa a-y é nou ké rété ansanm èvè-y. 24 Si on moun pa enmé-mwen, i pa ka fè sa an ka di. Pawòl-la zò ka tann la, a pa pawòl an mwen, men sé pawòl a Papa-la ki voyé-mwen la.
25 An ka di-zòt sé biten-lasa pannan an èvè zòt toujou. 26 Men lèspri sen, èd-la kè Papa-la ké voyé an non an mwen la, sé li ki ké anségné-zòt tout biten é ki ké fè-zòt sonjé tousa an di-zòt. 27 An ka lésé lapé pou zòt ; sé lapé-la an ni la an ka ba-zòt ; an ka ba-zòt li, men an pa’a ba-zòt li menmjan ki mond-la. Pa enkyété-zòt, é pa pè. 28 Zò tann kè an di-zòt : “An ka pati é an ké viré owa a zòt.” Si zò té enmé-mwen, zò té’é kontan davwa an k’ay owa Papa-la, pas Papa-la pi fò ki mwen. 29 An di-zòt sa konnyéla, avan sa fèt. Konsa lèwvwè sa ké rivé, zò ké kwè. 30 An pé’é palé tèlman èvè zòt ankò pas chèf a mond-la ka vin é i pé pa dominé-mwen*. 31 An ka fè ègzaktèman sa Papa-la mandé-mwen fè, pou mond-la sav kè an enmé Papa-la. Lévé-zòt, an-nou alé.