Akt (sa sé apòt-la fè)
28 Noutout rivé asi plaj-la san ayen rivé-nou, é sé lè nou vin sav kè non a lilèt-la sé té Malt. 2 Sé moun-la ki té ka rété la la té janti èvè nou toubònman. Konm lapli-la té atè é kè té ka fè fwèt, yo limé on difé, é yo rèsèvwa-noutout byen menm. 3 Pòl ranmasé déotwa mòso bwa sèk é i mèt-yo an difé-la. Men lèwgadé, akòz dè chalè-la, on sèpan sòti adan sé mòso bwa-la é i mòdé men a Pòl. 4 Lèwvwè sé moun-la ki té ka rété anlè lilèt-la vwè sèpan-la ka pann an men a Pòl, yonn koumansé di lòt : « Sèten boug-lasa sé on asasen ! Menmsi ayen pa rivé-y an lanmè-la, Lajistis* fè ansòt pou i pa rété vivan. » 5 Men Pòl soukwé bèt-la pou fè-y tonbé an difé-la, é i pa santi mal. 6 Yo konprann i té’é gonflé oben i té’é mò tousuit. Men yo atann pannan on bon moman, é lèwvwè yo rann-yo kont kè ayen pa té ka rivé Pòl, yo chanjé lidé, é yo koumansé di kè Pòl sé on dyé.
7 Toupré a la nou té yé la, on boug non a-y sé Pibliyis té ni plizyè mòso tè. Sé boug-lasa ki té ka gouvèné lilèt-la. I akéyi-nou byen, é i ban-nou on koté pou nou rété. Nou rété la 3 jou. 8 Papa Pibliyis té kouché èvè on lafyèv. Boyo a-y té malad, é sa té ka fè-y soufè toubònman. Pòl ay vwè-y, é i priyé Bondyé. I pozé men a-y anlè-y, é i géri-y. 9 Lèwvwè sa fèt, sélézòt moun-malad-la ki té ka rété anlè lilèt-la mèt-yo ka vin owa Pòl, é i géri-yo. 10 Anplisdisa, yo ban-nou onlo kado pou montré rèkonésans a yo. É lè nou té k’ay pran bato-la pou nou té pati, yo ban-nou tousa nou té bizwen.
11 Nou pasé 3 mwa a Malt. Aprésa nou baké abò on bato ki té ni èstati a « gason a Zés » douvan a-y. I té sòti Alèksandri é i té rété a Malt pannan tout livè-la. 12 Nou akòsté a Sirakiz, é nou rété la 3 jou. 13 Aprésa nou kité Sirakiz é nou rivé a Régyòm. Lèlandèmen-la, on van ki sòti o sid mété-y ka souflé, é nou pran 2 jou pou nou té rivé a Pitéoli. 14 An vil-lasa, nou touvé déotwa frè ki ensisté pou nou té rété èvè yo pannan 7 jou. Aprésa nou pati an dirèksyon a Wòm. 15 Lè sé frè Wòm la vin sav kè nou té anchimen, yo vin jous owa Mawché-a-Apiyis é jous on koté yo té ka kriyé Twa-Lotèl-la pou yo té vwè-nou. Lè Pòl vwè-yo, i di Bondyé mèsi, é sa ba-y fòs. 16 Anfinaldikont nou rivé a Wòm, é yo ba Pòl lotorizasyon pou i té rété tousèl a-y adan on kaz èvè gad-la ki té ka véyé-y la.
17 Men 3 jou apré, i fè kriyé sé gwotchak-la ki té ni pawmi sé Juif-la. Lèwvwè yotout sanblé, i di-yo : « Lézòm, léfrè, an pa fè ayen kont pèp-la, é an toujou ka suiv koutim a zansèt an nou. Magrésa, yo mèt-mwen lajòl a Jérizalèm, é yo lagé-mwen an men a sé Women-la. 18 Sé Women-la pozé-mwen kèsyon, é anfinaldikont yo té vlé libéré-mwen, pas yo pa touvé pon rézon pou yo té tchouyé-mwen. 19 Pawkont, sé Juif-la pa té dakò. Kifè, an té oblijé mandé pou ay douvan Séza. Men siwvwè an fè sa, a pa paskè an té ni on biten a rèpwoché nasyon an mwen. 20 Sé pousa an té vlé vwè-zòt é an té vlé palé ba zòt, piskè sé parapòt a sila Israèl té ka atann la* an maré èvè sé chenn-lasa. » 21 Yo di-y : « Nou pa rèsèvwa pon lèt ki sòti an Jidé é ki ka palé dè-w. Anplisdisa, pa ni pon frè ki sòti anbala é ki vin di-nou kè ou fè on biten ki pa bon. Pa ni ponyonn ki vin malpalé-w nonplis. 22 Men dapré nou, sa té’é byen si ou té ka di-nou sa ou ka pansé voumenm a-w, pas nou sav kè yo ka malpalé sèkt-lasa toupatou. »
23 Alò yo pran mo èvè Pòl pou yo té wouvwè-yo ondòt fwa, é yo vin vwè-y koté-la i té ka rété la èvè plis moun ankò. É dépi lèmaten jous oswa, i préché ba yo ; i èspliké-yo tousa yo té bizwen konnèt asi wayòm a Bondyé. I sèvi èvè sa ki maké adan Lwa a Moyiz é èvè sa sé Pwofèt-la maké pou fè-yo kwè adan Jézi. 24 Ni sa ki mèt-yo ka kwè adan sa i té ka di, men ni sa ki pa kwè. 25 Alò konm yo pa té ka tonbé dakò, sé moun-la koumansé pati yonn apré lòt. Men Pòl pa di-yo granzafè. Sèl biten i di-yo sé :
« Lèspri sen sèvi èvè pwofèt Izayi pou palé ba zansèt a zòt, é sa i di la sé vré. Mi sa i di : 26 “Ay di pèp-lasa : ‘Zò ké tann, men zò pé’é konprann ayen, é zò ké gadé men zò pé’é vwè ayen. 27 Tchè a pèp-lasa vin rèd kon wòch. Yo ka tann, men yo pa’a kouté. Yo fèmé zyé a yo pou yo pa vwè ayen, é yo bouché zòrèy a yo pou yo pa tann ayen. Kifè, yo pa’a konprann ayen, é yo pa’a chanjé pou mwen pé sa géri-yo.’” 28 Alò fò-zò sav on biten : yo voyé on mésaj ba moun ki pa Juif ; yo osi, yo fè-yo sav kijan Bondyé ka sové lézimen é sèten yo ké kouté mésaj-lasa. » 29 *
30 I rété adan kaz-la i té ka louwé la pannan 2 lanné é i té ka akéyi tout moun ki té ka vin vwè-y bra gran wouvè. 31 I té ka fè-yo konnèt ka ki wayòm a Bondyé* é i té ka anségné-yo sèwten biten anrapò èvè Jézikris Ségnè-la. I té ka fè sa èvè onlo kouraj, é pa ni ponmoun ki té ka anpéché-y fè sa.