Évanjil a Jan
17 Jézi di sé biten-lasa, é aprésa, i lévé zyé a-y an syèl é i di : « Papa, lè-la rivé. Ba gason a-w glwa pou gason a-w ba-w glwa. 2 Ou ba-y pouvwa asi tout limanité*. Sé pou i ba tout sé moun-la ou ba-y la lavi étèwnèl. 3 Pou yo ni lavi étèwnèl, mi sa pou yo fè : fò-yo aprann konnèt-vou, vou, sèl vré Dyé-la, é sila ou voyé la, Jézikri. 4 An ba-w glwa asi latè, an fin travay-la ou ban-mwen fè la. 5 É konnyéla, Papa, pèwmèt-mwen vin owa a-w pou ou ban-mwen glwa-la an té ni la lè an té akoté a-w, avan lézimen vin ka ègzisté.
6 « Sé boug-la ki té adan mond-la, é kè ou ban-mwen la, an fè-yo konnèt non a-w. Sé té disip a-w, é ou ban-mwen-yo, é yo fè sa pawòl a-w ka di. 7 Konnyéla, yo sav kè tout sé biten-la ou ban-mwen la, sé dè-w yo ka vin. 8 Yo sav sa, pas an di-yo sé pawòl-la ou di-mwen la, é yo aksèpté sé pawòl-lasa. Anplis, yo vin sav kè sé-w an té ka rèprézanté lèwvwè an vin, é yo té sèten kè sé-w ki té voyé-mwen. 9 An ka priyé pou yo ; a pa pou mond-la an ka priyé, men sé pou sé moun-la ou ban-mwen la, pas yo sé disip a-w ; 10 tousa ki tan mwen sé ta-w, é sa ki ta-w sé tan mwen. É sé moun-la ou ban-mwen la ban-mwen lonnè.
11 « An pa an mond-la ankò men yo, yo an mond-la, é mwen an ka vin owa a-w. Papa, vou ki sen, voyé zyé anlè yo akòz dè non a-w, non-la ou ban-mwen la. Konsa yo ké fè yonn* menmjan nou ka fè yonn*. 12 Pannan an té èvè yo, an té ka voyé zyé asi yo akòz dè non a-w, non-la ou ban-mwen la. An pwotéjé-yo, é ponyonn pa pèd. Men ni onsèl ki ké détwi. Konsa, sa ki maké adan Lézékriti ké réyalizé. 13 Men konnyéla, an ka vin owa a-w, é an ka di sé biten-lasa pannan mwen an mond-la toujou, pou yo pé sa rèsanti menm jwa ki mwen, é pou yo pé sa ni jwa-lasa adébòdé. 14 An ba-yo pawòl a-w, men mond-la té hay-yo, pas yo pa menm biten ki sé moun-la ki an mond-la, menmjan mwen, an pa menm biten ki sé moun-la ki an mond-la.
15 « An pa’a mandé-w woté-yo an mond-la, men an ka mandé-w voyé zyé asi yo akòz dè méchan-la. 16 Yo pa menm biten ki sé moun-la ki an mond-la, menmjan mwen, an pa menm biten ki sé moun-la ki an mond-la. 17 Fè-yo vin sen* grasa lavérité ; pawòl a-w sé vérité. 18 Menmjan ou voyé-mwen an mond-la, an voyé-yo an mond-la osi. 19 An ka fè ansòt pou mwen rété sen. An ka fè sa pou yo, pou yo osi, yo vin sen grasa lavérité.
20 « A pa enki pou yo an ka priyé, men an ka priyé-w osi pou tout moun ki ka kouté ansègnman a yo é ki ka ni fwa adan mwen apré yo kouté ansègnman-lasa. 21 Konsa yotout ké fè yonn, menmjan vou, Papa, ou soudé èvè mwen é mwen an soudé èvè-w. An ka priyé-w pou yo soudé èvè nou osi. Konsa mond-la ké kwè kè sé-w ki voyé-mwen. 22 An ba-yo glwa-la ou ban-mwen la. Sé pou yo fè yonn menmjan mwen èvè-w nou ka fè yonn. 23 An soudé èvè yo é ou soudé èvè mwen, pou yo pé sa soudé bon soudé la menm. Konsa, mond-la ké sav kè sé-w ki voyé-mwen é kè ou té enmé-yo kon ou té enmé-mwen. 24 Papa, an vé kè sé moun-la ou ban-mwen la touvé-yo menm koté ki mwen. Sé pou yo vwè glwa-la ou ban-mwen la, pas ou té enmé-mwen avan mond-la vin ka ègzisté. 25 Papa, ou toujou ka fè sa ki jis. Sé vré, mond-la pa sav kimoun ou yé, men mwen an sav kimoun ou yé, é sé moun-la ou ban-mwen la vin sav kè sé-w ki voyé-mwen. 26 An fè-yo konnèt non a-w é an ké kontinyé fè-yo konnèt-li. Konsa, yo ké montré kè yo enmé pwochen a yo menmjan ou montré kè ou enmé-mwen, é an ké soudé èvè yo. »